2.12 ဒွါဒသမနယ သမ္ပယုတ္တေနသင်္ဂဟိတာသင်္ဂဟိတပဒနိဒ္ဒေသ
ဝေဒနာက္ခန္ဓေန ယေ ဓမ္မာ… သညာက္ခန္ဓေန ယေ ဓမ္မာ… သင်္ခါရက္ခန္ဓေန ယေ ဓမ္မာ သမ္ပယုတ္တာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သင်္ဂဟိတာ? တေ ဓမ္မာ တီဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ ဒသဟိ ဓာတူဟိ အသင်္ဂဟိတာ.
ဝိညာဏက္ခန္ဓေန ယေ ဓမ္မာ… မနာယတနေန ယေ ဓမ္မာ… စက္ခုဝိညာဏဓာတုယာ ယေ ဓမ္မာ …ပေ… မနောဓာတုယာ ယေ ဓမ္မာ… မနောဝိညာဏဓာတုယာ ယေ ဓမ္မာ သမ္ပယုတ္တာ …ပေ… တေ ဓမ္မာ တီဟိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.
သမုဒယသစ္စေန ယေ ဓမ္မာ… မဂ္ဂသစ္စေန ယေ ဓမ္မာ သမ္ပယုတ္တာ… တေ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.
မနိန္ဒြိယေန ယေ ဓမ္မာ သမ္ပယုတ္တာ… တေ ဓမ္မာ တီဟိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.
သုခိန္ဒြိယေန ယေ ဓမ္မာ… ဒုက္ခိန္ဒြိယေန ယေ ဓမ္မာ… သောမနဿိန္ဒြိယေန ယေ ဓမ္မာ… ဒေါမနဿိန္ဒြိယေန ယေ ဓမ္မာ သမ္ပယုတ္တာ… , တေ ဓမ္မာ တီဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.
ဥပေက္ခိန္ဒြိယေန ယေ ဓမ္မာ သမ္ပယုတ္တာ… တေ ဓမ္မာ တီဟိ ခန္ဓေဟိ ဒွီဟာယတနေဟိ သတ္တဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ ဧကာဒသဟိ ဓာတူဟိ အသင်္ဂဟိတာ.
သဒ္ဓိန္ဒြိယေန ယေ ဓမ္မာ… ဝီရိယိန္ဒြိယေန ယေ ဓမ္မာ… သတိန္ဒြိယေန ယေ ဓမ္မာ… သမာဓိန္ဒြိယေန ယေ ဓမ္မာ… ပညိန္ဒြိယေန ယေ ဓမ္မာ… အနညာတညဿာမီတိန္ဒြိယေန ယေ ဓမ္မာ… အညိန္ဒြိယေန ယေ ဓမ္မာ… အညာတာဝိန္ဒြိယေန ယေ ဓမ္မာ… အဝိဇ္ဇာယ ယေ ဓမ္မာ… အဝိဇ္ဇာပစ္စယာ သင်္ခါရေဟိ ယေ ဓမ္မာ သမ္ပယုတ္တာ… တေ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.
သင်္ခါရပစ္စယာ ဝိညာဏေန ယေ ဓမ္မာ သမ္ပယုတ္တာ… တေ ဓမ္မာ တီဟိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.
သဠာယတနပစ္စယာ ဖဿေန ယေ ဓမ္မာ သမ္ပယုတ္တာ… တေ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.
ဖဿပစ္စယာ ဝေဒနာယ ယေ ဓမ္မာ သမ္ပယုတ္တာ… တေ ဓမ္မာ တီဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ ဒသဟိ ဓာတူဟိ အသင်္ဂဟိတာ.
ဝေဒနာပစ္စယာ တဏှာယ ယေ ဓမ္မာ… တဏှာပစ္စယာ ဥပါဒါနေန ယေ ဓမ္မာ… ကမ္မဘဝေန ယေ ဓမ္မာ သမ္ပယုတ္တာ… တေ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.
သောကေန ယေ ဓမ္မာ… ဒုက္ခေန ယေ ဓမ္မာ… ဒေါမနဿေန ယေ ဓမ္မာ သမ္ပယုတ္တာ… တေ ဓမ္မာ တီဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.
ဥပါယာသေန ယေ ဓမ္မာ… သတိပဋ္ဌာနေန ယေ ဓမ္မာ… သမ္မပ္ပဓာနေန ယေ ဓမ္မာ သမ္ပယုတ္တာ… တေ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.
ဣဒ္ဓိပါဒေန ယေ ဓမ္မာ သမ္ပယုတ္တာ… တေ ဓမ္မာ တီဟိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.
ဈာနေန ယေ ဓမ္မာ သမ္ပယုတ္တာ… တေ ဓမ္မာ တီဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ သောဠသဟိ ဓာတူဟိ အသင်္ဂဟိတာ.
အပ္ပမညာယ ယေ ဓမ္မာ… ပဉ္စဟိ ဣန္ဒြိယေဟိ ယေ ဓမ္မာ… ပဉ္စဟိ ဗလေဟိ ယေ ဓမ္မာ… သတ္တဟိ ဗောဇ္ဈင်္ဂေဟိ ယေ ဓမ္မာ… အရိယေန အဋ္ဌင်္ဂိကေန မဂ္ဂေန ယေ ဓမ္မာ သမ္ပယုတ္တာ… တေ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.
ဖဿေန ယေ ဓမ္မာ… စေတနာယ ယေ ဓမ္မာ… မနသိကာရေန ယေ ဓမ္မာ သမ္ပယုတ္တာ… တေ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.
ဝေဒနာယ ယေ ဓမ္မာ… သညာယ ယေ ဓမ္မာ သမ္ပယုတ္တာ… တေ ဓမ္မာ တီဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဒသဟာယတနေဟိ ဒသဟိ ဓာတူဟိ အသင်္ဂဟိတာ.
စိတ္တေန ယေ ဓမ္မာ သမ္ပယုတ္တာ… တေ ဓမ္မာ တီဟိ ခန္ဓေဟိ ဧကေနာယတနေန ဧကာယ ဓာတုယာ သင်္ဂဟိတာ. ကတိဟိ အသင်္ဂဟိတာ? ဒွီဟိ ခန္ဓေဟိ ဧကာဒသဟာယတနေဟိ သတ္တရသဟိ ဓာတူဟိ အသင်္ဂဟိတာ.
အဓိမောက္ခေန ယေ ဓမ္မာ သမ္ပယုတ္တာ… တေ ဓမ္မာ စတူဟိ ခန္ဓေဟိ ဒွီဟာယတနေဟိ တီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ပန္နရသဟိ ဓာတူဟိ အသင်္ဂဟိတာ.