13.5.3 အဗျာကတပဒ
သဝိတက္ကံ အဗျာကတံ ဓမ္မံ ပဋိစ္စ သဝိတက္ကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ… တီဏိ.
အဝိတက္ကံ အဗျာကတံ ဓမ္မံ ပဋိစ္စ အဝိတက္ကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ… တီဏိ.
သဝိတက္ကံ အဗျာကတဉ္စ အဝိတက္ကံ အဗျာကတဉ္စ ဓမ္မံ ပဋိစ္စ သဝိတက္ကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ… တီဏိ. (သံခိတ္တံ.)
ဟေတုယာ နဝ, အာရမ္မဏေ နဝ …ပေ… ပုရေဇာတေ အာသေဝနေ ဆ …ပေ… အဝိဂတေ နဝ. (သံခိတ္တံ.)
နဟေတုယာ နဝ, နအာရမ္မဏေ တီဏိ, နအဓိပတိယာ နဝ …ပေ… နပုရေဇာတေ နဝ …ပေ… နကမ္မေ စတ္တာရိ, နဝိပါကေ နဝ, နအာဟာရေ ဧကံ, နဲန္ဒြိယေ ဧကံ, နဈာနေ ဧကံ, နမဂ္ဂေ နဝ, နသမ္ပယုတ္တေ တီဏိ, နဝိပ္ပယုတ္တေ ဆ …ပေ… နောဝိဂတေ တီဏိ. (သံခိတ္တံ. သဟဇာတဝါရမ္ပိ …ပေ… သမ္ပယုတ္တဝါရမ္ပိ ဝိတ္ထာရေတဗ္ဗံ.)
သဝိတက္ကော အဗျာကတော ဓမ္မော သဝိတက္ကဿ အဗျာကတဿ ဓမ္မဿ ဟေတုပစ္စယေန ပစ္စယော… တီဏိ.
အဝိတက္ကော အဗျာကတော ဓမ္မော အဝိတက္ကဿ အဗျာကတဿ ဓမ္မဿ ဟေတုပစ္စယေန ပစ္စယော. (1)
သဝိတက္ကော အဗျာကတော ဓမ္မော သဝိတက္ကဿ အဗျာကတဿ ဓမ္မဿ အာရမ္မဏပစ္စယေန ပစ္စယော. (သံခိတ္တံ.)
ဟေတုယာ စတ္တာရိ, အာရမ္မဏေ နဝ, အဓိပတိယာ နဝ (သဗ္ဗတ္ထ နဝ), ဥပနိဿယေ နဝ, ပုရေဇာတေ တီဏိ, ပစ္ဆာဇာတေ တီဏိ, အာသေဝနေ နဝ, ကမ္မေ စတ္တာရိ, ဝိပါကေ နဝ, အာဟာရေ စတ္တာရိ …ပေ… ဈာနေ နဝ, မဂ္ဂေ နဝ, သမ္ပယုတ္တေ ဆ, ဝိပ္ပယုတ္တေ ပဉ္စ, အတ္ထိယာ နဝ, နတ္ထိယာ နဝ, ဝိဂတေ နဝ, အဝိဂတေ နဝ. (သံခိတ္တံ.)
နဟေတုယာ နဝ, နအာရမ္မဏေ နဝ. (သံခိတ္တံ.)
ဟေတုပစ္စယာ နအာရမ္မဏေ စတ္တာရိ. (သံခိတ္တံ.)
နဟေတုပစ္စယာ အာရမ္မဏေ နဝ. (သံခိတ္တံ.)
(ယထာ ကုသလတ္တိကေ ပဉှာဝါရံ ဧဝံ ဝိတ္ထာရေတဗ္ဗံ.)