17 ကုသလတ္တိက, စေတသိကဒုက
ကုသလံ စေတသိကံ ဓမ္မံ ပဋိစ္စ နကုသလော နစေတသိကော ဓမ္မော ဥပ္ပဇ္ဇတိ ဟေတုပစ္စယာ. ကုသလံ စေတသိကံ ဓမ္မံ ပဋိစ္စ နအကုသလော နစေတသိကော ဓမ္မော ဥပ္ပဇ္ဇတိ ဟေတုပစ္စယာ. ကုသလံ စေတသိကံ ဓမ္မံ ပဋိစ္စ နအဗျာကတော နစေတသိကော ဓမ္မော ဥပ္ပဇ္ဇတိ ဟေတုပစ္စယာ. ကုသလံ စေတသိကံ ဓမ္မံ ပဋိစ္စ နအကုသလော နစေတသိကော စ နအဗျာကတော နစေတသိကော စ ဓမ္မာ ဥပ္ပဇ္ဇန္တိ ဟေတုပစ္စယာ. ကုသလံ စေတသိကံ ဓမ္မံ ပဋိစ္စ နကုသလော နစေတသိကော စ နအကုသလော နစေတသိကော စ ဓမ္မာ ဥပ္ပဇ္ဇန္တိ ဟေတုပစ္စယာ… ပဉ္စ.
အကုသလံ စေတသိကံ ဓမ္မံ ပဋိစ္စ နအကုသလော နစေတသိကော ဓမ္မော ဥပ္ပဇ္ဇတိ ဟေတုပစ္စယာ. အကုသလံ စေတသိကံ ဓမ္မံ ပဋိစ္စ နကုသလော နစေတသိကော ဓမ္မော ဥပ္ပဇ္ဇတိ ဟေတုပစ္စယာ. အကုသလံ စေတသိကံ ဓမ္မံ ပဋိစ္စ နအဗျာကတော နစေတသိကော ဓမ္မော ဥပ္ပဇ္ဇတိ ဟေတုပစ္စယာ. အကုသလံ စေတသိကံ ဓမ္မံ ပဋိစ္စ နကုသလော နစေတသိကော စ နအဗျာကတော နစေတသိကော စ ဓမ္မာ ဥပ္ပဇ္ဇန္တိ ဟေတုပစ္စယာ. အကုသလံ စေတသိကံ ဓမ္မံ ပဋိစ္စ နကုသလော နစေတသိကော စ နအကုသလော နစေတသိကော စ ဓမ္မာ ဥပ္ပဇ္ဇန္တိ ဟေတုပစ္စယာ… ပဉ္စ.
အဗျာကတံ စေတသိကံ ဓမ္မံ ပဋိစ္စ နကုသလော နစေတသိကော ဓမ္မော ဥပ္ပဇ္ဇတိ ဟေတုပစ္စယာ. အဗျာကတံ စေတသိကံ ဓမ္မံ ပဋိစ္စ နအကုသလော နစေတသိကော ဓမ္မော ဥပ္ပဇ္ဇတိ ဟေတုပစ္စယာ. အဗျာကတံ စေတသိကံ ဓမ္မံ ပဋိစ္စ နကုသလော နစေတသိကော စ နအကုသလော နစေတသိကော စ ဓမ္မာ ဥပ္ပဇ္ဇန္တိ ဟေတုပစ္စယာ… တီဏိ. (သံခိတ္တံ.)
ဟေတုယာ တေရသ, အာရမ္မဏေ နဝ …ပေ… ဝိပါကေ တီဏိ …ပေ… အဝိဂတေ တေရသ.
အစေတသိကေ ဟေတုယာ နဝ …ပေ… ဝိပါကေ တီဏိ …ပေ… အဝိဂတေ နဝ.