30 ဂန္ထဂန္ထသမ္ပယုတ္တဒုက
နဂန္ထဉ္စေဝ နဂန္ထဝိပ္ပယုတ္တဉ္စ ဓမ္မံ ပဋိစ္စ နဂန္ထော စေဝ နဂန္ထဝိပ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ. နဂန္ထဉ္စေဝ နဂန္ထဝိပ္ပယုတ္တဉ္စ ဓမ္မံ ပဋိစ္စ နဂန္ထဝိပ္ပယုတ္တော စေဝ နနော စ ဂန္ထော ဓမ္မော ဥပ္ပဇ္ဇတိ ဟေတုပစ္စယာ. နဂန္ထဉ္စေဝ နဂန္ထဝိပ္ပယုတ္တဉ္စ ဓမ္မံ ပဋိစ္စ နဂန္ထော စေဝ နဂန္ထဝိပ္ပယုတ္တော စ နဂန္ထဝိပ္ပယုတ္တော စေဝ နနော စ ဂန္ထော စ ဓမ္မာ ဥပ္ပဇ္ဇန္တိ ဟေတုပစ္စယာ. (3)
နဂန္ထဝိပ္ပယုတ္တဉ္စေဝ နနော စ ဂန္ထံ ဓမ္မံ ပဋိစ္စ နဂန္ထဝိပ္ပယုတ္တော စေဝ နနော စ ဂန္ထော ဓမ္မော ဥပ္ပဇ္ဇတိ ဟေတုပစ္စယာ. နဂန္ထဝိပ္ပယုတ္တဉ္စေဝ နနော စ ဂန္ထံ ဓမ္မံ ပဋိစ္စ နဂန္ထော စေဝ နဂန္ထဝိပ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ. နဂန္ထဝိပ္ပယုတ္တဉ္စေဝ နနော စ ဂန္ထံ ဓမ္မံ ပဋိစ္စ နဂန္ထော စေဝ နဂန္ထဝိပ္ပယုတ္တော စ နဂန္ထဝိပ္ပယုတ္တော စေဝ နနော စ ဂန္ထော စ ဓမ္မာ ဥပ္ပဇ္ဇန္တိ ဟေတုပစ္စယာ. (3)
နဂန္ထဉ္စေဝ နဂန္ထဝိပ္ပယုတ္တဉ္စ နဂန္ထဝိပ္ပယုတ္တဉ္စေဝ နနော စ ဂန္ထဉ္စ ဓမ္မံ ပဋိစ္စ နဂန္ထော စေဝ နဂန္ထဝိပ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ. နဂန္ထဉ္စေဝ နဂန္ထဝိပ္ပယုတ္တဉ္စ နဂန္ထဝိပ္ပယုတ္တဉ္စေဝ နနော စ ဂန္ထဉ္စ ဓမ္မံ ပဋိစ္စ နဂန္ထဝိပ္ပယုတ္တော စေဝ နနော စ ဂန္ထော ဓမ္မော ဥပ္ပဇ္ဇတိ ဟေတုပစ္စယာ. နဂန္ထဉ္စေဝ နဂန္ထဝိပ္ပယုတ္တဉ္စ နဂန္ထဝိပ္ပယုတ္တဉ္စေဝ နနော စ ဂန္ထဉ္စ ဓမ္မံ ပဋိစ္စ နဂန္ထော စေဝ နဂန္ထဝိပ္ပယုတ္တော စ နဂန္ထဝိပ္ပယုတ္တော စေဝ နနော စ ဂန္ထော စ ဓမ္မာ ဥပ္ပဇ္ဇန္တိ ဟေတုပစ္စယာ. (3) (သံခိတ္တံ.)
ဟေတုယာ နဝ …ပေ… အဝိဂတေ နဝ. (သဗ္ဗတ္ထ ဝိတ္ထာရော.)