18.7 အဘိညေယျာဒိဝါရ
ပဉ္စန္နံ ခန္ဓာနံ ကတိ အဘိညေယျာ, ကတိ ပရိညေယျာ, ကတိ ပဟာတဗ္ဗာ, ကတိ ဘာဝေတဗ္ဗာ, ကတိ သစ္ဆိကာတဗ္ဗာ, ကတိ န ပဟာတဗ္ဗာ, န ဘာဝေတဗ္ဗာ, န သစ္ဆိကာတဗ္ဗာ …ပေ… သတ္တန္နံ စိတ္တာနံ ကတိ အဘိညေယျာ, ကတိ ပရိညေယျာ, ကတိ ပဟာတဗ္ဗာ, ကတိ ဘာဝေတဗ္ဗာ, ကတိ သစ္ဆိကာတဗ္ဗာ, ကတိ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ?
ရူပက္ခန္ဓော အဘိညေယျော ပရိညေယျော န ပဟာတဗ္ဗော န ဘာဝေတဗ္ဗော န သစ္ဆိကာတဗ္ဗော. စတ္တာရော ခန္ဓာ အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. (1)
ဒသာယတနာ အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. ဒွေ အာယတနာ အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. (2)
သောဠသ ဓာတုယော အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. ဒွေ ဓာတုယော အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. (3)
သမုဒယသစ္စံ အဘိညေယျံ ပရိညေယျံ ပဟာတဗ္ဗံ န ဘာဝေတဗ္ဗံ န သစ္ဆိကာတဗ္ဗံ. မဂ္ဂသစ္စံ အဘိညေယျံ ပရိညေယျံ န ပဟာတဗ္ဗံ ဘာဝေတဗ္ဗံ န သစ္ဆိကာတဗ္ဗံ. နိရောဓသစ္စံ အဘိညေယျံ ပရိညေယျံ န ပဟာတဗ္ဗံ န ဘာဝေတဗ္ဗံ သစ္ဆိကာတဗ္ဗံ. ဒုက္ခသစ္စံ အဘိညေယျံ ပရိညေယျံ, သိယာ ပဟာတဗ္ဗံ, န ဘာဝေတဗ္ဗံ, န သစ္ဆိကာတဗ္ဗံ, သိယာ န ပဟာတဗ္ဗံ. (4)
နဝိန္ဒြိယာ အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. ဒေါမနဿိန္ဒြိယံ အဘိညေယျံ ပရိညေယျံ ပဟာတဗ္ဗံ န ဘာဝေတဗ္ဗံ န သစ္ဆိကာတဗ္ဗံ. အနညာတညဿာမီတိန္ဒြိယံ အဘိညေယျံ ပရိညေယျံ န ပဟာတဗ္ဗံ ဘာဝေတဗ္ဗံ န သစ္ဆိကာတဗ္ဗံ. အညိန္ဒြိယံ အဘိညေယျံ ပရိညေယျံ န ပဟာတဗ္ဗံ, သိယာ ဘာဝေတဗ္ဗံ, သိယာ သစ္ဆိကာတဗ္ဗံ. အညာတာဝိန္ဒြိယံ အဘိညေယျံ ပရိညေယျံ န ပဟာတဗ္ဗံ န ဘာဝေတဗ္ဗံ သစ္ဆိကာတဗ္ဗံ. တီဏိန္ဒြိယာ အဘိညေယျာ ပရိညေယျာ န ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ဘာဝေတဗ္ဗာ, သစ္ဆိကာတဗ္ဗာ. ဆ ဣန္ဒြိယာ အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. (5)
တယော အကုသလဟေတူ အဘိညေယျာ ပရိညေယျာ ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. တယော ကုသလဟေတူ အဘိညေယျာ ပရိညေယျာ န ပဟာတဗ္ဗာ, သိယာ ဘာဝေတဗ္ဗာ, န သစ္ဆိကာတဗ္ဗာ, သိယာ န ဘာဝေတဗ္ဗာ. တယော အဗျာကတဟေတူ အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န သစ္ဆိကာတဗ္ဗာ. (6)
ကဗဠီကာရော အာဟာရော အဘိညေယျော ပရိညေယျော န ပဟာတဗ္ဗော န ဘာဝေတဗ္ဗော န သစ္ဆိကာတဗ္ဗော. တယော အာဟာရာ အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. (7)
ဆ ဖဿာ အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. မနောဝိညာဏဓာတုသမ္ဖဿော အဘိညေယျော ပရိညေယျော, သိယာ ပဟာတဗ္ဗော, သိယာ ဘာဝေတဗ္ဗော, သိယာ သစ္ဆိကာတဗ္ဗော, သိယာ န ပဟာတဗ္ဗော န ဘာဝေတဗ္ဗော န သစ္ဆိကာတဗ္ဗော. (8)
ဆ ဝေဒနာ …ပေ… ဆ သညာ …ပေ… ဆ စေတနာ …ပေ… ဆ စိတ္တာ အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. မနောဝိညာဏဓာတု အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ. (9–12)