18.8 သာရမ္မဏာနာရမ္မဏဝါရ
ပဉ္စန္နံ ခန္ဓာနံ ကတိ သာရမ္မဏာ, ကတိ အနာရမ္မဏာ …ပေ… သတ္တန္နံ စိတ္တာနံ ကတိ သာရမ္မဏာ, ကတိ အနာရမ္မဏာ?
ရူပက္ခန္ဓော အနာရမ္မဏော. စတ္တာရော ခန္ဓာ သာရမ္မဏာ. (1)
ဒသာယတနာ အနာရမ္မဏာ. မနာယတနံ သာရမ္မဏံ. ဓမ္မာယတနံ သိယာ သာရမ္မဏံ, သိယာ အနာရမ္မဏံ. (2)
ဒသ ဓာတုယော အနာရမ္မဏာ. သတ္တ ဓာတုယော သာရမ္မဏာ. ဓမ္မဓာတု သိယာ သာရမ္မဏာ, သိယာ အနာရမ္မဏာ. (3)
ဒွေ သစ္စာ သာရမ္မဏာ. နိရောဓသစ္စံ အနာရမ္မဏံ. ဒုက္ခသစ္စံ သိယာ သာရမ္မဏံ, သိယာ အနာရမ္မဏံ. (4)
သတ္တိန္ဒြိယာ အနာရမ္မဏာ. စုဒ္ဒသိန္ဒြိယာ သာရမ္မဏာ. ဇီဝိတိန္ဒြိယံ သိယာ သာရမ္မဏံ, သိယာ အနာရမ္မဏံ. နဝ ဟေတူ သာရမ္မဏာ. ကဗဠီကာရော အာဟာရော အနာရမ္မဏော. တယော အာဟာရာ သာရမ္မဏာ. သတ္တ ဖဿာ …ပေ… သတ္တ ဝေဒနာ …ပေ… သတ္တ သညာ …ပေ… သတ္တ စေတနာ …ပေ… သတ္တ စိတ္တာ သာရမ္မဏာ. (5–12)
ပဉ္စန္နံ ခန္ဓာနံ ကတိ သာရမ္မဏာရမ္မဏာ, ကတိ အနာရမ္မဏာရမ္မဏာ …ပေ… သတ္တန္နံ စိတ္တာနံ ကတိ သာရမ္မဏာရမ္မဏာ, ကတိ အနာရမ္မဏာရမ္မဏာ?
ရူပက္ခန္ဓော အနာရမ္မဏော. စတ္တာရော ခန္ဓာ သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ. (1)
ဒသာယတနာ အနာရမ္မဏာ. မနာယတနံ သိယာ သာရမ္မဏာရမ္မဏံ, သိယာ အနာရမ္မဏာရမ္မဏံ. ဓမ္မာယတနံ သိယာ သာရမ္မဏာရမ္မဏံ, သိယာ အနာရမ္မဏာရမ္မဏံ, သိယာ အနာရမ္မဏံ. (2)
ဒသ ဓာတုယော အနာရမ္မဏာ. ဆ ဓာတုယော အနာရမ္မဏာရမ္မဏာ. မနောဝိညာဏဓာတု သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ. ဓမ္မဓာတု သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ, သိယာ အနာရမ္မဏာ. (3)
နိရောဓသစ္စံ အနာရမ္မဏံ. မဂ္ဂသစ္စံ အနာရမ္မဏာရမ္မဏံ. သမုဒယသစ္စံ သိယာ သာရမ္မဏာရမ္မဏံ, သိယာ အနာရမ္မဏာရမ္မဏံ. ဒုက္ခသစ္စံ သိယာ သာရမ္မဏာရမ္မဏံ, သိယာ အနာရမ္မဏာရမ္မဏံ, သိယာ အနာရမ္မဏံ. (4)
သတ္တိန္ဒြိယာ အနာရမ္မဏာ. ပဉ္စိန္ဒြိယာ အနာရမ္မဏာရမ္မဏာ. နဝိန္ဒြိယာ သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ. ဇီဝိတိန္ဒြိယံ သိယာ သာရမ္မဏာရမ္မဏံ, သိယာ အနာရမ္မဏာရမ္မဏံ, သိယာ အနာရမ္မဏံ. (5)
နဝ ဟေတူ သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ. ကဗဠီကာရော အာဟာရော အနာရမ္မဏော. တယော အာဟာရာ သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ. ဆ ဖဿာ အနာရမ္မဏာရမ္မဏာ. မနောဝိညာဏဓာတုသမ္ဖဿော သိယာ သာရမ္မဏာရမ္မဏော သိယာ အနာရမ္မဏာရမ္မဏော. ဆ ဝေဒနာ …ပေ… ဆ သညာ …ပေ… ဆ စေတနာ …ပေ… ဆ စိတ္တာ အနာရမ္မဏာရမ္မဏာ. မနောဝိညာဏဓာတု သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ. (6–12)