18.9 ဒိဋ္ဌသုတာဒိဒဿနဝါရ
ပဉ္စန္နံ ခန္ဓာနံ ကတိ ဒိဋ္ဌာ, ကတိ သုတာ, ကတိ မုတာ, ကတိ ဝိညာတာ, ကတိ န ဒိဋ္ဌာ န သုတာ န မုတာ န ဝိညာတာ …ပေ… သတ္တန္နံ စိတ္တာနံ ကတိ ဒိဋ္ဌာ, ကတိ သုတာ, ကတိ မုတာ, ကတိ ဝိညာတာ, ကတိ န ဒိဋ္ဌာ န သုတာ န မုတာ န ဝိညာတာ?
ရူပက္ခန္ဓော သိယာ ဒိဋ္ဌော, သိယာ သုတော, သိယာ မုတော, သိယာ ဝိညာတော, သိယာ န ဒိဋ္ဌော န သုတော န မုတော, ဝိညာတော. စတ္တာရော ခန္ဓာ န ဒိဋ္ဌာ န သုတာ န မုတာ, ဝိညာတာ.
ရူပါယတနံ ဒိဋ္ဌံ, န သုတံ န မုတံ, ဝိညာတံ. သဒ္ဒါယတနံ န ဒိဋ္ဌံ, သုတံ, န မုတံ, ဝိညာတံ. ဂန္ဓာယတနံ …ပေ… ရသာယတနံ …ပေ… ဖောဋ္ဌဗ္ဗာယတနံ န ဒိဋ္ဌံ န သုတံ, မုတံ, ဝိညာတံ. သတ္တာယတနာ န ဒိဋ္ဌာ န သုတာ န မုတာ, ဝိညာတာ.
ရူပဓာတု ဒိဋ္ဌာ, န သုတာ န မုတာ, ဝိညာတာ. သဒ္ဒဓာတု န ဒိဋ္ဌာ, သုတာ, န မုတာ, ဝိညာတာ. ဂန္ဓဓာတု …ပေ… ရသဓာတု …ပေ… ဖောဋ္ဌဗ္ဗဓာတု န ဒိဋ္ဌာ န သုတာ, မုတာ, ဝိညာတာ. တေရသ ဓာတုယော န ဒိဋ္ဌာ န သုတာ န မုတာ, ဝိညာတာ.
တီဏိ သစ္စာနိ န ဒိဋ္ဌာ န သုတာ န မုတာ, ဝိညာတာ. ဒုက္ခသစ္စံ သိယာ ဒိဋ္ဌံ, သိယာ သုတံ, သိယာ မုတံ, သိယာ ဝိညာတံ, သိယာ န ဒိဋ္ဌံ န သုတံ န မုတံ, ဝိညာတံ.
ဗာဝီသတိန္ဒြိယာ န ဒိဋ္ဌာ န သုတာ န မုတာ, ဝိညာတာ. နဝ ဟေတူ န ဒိဋ္ဌာ န သုတာ န မုတာ, ဝိညာတာ. စတ္တာရော အာဟာရာ န ဒိဋ္ဌာ န သုတာ န မုတာ, ဝိညာတာ. သတ္တ ဖဿာ န ဒိဋ္ဌာ န သုတာ န မုတာ, ဝိညာတာ. သတ္တ ဝေဒနာ …ပေ… သတ္တ သညာ …ပေ… သတ္တ စေတနာ …ပေ… သတ္တ စိတ္တာ န ဒိဋ္ဌာ န သုတာ န မုတာ, ဝိညာတာ.