5.3.1 ပဌမဒီဃစာရိကသုတ္တ
Review
221.
1258
“ပဉ္စိမေ, ဘိက္ခဝေ, အာဒီနဝါ ဒီဃစာရိကံ အနဝတ္ထစာရိကံ အနုယုတ္တဿ ဝိဟရတော. ကတမေ ပဉ္စ? အဿုတံ န သုဏာတိ, သုတံ န ပရိယောဒါပေတိ, သုတေနေကစ္စေန အဝိသာရဒေါ ဟောတိ, ဂါဠှံ ရောဂါတင်္ကံ ဖုသတိ, န စ မိတ္တဝါ ဟောတိ. ဣမေ ခေါ, ဘိက္ခဝေ, ပဉ္စ အာဒီနဝါ ဒီဃစာရိကံ အနဝတ္ထစာရိကံ အနုယုတ္တဿ ဝိဟရတော.
1259
ပဉ္စိမေ, ဘိက္ခဝေ, အာနိသံသာ သမဝတ္ထစာရေ. ကတမေ ပဉ္စ? အဿုတံ သုဏာတိ, သုတံ ပရိယောဒါပေတိ, သုတေနေကစ္စေန ဝိသာရဒေါ ဟောတိ, န ဂါဠှံ ရောဂါတင်္ကံ ဖုသတိ, မိတ္တဝါ စ ဟောတိ. ဣမေ ခေါ, ဘိက္ခဝေ, ပဉ္စ အာနိသံသာ သမဝတ္ထစာရေ”တိ.
1260
ပဌမံ.