5.3.2 ဒုတိယဒီဃစာရိကသုတ္တ
Review
222.
1261
“ပဉ္စိမေ, ဘိက္ခဝေ, အာဒီနဝါ ဒီဃစာရိကံ အနဝတ္ထစာရိကံ အနုယုတ္တဿ ဝိဟရတော. ကတမေ ပဉ္စ? အနဓိဂတံ နာဓိဂစ္ဆတိ, အဓိဂတာ ပရိဟာယတိ, အဓိဂတေနေကစ္စေန အဝိသာရဒေါ ဟောတိ, ဂါဠှံ ရောဂါတင်္ကံ ဖုသတိ, န စ မိတ္တဝါ ဟောတိ. ဣမေ ခေါ, ဘိက္ခဝေ, ပဉ္စ အာဒီနဝါ ဒီဃစာရိကံ အနဝတ္ထစာရိကံ အနုယုတ္တဿ ဝိဟရတော.
1262
ပဉ္စိမေ, ဘိက္ခဝေ, အာနိသံသာ သမဝတ္ထစာရေ. ကတမေ ပဉ္စ? အနဓိဂတံ အဓိဂစ္ဆတိ, အဓိဂတာ န ပရိဟာယတိ, အဓိဂတေနေကစ္စေန ဝိသာရဒေါ ဟောတိ, န ဂါဠှံ ရောဂါတင်္ကံ ဖုသတိ, မိတ္တဝါ စ ဟောတိ. ဣမေ ခေါ, ဘိက္ခဝေ, ပဉ္စ အာနိသံသာ သမဝတ္ထစာရေ”တိ.
1263
ဒုတိယံ.