8.1 ပဉ္စသိခဂီတဂါထာ
ဧကမန္တံ ဌိတော ခေါ ပဉ္စသိခေါ ဂန္ဓဗ္ဗဒေဝပုတ္တော ဗေလုဝပဏ္ဍုဝီဏံ အဿာဝေသိ, ဣမာ စ ဂါထာ အဘာသိ ဗုဒ္ဓူပသဉှိတာ ဓမ္မူပသဉှိတာ သံဃူပသဉှိတာ အရဟန္တူပသဉှိတာ ကာမူပသဉှိတာ—
“ဝန္ဒေ တေ ပိတရံ ဘဒ္ဒေ,
တိမ္ဗရုံ သူရိယဝစ္ဆသေ;
ယေန ဇာတာသိ ကလျာဏီ,
အာနန္ဒဇနနီ မမ.
ဝါတောဝ သေဒတံ ကန္တော,
ပါနီယံဝ ပိပါသတော;
အင်္ဂီရသိ ပိယာမေသိ,
ဓမ္မော အရဟတာမိဝ.
အာတုရဿေဝ ဘေသဇ္ဇံ,
ဘောဇနံဝ ဇိဃစ္ဆတော;
ပရိနိဗ္ဗာပယ မံ ဘဒ္ဒေ,
ဇလန္တမိဝ ဝါရိနာ.
သီတောဒကံ ပေါက္ခရဏိံ,
ယုတ္တံ ကိဉ္ဇက္ခရေဏုနာ;
နာဂေါ ဃမ္မာဘိတတ္တောဝ,
ဩဂါဟေ တေ ထနူဒရံ.
အစ္စင်္ကုသောဝ နာဂေါဝ,
ဇိတံ မေ တုတ္တတောမရံ;
ကာရဏံ နပ္ပဇာနာမိ,
သမ္မတ္တော လက္ခဏူရုယာ.
တယိ ဂေဓိတစိတ္တောသ္မိ,
စိတ္တံ ဝိပရိဏာမိတံ;
ပဋိဂန္တုံ န သက္ကောမိ,
ဝင်္ကဃသ္တောဝ အမ္ဗုဇော.
ဝါမူရု သဇ မံ ဘဒ္ဒေ,
သဇ မံ မန္ဒလောစနေ;
ပလိဿဇ မံ ကလျာဏိ,
ဧတံ မေ အဘိပတ္ထိတံ.
အပ္ပကော ဝတ မေ သန္တော,
ကာမော ဝေလ္လိတကေသိယာ;
အနေကဘာဝေါ သမုပ္ပါဒိ,
အရဟန္တေဝ ဒက္ခိဏာ.
ယံ မေ အတ္ထိ ကတံ ပုညံ,
အရဟန္တေသု တာဒိသု;
တံ မေ သဗ္ဗင်္ဂကလျာဏိ,
တယာ သဒ္ဓိံ ဝိပစ္စတံ.
ယံ မေ အတ္ထိ ကတံ ပုညံ,
အသ္မိံ ပထဝိမဏ္ဍလေ;
တံ မေ သဗ္ဗင်္ဂကလျာဏိ,
တယာ သဒ္ဓိံ ဝိပစ္စတံ.
သကျပုတ္တောဝ ဈာနေန,
ဧကောဒိ နိပကော သတော;
အမတံ မုနိ ဇိဂီသာနော,
တမဟံ သူရိယဝစ္ဆသေ.
ယထာပိ မုနိ နန္ဒေယျ,
ပတွာ သမ္ဗောဓိမုတ္တမံ;
ဧဝံ နန္ဒေယျံ ကလျာဏိ,
မိဿီဘာဝံ ဂတော တယာ.
သက္ကော စေ မေ ဝရံ ဒဇ္ဇာ,
တာဝတိံသာနမိဿရော;
တာဟံ ဘဒ္ဒေ ဝရေယျာဟေ,
ဧဝံ ကာမော ဒဠှော မမ.
သာလံဝ န စိရံ ဖုလ္လံ,
ပိတရံ တေ သုမေဓသေ;
ဝန္ဒမာနော နမဿာမိ,
ယဿာသေတာဒိသီ ပဇာ”တိ.
ဧဝံ ဝုတ္တေ, ဘဂဝါ ပဉ္စသိခံ ဂန္ဓဗ္ဗဒေဝပုတ္တံ ဧတဒဝေါစ— “သံသန္ဒတိ ခေါ တေ, ပဉ္စသိခ, တန္တိဿရော ဂီတဿရေန, ဂီတဿရော စ တန္တိဿရေန; န စ ပန တေ, ပဉ္စသိခ, တန္တိဿရော ဂီတဿရံ အတိဝတ္တတိ, ဂီတဿရော စ တန္တိဿရံ. ကဒါ သံယူဠှာ ပန တေ, ပဉ္စသိခ, ဣမာ ဂါထာ ဗုဒ္ဓူပသဉှိတာ ဓမ္မူပသဉှိတာ သံဃူပသဉှိတာ အရဟန္တူပသဉှိတာ ကာမူပသဉှိတာ”တိ? “ဧကမိဒံ, ဘန္တေ, သမယံ ဘဂဝါ ဥရုဝေလာယံ ဝိဟရတိ နဇ္ဇာ နေရဉ္ဇရာယ တီရေ အဇပါလနိဂြေါဓေ ပဌမာဘိသမ္ဗုဒ္ဓေါ. တေန ခေါ ပနာဟံ, ဘန္တေ, သမယေန ဘဒ္ဒါ နာမ သူရိယဝစ္ဆသာ တိမ္ဗရုနော ဂန္ဓဗ္ဗရညော ဓီတာ, တမဘိကင်္ခါမိ. သာ ခေါ ပန, ဘန္တေ, ဘဂိနီ ပရကာမိနီ ဟောတိ; သိခဏ္ဍီ နာမ မာတလိဿ သင်္ဂါဟကဿ ပုတ္တော, တမဘိကင်္ခတိ. ယတော ခေါ အဟံ, ဘန္တေ, တံ ဘဂိနိံ နာလတ္ထံ ကေနစိ ပရိယာယေန. အထာဟံ ဗေလုဝပဏ္ဍုဝီဏံ အာဒါယ ယေန တိမ္ဗရုနော ဂန္ဓဗ္ဗရညော နိဝေသနံ တေနုပသင်္ကမိံ; ဥပသင်္ကမိတွာ ဗေလုဝပဏ္ဍုဝီဏံ အဿာဝေသိံ, ဣမာ စ ဂါထာ အဘာသိံ ဗုဒ္ဓူပသဉှိတာ ဓမ္မူပသဉှိတာ သံဃူပသဉှိတာ အရဟန္တူပသဉှိတာ ကာမူပသဉှိတာ—
ဝန္ဒေ တေ ပိတရံ ဘဒ္ဒေ,
တိမ္ဗရုံ သူရိယဝစ္ဆသေ;
ယေန ဇာတာသိ ကလျာဏီ,
အာနန္ဒဇနနီ မမ.
…ပေ…
သာလံဝ န စိရံ ဖုလ္လံ,
ပိတရံ တေ သုမေဓသေ;
ဝန္ဒမာနော နမဿာမိ,
ယဿာသေတာဒိသီ ပဇာတိ.
ဧဝံ ဝုတ္တေ, ဘန္တေ, ဘဒ္ဒါ သူရိယဝစ္ဆသာ မံ ဧတဒဝေါစ— ‘န ခေါ မေ, မာရိသ, သော ဘဂဝါ သမ္မုခါ ဒိဋ္ဌော, အပိ စ သုတောယေဝ မေ သော ဘဂဝါ ဒေဝါနံ တာဝတိံသာနံ သုဓမ္မာယံ သဘာယံ ဥပနစ္စန္တိယာ. ယတော ခေါ တွံ, မာရိသ, တံ ဘဂဝန္တံ ကိတ္တေသိ, ဟောတု နော အဇ္ဇ သမာဂမော’တိ. သောယေဝ နော, ဘန္တေ, တဿာ ဘဂိနိယာ သဒ္ဓိံ သမာဂမော အဟောသိ. န စ ဒါနိ တတော ပစ္ဆာ”တိ.