ဒွေပဗ္ဗဇိတဝတ္ထု
ဧဝံ မေ သုတံ— ဧကံ သမယံ ဘဂဝါ ကောသမ္ဗိယံ ဝိဟရတိ ဃောသိတာရာမေ. တေန ခေါ ပန သမယေန ဒွေ ပဗ္ဗဇိတာ— မုဏ္ဍိယော စ ပရိဗ္ဗာဇကော ဇာလိယော စ ဒါရုပတ္တိကန္တေဝါသီ ယေန ဘဂဝါ တေနုပသင်္ကမိံသု; ဥပသင်္ကမိတွာ ဘဂဝတာ သဒ္ဓိံ သမ္မောဒိံသု. သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ အဋ္ဌံသု. ဧကမန္တံ ဌိတာ ခေါ တေ ဒွေ ပဗ္ဗဇိတာ ဘဂဝန္တံ ဧတဒဝေါစုံ— “ကိံ နု ခေါ, အာဝုသော ဂေါတမ, တံ ဇီဝံ တံ သရီရံ, ဥဒါဟု အညံ ဇီဝံ အညံ သရီရန်”တိ?
“တေန ဟာဝုသော, သုဏာထ သာဓုကံ မနသိ ကရောထ, ဘာသိဿာမီ”တိ. “ဧဝမာဝုသော”တိ ခေါ တေ ဒွေ ပဗ္ဗဇိတာ ဘဂဝတော ပစ္စဿောသုံ. ဘဂဝါ ဧတဒဝေါစ— “ဣဓာဝုသော, တထာဂတော လောကေ ဥပ္ပဇ္ဇတိ အရဟံ, သမ္မာသမ္ဗုဒ္ဓေါ …ပေ… ဧဝံ ခေါ, အာဝုသော, ဘိက္ခု သီလသမ္ပန္နော ဟောတိ.
…ပေ… ပဌမံ ဈာနံ ဥပသမ္ပဇ္ဇ ဝိဟရတိ. ယော ခေါ, အာဝုသော, ဘိက္ခု ဧဝံ ဇာနာတိ ဧဝံ ပဿတိ, ကလ္လံ နု ခေါ တဿေတံ ဝစနာယ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါတိ. ယော သော, အာဝုသော, ဘိက္ခု ဧဝံ ဇာနာတိ ဧဝံ ပဿတိ, ကလ္လံ တဿေတံ ဝစနာယ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါတိ. အဟံ ခေါ ပနေတံ, အာဝုသော, ဧဝံ ဇာနာမိ ဧဝံ ပဿာမိ. အထ စ ပနာဟံ န ဝဒါမိ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါ …ပေ… ဒုတိယံ ဈာနံ… တတိယံ ဈာနံ… စတုတ္ထံ ဈာနံ ဥပသမ္ပဇ္ဇ ဝိဟရတိ. ယော ခေါ, အာဝုသော, ဘိက္ခု ဧဝံ ဇာနာတိ ဧဝံ ပဿတိ, ကလ္လံ နု ခေါ တဿေတံ ဝစနာယ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါတိ? ယော သော, အာဝုသော, ဘိက္ခု ဧဝံ ဇာနာတိ ဧဝံ ပဿတိ ကလ္လံ, တဿေတံ ဝစနာယ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါတိ. အဟံ ခေါ ပနေတံ, အာဝုသော, ဧဝံ ဇာနာမိ ဧဝံ ပဿာမိ. အထ စ ပနာဟံ န ဝဒါမိ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါ …ပေ… ဉာဏဒဿနာယ စိတ္တံ အဘိနီဟရတိ အဘိနိန္နာမေတိ… ယော ခေါ, အာဝုသော, ဘိက္ခု ဧဝံ ဇာနာတိ ဧဝံ ပဿတိ, ကလ္လံ နု ခေါ တဿေတံ ဝစနာယ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါတိ. ယော သော, အာဝုသော, ဘိက္ခု ဧဝံ ဇာနာတိ ဧဝံ ပဿတိ ကလ္လံ တဿေတံ ဝစနာယ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါတိ. အဟံ ခေါ ပနေတံ, အာဝုသော, ဧဝံ ဇာနာမိ ဧဝံ ပဿာမိ. အထ စ ပနာဟံ န ဝဒါမိ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါ …ပေ… .
…ပေ… နာပရံ ဣတ္ထတ္တာယာတိ ပဇာနာတိ. ယော ခေါ, အာဝုသော, ဘိက္ခု ဧဝံ ဇာနာတိ ဧဝံ ပဿတိ, ကလ္လံ နု ခေါ တဿေတံ ဝစနာယ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါတိ? ယော သော, အာဝုသော, ဘိက္ခု ဧဝံ ဇာနာတိ ဧဝံ ပဿတိ, န ကလ္လံ တဿေတံ ဝစနာယ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါတိ. အဟံ ခေါ ပနေတံ, အာဝုသော, ဧဝံ ဇာနာမိ ဧဝံ ပဿာမိ. အထ စ ပနာဟံ န ဝဒါမိ— ‘တံ ဇီဝံ တံ သရီရန်’တိ ဝါ ‘အညံ ဇီဝံ အညံ သရီရန်’တိ ဝါ”တိ.
ဣဒမဝေါစ ဘဂဝါ. အတ္တမနာ တေ ဒွေ ပဗ္ဗဇိတာ ဘဂဝတော ဘာသိတံ အဘိနန္ဒုန္တိ.
ဇာလိယသုတ္တံ နိဋ္ဌိတံ သတ္တမံ.