1.1 ဗုဒ္ဓအပဒါန
တထာဂတံ ဇေတဝနေ ဝသန္တံ,
အပုစ္ဆိ ဝေဒေဟမုနီ နတင်္ဂေါ;
“သဗ္ဗညုဗုဒ္ဓါ ကိရ နာမ ဟောန္တိ,
ဘဝန္တိ တေ ဟေတုဘိ ကေဟိ ဝီရ”.
တဒါဟ သဗ္ဗညုဝရော မဟေသီ,
အာနန္ဒဘဒ္ဒံ မဓုရဿရေန;
“ယေ ပုဗ္ဗဗုဒ္ဓေသု ကတာဓိကာရာ,
အလဒ္ဓမောက္ခာ ဇိနသာသနေသု.
တေနေဝ သမ္ဗောဓိမုခေန ဓီရာ,
အဇ္ဈာသယေနာပိ မဟာဗလေန;
ပညာယ တေဇေန သုတိက္ခပညာ,
သဗ္ဗညုဘာဝံ အနုပါပုဏန္တိ.
အဟမ္ပိ ပုဗ္ဗဗုဒ္ဓေသု,
ဗုဒ္ဓတ္တမဘိပတ္ထယိံ;
မနသာယေဝ ဟုတွာန,
ဓမ္မရာဇာ အသင်္ခိယာ.
အထ ဗုဒ္ဓါပဒါနာနိ,
သုဏာထ သုဒ္ဓမာနသာ;
တိံသပါရမိသမ္ပုဏ္ဏာ,
ဓမ္မရာဇာ အသင်္ခိယာ.
သမ္ဗောဓိံ ဗုဒ္ဓသေဋ္ဌာနံ,
သသံဃေ လောကနာယကေ;
ဒသင်္ဂုလီ နမဿိတွာ,
သိရသာ အဘိဝါဒယိံ.
ယာဝတာ ဗုဒ္ဓခေတ္တေသု,
ရတနာ ဝိဇ္ဇန္တိသင်္ခိယာ;
အာကာသဋ္ဌာ စ ဘူမဋ္ဌာ,
မနသာ သဗ္ဗမာဟရိံ.
တတ္ထ ရူပိယဘူမိယံ,
ပါသာဒံ မာပယိံ အဟံ;
နေကဘုမ္မံ ရတနာမယံ,
ဥဗ္ဗိဒ္ဓံ နဘမုဂ္ဂတံ._
ဝိစိတ္တထမ္ဘံ သုကတံ,
သုဝိဘတ္တံ မဟာရဟံ;
ကနကမယသင်္ဃာဋံ,
ကောန္တစ္ဆတ္တေဟိ မဏ္ဍိတံ.
ပဌမာ ဝေဠုရိယာ ဘူမိ,
ဝိမလဗ္ဘသမာ သုဘာ;
နဠိနဇလဇာကိဏ္ဏာ,
ဝရကဉ္စနဘူမိယာ.
ပဝါဠံသာ ပဝါဠဝဏ္ဏာ,
ကာစိ လောဟိတကာ သုဘာ;
ဣန္ဒဂေါပကဝဏ္ဏာဘာ,_
ဘူမိ ဩဘာသတီ ဒိသာ.
သုဝိဘတ္တာ ဃရမုခါ,
နိယျူဟာ သီဟပဉ္ဇရာ;
စတုရော ဝေဒိကာ ဇာလာ,
ဂန္ဓာဝေဠာ မနောရမာ.
နီလာ ပီတာ လောဟိတကာ,
ဩဒါတာ သုဒ္ဓကာဠကာ;
ကူဋာဂါရဝရူပေတာ,
သတ္တရတနဘူသိတာ.
ဩလောကမယာ ပဒုမာ,
ဝါဠဝိဟင်္ဂသောဘိတာ;
နက္ခတ္တတာရကာကိဏ္ဏာ,
စန္ဒသူရေဟိ မဏ္ဍိတာ.
ဟေမဇာလေန သဉ္ဆန္နာ,
သောဏ္ဏကိင်္ကိဏိကာယုတာ;
ဝါတဝေဂေန ကူဇန္တိ,
သောဏ္ဏမာလာ မနောရမာ.
မဉ္ဇေဋ္ဌကံ လောဟိတကံ,
ပီတကံ ဟရိပိဉ္ဇရံ;
နာနာရင်္ဂေဟိ သမ္ပီတံ,
ဥဿိတဒ္ဓဇမာလိနီ._
န နံ ဗဟူနေကသတာ,
ဖလိကာ ရဇတာမယာ;
မဏိမယာ လောဟိတင်္ဂါ,
မသာရဂလ္လမယာ တထာ;
နာနာသယနဝိစိတ္တာ,
သဏှကာသိကသန္ထတာ.
ကမ္ပလာ ဒုကူလာ စီနာ,
ပတ္တုဏ္ဏာ ပဏ္ဍုပါဝုရာ;
ဝိဝိဓတ္ထရဏံ သဗ္ဗံ,
မနသာ ပညပေသဟံ.
တာသု တာသွေဝ ဘူမီသု,
ရတနကူဋလင်္ကတံ;
မဏိဝေရောစနာ ဥက္ကာ,
ဓာရယန္တာ သုတိဋ္ဌရေ.
သောဘန္တိ ဧသိကာ ထမ္ဘာ,
သုဘာ ကဉ္စနတောရဏာ;
ဇမ္ဗောနဒါ သာရမယာ,
အထော ရဇတမယာပိ စ.
နေကာ သန္ဓီ သုဝိဘတ္တာ,
ကဝါဋဂ္ဂဠစိတ္တိတာ;
ဥဘတော ပုဏ္ဏဃဋာနေကာ,_
ပဒုမုပ္ပလသံယုတာ.
အတီတေ သဗ္ဗဗုဒ္ဓေ စ,
သသံဃေ လောကနာယကေ;
ပကတိဝဏ္ဏရူပေန,
နိမ္မိနိတွာ သသာဝကေ.
တေန ဒွါရေန ပဝိသိတွာ,
သဗ္ဗေ ဗုဒ္ဓါ သသာဝကာ;
သဗ္ဗသောဏ္ဏမယေ ပီဌေ,
နိသိန္နာ အရိယမဏ္ဍလာ.
ယေ စ ဧတရဟိ အတ္ထိ,
ဗုဒ္ဓါ လောကေ အနုတ္တရာ;
အတီတေ ဝတ္တမာနာ စ,
ဘဝနံ သဗ္ဗေ သမာရုဟုံ.
ပစ္စေကဗုဒ္ဓေနေကသတေ,
သယမ္ဘူ အပရာဇိတေ;
အတီတေ ဝတ္တမာနေ စ,
ဘဝနံ သဗ္ဗေ သမာရုဟုံ.
ကပ္ပရုက္ခာ ဗဟူ အတ္ထိ,
ယေ ဒိဗ္ဗာ ယေ စ မာနုသာ;
သဗ္ဗံ ဒုဿံ သမာဟန္တွာ,
အစ္ဆာဒေမိ တိစီဝရံ.
ခဇ္ဇံ ဘောဇ္ဇံ သာယနီယံ,
သမ္ပန္နံ ပါနဘောဇနံ;
မဏိမယေ သုဘေ ပတ္တေ,
သမ္ပူရေတွာ အဒါသဟံ.
ဒိဗ္ဗဝတ္ထသမာ ဟုတွာ,
မဋ္ဌာ စီဝရသံယုတာ;
မဓုရာ သက္ခရာ စေဝ,
တေလာ စ မဓုဖာဏိတာ.
တပ္ပိတာ ပရမန္နေန,
သဗ္ဗေ တေ အရိယမဏ္ဍလာ;
ရတနဂဗ္ဘံ ပဝိသိတွာ,
ကေသရီဝ ဂုဟာသယာ.
မဟာရဟမှိ သယနေ,
သီဟသေယျမကပ္ပယုံ;
သမ္ပဇာနာ သမုဋ္ဌာယ,
သယနေ ပလ္လင်္ကမာဘုဇုံ.
ဂေါစရံ သဗ္ဗဗုဒ္ဓါနံ,
ဈာနရတိသမပ္ပိတာ;
အညေ ဓမ္မာနိ ဒေသေန္တိ,
အညေ ကီဠန္တိ ဣဒ္ဓိယာ.
အညေ အဘိညာ အပ္ပေန္တိ,
အဘိညာ ဝသိဘာဝိတာ;
ဝိကုဗ္ဗနာ ဝိကုဗ္ဗန္တိ,
အညေနေကသဟဿိယော.
ဗုဒ္ဓါပိ ဗုဒ္ဓေ ပုစ္ဆန္တိ,
ဝိသယံ သဗ္ဗညုမာလယံ;
ဂမ္ဘီရံ နိပုဏံ ဌာနံ,
ပညာယ ဝိနိဗုဇ္ဈရေ.
သာဝကာ ဗုဒ္ဓေ ပုစ္ဆန္တိ,
ဗုဒ္ဓါ ပုစ္ဆန္တိ သာဝကေ;
အညမညဉ္စ ပုစ္ဆိတွာ,
အညောညံ ဗျာကရောန္တိ တေ.
ဗုဒ္ဓါ ပစ္စေကဗုဒ္ဓါ စ,
သာဝကာ ပရိစာရကာ;
ဧဝံ သကာယ ရတိယာ,
ပါသာဒေဘိရမန္တိ တေ.
ဆတ္တာ တိဋ္ဌန္တု ရတနာ,
ကဉ္စနာဝေဠပန္တိကာ;
မုတ္တာဇာလပရိက္ခိတ္တာ,
သဗ္ဗေ ဓာရေန္တု မတ္ထကေ.
ဘဝန္တု စေဠဝိတာနာ,
သောဏ္ဏတာရကစိတ္တိတာ;
ဝိစိတ္တမလျဝိတတာ,
သဗ္ဗေ ဓာရေန္တု မတ္ထကေ.
ဝိတတာ မလျဒါမေဟိ,
ဂန္ဓဒါမေဟိ သောဘိတာ;
ဒုဿဒါမပရိကိဏ္ဏာ,
ရတနဒါမဘူသိတာ.
ပုပ္ဖါဘိကိဏ္ဏာ သုစိတ္တာ,
သုရဘိဂန္ဓဘူသိတာ;
ဂန္ဓပဉ္စင်္ဂုလကတာ,
ဟေမစ္ဆဒနဆာဒိတာ.
စတုဒ္ဒိသာ ပေါက္ခရညော,
ပဒုမုပ္ပလသန္ထတာ;
သောဝဏ္ဏရူပါ ခါယန္တု,
ပဒ္မရေဏုရဇုဂ္ဂတာ.
ပုပ္ဖန္တု ပါဒပါ သဗ္ဗေ,
ပါသာဒဿ သမန္တတော;
သယဉ္စ ပုပ္ဖါ မုဉ္စိတွာ,
ဂန္တွာ ဘဝနမောကိရုံ.
သိခိနော တတ္ထ နစ္စန္တု,
ဒိဗ္ဗဟံသာ ပကူဇရေ;
ကရဝီကာ စ ဂါယန္တု,
ဒိဇသင်္ဃာ သမန္တတော.
ဘေရိယော သဗ္ဗာ ဝဇ္ဇန္တု,
ဝီဏာ သဗ္ဗာ ရသန္တု တာ;
သဗ္ဗာ သင်္ဂီတိ ဝတ္တန္တု,
ပါသာဒဿ သမန္တတော.
ယာဝတာ ဗုဒ္ဓခေတ္တမှိ,
စက္ကဝါဠေ တတော ပရေ;
မဟန္တာ ဇောတိသမ္ပန္နာ,
အစ္ဆိန္နာ ရတနာမယာ.
တိဋ္ဌန္တု သောဏ္ဏပလ္လင်္ကာ,
ဒီပရုက္ခာ ဇလန္တု တေ;
ဘဝန္တု ဧကပဇ္ဇောတာ,
ဒသသဟဿိပရမ္ပရာ.
ဂဏိကာ လာသိကာ စေဝ,
နစ္စန္တု အစ္ဆရာဂဏာ;
နာနာရင်္ဂါ ပဒိဿန္တု,
ပါသာဒဿ သမန္တတော.
ဒုမဂ္ဂေ ပဗ္ဗတဂ္ဂေ ဝါ,
သိနေရုဂိရိမုဒ္ဓနိ;
ဥဿာပေမိ ဓဇံ သဗ္ဗံ,_
ဝိစိတ္တံ ပဉ္စဝဏ္ဏိကံ.
နရာ နာဂါ စ ဂန္ဓဗ္ဗာ,
သဗ္ဗေ ဒေဝါ ဥပေန္တု တေ;
နမဿန္တာ ပဉ္ဇလိကာ,
ပါသာဒံ ပရိဝါရယုံ.
ယံ ကိဉ္စိ ကုသလံ ကမ္မံ,
ကတ္တဗ္ဗံ ကိရိယံ မမ;
ကာယေန ဝါစာ မနသာ,
တိဒသေ သုကတံ ကတံ.
ယေ သတ္တာ သညိနော အတ္ထိ,
ယေ စ သတ္တာ အသညိနော;
ကတံ ပုညဖလံ မယှံ,
သဗ္ဗေ ဘာဂီ ဘဝန္တု တေ.
ယေသံ ကတံ သုဝိဒိတံ,
ဒိန္နံ ပုညဖလံ မယာ;
ယေ စ တတ္ထ န ဇာနန္တိ,
ဒေဝါ ဂန္တွာ နိဝေဒယုံ.
သဗ္ဗလောကမှိ ယေ သတ္တာ,
ဇီဝန္တာဟာရဟေတုကာ;
မနုညံ ဘောဇနံ သဗ္ဗံ,
လဘန္တု မမ စေတသာ.
မနသာ ဒါနံ မယာ ဒိန္နံ,
မနသာ ပသာဒမာဝဟိံ;
ပူဇိတာ သဗ္ဗသမ္ဗုဒ္ဓါ,
ပစ္စေကာ ဇိနသာဝကာ.
တေန ကမ္မေန သုကတေန,
စေတနာပဏိဓီဟိ စ;
ဇဟိတွာ မာနုသံ ဒေဟံ,
တာဝတိံသမဂစ္ဆဟံ.
ဒုဝေ ဘဝေ ပဇာနာမိ,
ဒေဝတ္တေ အထ မာနုသေ;
အညံ ဂတိံ န ဇာနာမိ,
မနသာ ပတ္ထနာဖလံ.
ဒေဝါနံ အဓိကော ဟောမိ,
ဘဝါမိ မနုဇာဓိပေါ;
ရူပလက္ခဏသမ္ပန္နော,
ပညာယ အသမော ဘဝေ.
ဘောဇနံ ဝိဝိဓံ သေဋ္ဌံ,
ရတနဉ္စ အနပ္ပကံ;
ဝိဝိဓာနိ စ ဝတ္ထာနိ,
နဘာ ခိပ္ပံ ဥပေန္တိ မံ.
ပထဗျာ ပဗ္ဗတေ စေဝ,
အာကာသေ ဥဒကေ ဝနေ;
ယံ ယံ ဟတ္ထံ ပသာရေမိ,
ဒိဗ္ဗာ ဘက္ခာ ဥပေန္တိ မံ.
ပထဗျာ ပဗ္ဗတေ စေဝ,
အာကာသေ ဥဒကေ ဝနေ;
ယံ ယံ ဟတ္ထံ ပသာရေမိ,
ရတနာ သဗ္ဗေ ဥပေန္တိ မံ.
ပထဗျာ ပဗ္ဗတေ စေဝ,
အာကာသေ ဥဒကေ ဝနေ;
ယံ ယံ ဟတ္ထံ ပသာရေမိ,
သဗ္ဗေ ဂန္ဓာ ဥပေန္တိ မံ.
ပထဗျာ ပဗ္ဗတေ စေဝ,
အာကာသေ ဥဒကေ ဝနေ;
ယံ ယံ ဟတ္ထံ ပသာရေမိ,
သဗ္ဗေ ယာနာ ဥပေန္တိ မံ.
ပထဗျာ ပဗ္ဗတေ စေဝ,
အာကာသေ ဥဒကေ ဝနေ;
ယံ ယံ ဟတ္ထံ ပသာရေမိ,
သဗ္ဗေ မာလာ ဥပေန္တိ မံ.
ပထဗျာ ပဗ္ဗတေ စေဝ,
အာကာသေ ဥဒကေ ဝနေ;
ယံ ယံ ဟတ္ထံ ပသာရေမိ,
အလင်္ကာရာ ဥပေန္တိ မံ.
ပထဗျာ ပဗ္ဗတေ စေဝ,
အာကာသေ ဥဒကေ ဝနေ;
ယံ ယံ ဟတ္ထံ ပသာရေမိ,
သဗ္ဗာ ကညာ ဥပေန္တိ မံ.
ပထဗျာ ပဗ္ဗတေ စေဝ,
အာကာသေ ဥဒကေ ဝနေ;
ယံ ယံ ဟတ္ထံ ပသာရေမိ,
မဓုသက္ခရာ ဥပေန္တိ မံ.
ပထဗျာ ပဗ္ဗတေ စေဝ,
အာကာသေ ဥဒကေ ဝနေ;
ယံ ယံ ဟတ္ထံ ပသာရေမိ,
သဗ္ဗေ ခဇ္ဇာ ဥပေန္တိ မံ.
အဓနေ အဒ္ဓိကဇနေ,
ယာစကေ စ ပထာဝိနော;
ဒဒါမိဟံ ဒါနဝရံ,
သမ္ဗောဓိဝရပတ္တိယာ.
နာဒေန္တော ပဗ္ဗတံ သေလံ,
ဂဇ္ဇေန္တော ဗဟလံ ဂိရိံ;
သဒေဝကံ ဟာသယန္တော,
ဗုဒ္ဓေါ လောကေ ဘဝါမဟံ.
ဒိသာ ဒသဝိဓာ လောကေ,
ယာယတော နတ္ထိ အန္တကံ;
တသ္မိဉ္စ ဒိသာဘာဂမှိ,
ဗုဒ္ဓခေတ္တာ အသင်္ခိယာ.
ပဘာ ပကိတ္တိတာ မယှံ,
ယမကာ ရံသိဝါဟနာ;
ဧတ္ထန္တရေ ရံသိဇာလံ,
အာလောကော ဝိပုလော ဘဝေ.
ဧတ္တကေ လောကဓာတုမှိ,
သဗ္ဗေ ပဿန္တု မံ ဇနာ;
သဗ္ဗေ မံ အနုဝတ္တန္တု,
ယာဝ ဗြဟ္မနိဝေသနံ.
ဝိသိဋ္ဌမဓုနာဒေန,
အမတဘေရိမာဟနိံ;
ဧတ္ထန္တရေ ဇနာ သဗ္ဗေ,
သုဏန္တု မဓုရံ ဂိရံ.
ဓမ္မမေဃေန ဝဿန္တေ,
သဗ္ဗေ ဟောန္တု အနာသဝါ;
ယေတ္ထ ပစ္ဆိမကာ သတ္တာ,
သောတာပန္နာ ဘဝန္တု တေ.
ဒတွာ ဒါတဗ္ဗကံ ဒါနံ,
သီလံ ပူရေတွာ အသေသတော;
နေက္ခမ္မပါရမိံ ဂန္တွာ,
ပတ္တော သမ္ဗောဓိမုတ္တမံ.
ပဏ္ဍိတေ ပရိပုစ္ဆိတွာ,
ကတွာ ဝီရိယမုတ္တမံ;
ခန္တိယာ ပါရမိံ ဂန္တွာ,
ပတ္တော သမ္ဗောဓိမုတ္တမံ.
ကတွာ ဒဠှမဓိဋ္ဌာနံ,
သစ္စပါရမိ ပူရိယ;
မေတ္တာယ ပါရမိံ ဂန္တွာ,
ပတ္တော သမ္ဗောဓိမုတ္တမံ.
လာဘာလာဘေ သုခေ ဒုက္ခေ,
သမ္မာနေ စာဝမာနနေ;
သဗ္ဗတ္ထ သမကော ဟုတွာ,
ပတ္တော သမ္ဗောဓိမုတ္တမံ.
ကောသဇ္ဇံ ဘယတော ဒိသွာ,
ဝီရိယဉ္စာပိ ခေမတော;
အာရဒ္ဓဝီရိယာ ဟောထ,
ဧသာ ဗုဒ္ဓါနုသာသနီ.
ဝိဝါဒံ ဘယတော ဒိသွာ,
အဝိဝါဒဉ္စ ခေမတော;
သမဂ္ဂါ သခိလာ ဟောထ,
ဧသာ ဗုဒ္ဓါနုသာသနီ.
ပမာဒံ ဘယတော ဒိသွာ,
အပ္ပမာဒဉ္စ ခေမတော;
ဘာဝေထဋ္ဌင်္ဂိကံ မဂ္ဂံ,
ဧသာ ဗုဒ္ဓါနုသာသနီ.
သမာဂတာ ဗဟူ ဗုဒ္ဓါ,
အရဟန္တာ စ သဗ္ဗသော;
သမ္ဗုဒ္ဓေ အရဟန္တေ စ,
ဝန္ဒမာနာ နမဿထ.
ဧဝံ အစိန္တိယာ ဗုဒ္ဓါ,
ဗုဒ္ဓဓမ္မာ အစိန္တိယာ;
အစိန္တိယေ ပသန္နာနံ,
ဝိပါကော ဟောတိ အစိန္တိယော”.
ဣတ္ထံ သုဒံ ဘဂဝါ အတ္တနော ဗုဒ္ဓစရိယံ သမ္ဘာဝယမာနော ဗုဒ္ဓါပဒါနိယံ နာမ ဓမ္မပရိယာယံ အဘာသိတ္ထာတိ.
ဗုဒ္ဓါပဒါနံ သမတ္တံ.