1.10 ပိဏ္ဍောလဘာရဒွါဇတ္ထေရအပဒါန
“ပဒုမုတ္တရော နာမ ဇိနော,
သယမ္ဘူ အဂ္ဂပုဂ္ဂလော;
ပုရတော ဟိမဝန္တဿ,
စိတ္တကူဋေ ဝသီ တဒါ.
အဘီတရူပေါ တတ္ထာသိံ,
မိဂရာဇာ စတုက္ကမော;
တဿ သဒ္ဒံ သုဏိတွာန,
ဝိက္ခမ္ဘန္တိ ဗဟုဇ္ဇနာ.
သုဖုလ္လံ ပဒုမံ ဂယှ,
ဥပဂစ္ဆိံ နရာသဘံ;_
ဝုဋ္ဌိတဿ သမာဓိမှာ,
ဗုဒ္ဓဿ အဘိရောပယိံ.
စတုဒ္ဒိသံ နမဿိတွာ,
ဗုဒ္ဓသေဋ္ဌံ နရုတ္တမံ;
သကံ စိတ္တံ ပသာဒေတွာ,
သီဟနာဒံ နဒိံ အဟံ.
ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
သကာသနေ နိသီဒိတွာ,
ဣမာ ဂါထာ အဘာသထ._
ဗုဒ္ဓဿ ဂိရမညာယ,
သဗ္ဗေ ဒေဝါ သမာဂတာ;
‘အာဂတော ဝဒတံ သေဋ္ဌော,
ဓမ္မံ သောဿာမ တံ မယံ’.
တေသံ ဟာသပရေတာနံ,
ပုရတော လောကနာယကော;
မမ သဒ္ဒံ ပကိတ္တေသိ,
ဒီဃဒဿီ မဟာမုနိ.
ယေနိဒံ ပဒုမံ ဒိန္နံ,
သီဟနာဒေါ စ နာဒိတော;
တမဟံ ကိတ္တယိဿာမိ,
သုဏာထ မမ ဘာသတော.
ဣတော အဋ္ဌမကေ ကပ္ပေ,_
စက္ကဝတ္တီ ဘဝိဿတိ;
သတ္တရတနသမ္ပန္နော,
စတုဒီပမှိ ဣဿရော.
ကာရယိဿတိ ဣဿရိယံ,
မဟိယာ စတုသဋ္ဌိယာ;
ပဒုမော နာမ နာမေန,
စက္ကဝတ္တီ မဟဗ္ဗလော.
ကပ္ပသတသဟဿမှိ,
ဩက္ကာကကုလသမ္ဘဝေါ;
ဂေါတမော နာမ ဂေါတ္တေန,
သတ္ထာ လောကေ ဘဝိဿတိ.
ပကာသိတေ ပါဝစနေ,
ဗြဟ္မဗန္ဓု ဘဝိဿတိ;
ဗြဟ္မညာ အဘိနိက္ခမ္မ,
ပဗ္ဗဇိဿတိ တာဝဒေ.
ပဓာနပဟိတတ္တော သော,
ဥပသန္တော နိရူပဓိ;_
သဗ္ဗာသဝေ ပရိညာယ,
နိဗ္ဗာယိဿတိနာသဝေါ.
ဝိဇနေ ပန္တသေယျမှိ,
ဝါဠမိဂသမာကုလေ;
သဗ္ဗာသဝေ ပရိညာယ,
နိဗ္ဗာယိဿတိနာသဝေါ.
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ပိဏ္ဍောလဘာရဒွါဇော ထေရော ဣမာ ဂါထာယော အဘာသိတ္ထာတိ.
ပိဏ္ဍောလဘာရဒွါဇတ္ထေရဿာပဒါနံ အဋ္ဌမံ.