10.1 သုဓာပိဏ္ဍိယတ္ထေရအပဒါန
Review
1.
1765
“ပူဇာရဟေ ပူဇယတော,
ဗုဒ္ဓေ ယဒိ ဝ သာဝကေ;
ပပဉ္စသမတိက္ကန္တေ,
တိဏ္ဏသောကပရိဒ္ဒဝေ.
2.
1766
တေ တာဒိသေ ပူဇယတော,
နိဗ္ဗုတေ အကုတောဘယေ;
န သက္ကာ ပုညံ သင်္ခါတုံ,
ဣမေတ္တမပိ ကေနစိ._
3.
1767
စတုန္နမပိ ဒီပါနံ,
ဣဿရံ ယောဓ ကာရယေ;_
ဧကိဿာ ပူဇနာယေတံ,
ကလံ နာဂ္ဃတိ သောဠသိံ.
4.
1768
သိဒ္ဓတ္ထဿ နရဂ္ဂဿ,
စေတိယေ ဖလိတန္တရေ;
သုဓာပိဏ္ဍော မယာ ဒိန္နော,
ဝိပ္ပသန္နေန စေတသာ.
5.
1769
စတုန္နဝုတိတော ကပ္ပေ,
ယံ ကမ္မမကရိံ တဒါ;
ဒုဂ္ဂတိံ နာဘိဇာနာမိ,
ပဋိသင်္ခါရဿိဒံ ဖလံ.
6.
1770
ဣတော တိံသတိကပ္ပမှိ,_
ပဋိသင်္ခါရသဝှယာ;
သတ္တရတနသမ္ပန္နာ,
တေရသ စက္ကဝတ္တိနော.
7.
1771
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
1772
ဣတ္ထံ သုဒံ အာယသ္မာ သုဓာပိဏ္ဍိယော ထေရော ဣမာ ဂါထာယော အဘာသိတ္ထာတိ.
1773
သုဓာပိဏ္ဍိယတ္ထေရဿာပဒါနံ ပဌမံ.