11.7 နဠမာလိယတ္ထေရအပဒါန
“ပဒုမုတ္တရဗုဒ္ဓဿ,
လောကဇေဋ္ဌဿ တာဒိနော;
တိဏတ္ထရေ နိသိန္နဿ,
ဥပသန္တဿ တာဒိနော._
နဠမာလံ ဂဟေတွာန,
ဗန္ဓိတွာ ဗီဇနိံ အဟံ;
ဗုဒ္ဓဿ ဥပနာမေသိံ,
ဒွိပဒိန္ဒဿ တာဒိနော.
ပဋိဂ္ဂဟေတွာ သဗ္ဗညူ,
ဗီဇနိံ လောကနာယကော;
မမ သင်္ကပ္ပမညာယ,
ဣမံ ဂါထံ အဘာသထ._
‘ယထာ မေ ကာယော နိဗ္ဗာတိ,
ပရိဠာဟော န ဝိဇ္ဇတိ;
တထေဝ တိဝိဓဂ္ဂီဟိ,
စိတ္တံ တဝ ဝိမုစ္စတု’.
သဗ္ဗေ ဒေဝါ သမာဂစ္ဆုံ,
ယေ ကေစိ ဝနနိဿိတာ;
သောဿာမ ဗုဒ္ဓဝစနံ,
ဟာသယန္တဉ္စ ဒါယကံ.
နိသိန္နော ဘဂဝါ တတ္ထ,
ဒေဝသင်္ဃပုရက္ခတော;
ဒါယကံ သမ္ပဟံသေန္တော,
ဣမာ ဂါထာ အဘာသထ._
‘ဣမိနာ ဗီဇနိဒါနေန,
စိတ္တဿ ပဏိဓီဟိ စ;
သုဗ္ဗတော နာမ နာမေန,
စက္ကဝတ္တီ ဘဝိဿတိ.
တေန ကမ္မာဝသေသေန,
သုက္ကမူလေန စောဒိတော;
မာလုတော နာမ နာမေန,
စက္ကဝတ္တီ ဘဝိဿတိ’.
ဣမိနာ ဗီဇနိဒါနေန,_
သမ္မာနဝိပုလေန စ;
ကပ္ပသတသဟဿမ္ပိ,
ဒုဂ္ဂတိံ နုပပဇ္ဇတိ.
တိံသကပ္ပသဟဿမှိ,
သုဗ္ဗတာ အဋ္ဌတိံသ တေ;
ဧကူနတိံသသဟဿေ,
အဋ္ဌ မာလုတနာမကာ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ နဠမာလိယော ထေရော ဣမာ ဂါထာယော အဘာသိတ္ထာတိ.
နဠမာလိယတ္ထေရဿာပဒါနံ သတ္တမံ.
သတ္တမဘာဏဝါရံ.