12.7 ဗုဒ္ဓသညကတ္ထေရအပဒါန
“ယဒါ ဝိပဿီ လောကဂ္ဂေါ,
အာယုသင်္ခါရမောဿဇိ;
ပထဝီ သမ္ပကမ္ပိတ္ထ,
မေဒနီ ဇလမေခလာ.
ဩတတံ ဝိတ္ထတံ မယှံ,
သုဝိစိတ္တဝဋံသကံ;
ဘဝနမ္ပိ ပကမ္ပိတ္ထ,
ဗုဒ္ဓဿ အာယုသင်္ခယေ.
တာသော မယှံ သမုပ္ပန္နော,
ဘဝနေ သမ္ပကမ္ပိတေ;
ဥပ္ပါဒေါ နု ကိမတ္ထာယ,_
အာလောကော ဝိပုလော အဟု.
ဝေဿဝဏော ဣဓာဂမ္မ,
နိဗ္ဗာပေသိ မဟာဇနံ;
ပါဏဘူတေ ဘယံ နတ္ထိ,
ဧကဂ္ဂါ ဟောထ သံဝုတာ.
အဟော ဗုဒ္ဓါ အဟော ဓမ္မာ,
အဟော နော သတ္ထု သမ္ပဒါ;
ယသ္မိံ ဥပ္ပဇ္ဇမာနမှိ,
ပထဝီ သမ္ပကမ္ပတိ.
ဗုဒ္ဓါနုဘာဝံ ကိတ္တေတွာ,
ကပ္ပံ သဂ္ဂမှိ မောဒဟံ;
အဝသေသေသု ကပ္ပေသု,
ကုသလံ စရိတံ မယာ.
ဧကနဝုတိတော ကပ္ပေ,
ယံ သညမလဘိံ တဒါ;
ဒုဂ္ဂတိံ နာဘိဇာနာမိ,
ဗုဒ္ဓသညာယိဒံ ဖလံ.
ဣတော စုဒ္ဒသကပ္ပမှိ,_
ရာဇာ အာသိံ ပတာပဝါ;
သမိတော နာမ နာမေန,
စက္ကဝတ္တီ မဟဗ္ဗလော.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဗုဒ္ဓသညကော ထေရော ဣမာ ဂါထာယော အဘာသိတ္ထာတိ.
ဗုဒ္ဓသညကတ္ထေရဿာပဒါနံ သတ္တမံ.