12.9 ပစ္စုပဋ္ဌာနသညကတ္ထေရအပဒါန
“အတ္ထဒဿိမှိ သုဂတေ,
နိဗ္ဗုတေ သမနန္တရာ;
ယက္ခယောနိံ ဥပပဇ္ဇိံ,
ယသံ ပတ္တော စဟံ တဒါ.
ဒုလ္လဒ္ဓံ ဝတ မေ အာသိ,
ဒုပ္ပဘာတံ ဒုရုဋ္ဌိတံ;
ယံ မေ ဘောဂေ ဝိဇ္ဇမာနေ,
ပရိနိဗ္ဗာယိ စက္ခုမာ.
မမ သင်္ကပ္ပမညာယ,
သာဂရော နာမ သာဝကော;
မမုဒ္ဓရိတုကာမော သော,
အာဂစ္ဆိ မမ သန္တိကံ.
ကိံ နု သောစသိ မာ ဘာယိ,
စရ ဓမ္မံ သုမေဓသ;
အနုပ္ပဒိန္နာ ဗုဒ္ဓေန,
သဗ္ဗေသံ ဗီဇသမ္ပဒါ.
ယော စေ ပူဇေယျ သမ္ဗုဒ္ဓံ,
တိဋ္ဌန္တံ လောကနာယကံ;
ဓာတုံ သာသပမတ္တမ္ပိ,
နိဗ္ဗုတဿာပိ ပူဇယေ.
သမေ စိတ္တပ္ပသာဒမှိ,
သမံ ပုညံ မဟဂ္ဂတံ;
တသ္မာ ထူပံ ကရိတွာန,
ပူဇေဟိ ဇိနဓာတုယော.
သာဂရဿ ဝစော သုတွာ,
ဗုဒ္ဓထူပံ အကာသဟံ;
ပဉ္စဝဿေ ပရိစရိံ,
မုနိနော ထူပမုတ္တမံ.
တေန ကမ္မေန ဒွိပဒိန္ဒ,
လောကဇေဋ္ဌ နရာသဘ;
သမ္ပတ္တိံ အနုဘောတွာန,
အရဟတ္တမပါပုဏိံ.
ဘူရိပညာ စ စတ္တာရော,
သတ္တကပ္ပသတေ ဣတော;
သတ္တရတနသမ္ပန္နာ,
စက္ကဝတ္တီ မဟဗ္ဗလာ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ပစ္စုပဋ္ဌာနသညကော ထေရော ဣမာ ဂါထာယော အဘာသိတ္ထာတိ.
ပစ္စုပဋ္ဌာနသညကတ္ထေရဿာပဒါနံ နဝမံ.