13.9 ဂဏ္ဌိပုပ္ဖိယတ္ထေရအပဒါန
Review
91.
2160
“သုဝဏ္ဏဝဏ္ဏော သမ္ဗုဒ္ဓေါ,
ဝိပဿီ ဒက္ခိဏာရဟော;
ပုရက္ခတော သာဝကေဟိ,
အာရာမာ အဘိနိက္ခမိ.
92.
2161
ဒိသွာနဟံ ဗုဒ္ဓသေဋ္ဌံ,
သဗ္ဗညုံ တမနာသကံ;
ပသန္နစိတ္တော သုမနော,
ဂဏ္ဌိပုပ္ဖံ အပူဇယိံ.
93.
2162
တေန စိတ္တပ္ပသာဒေန,
ဒွိပဒိန္ဒဿ တာဒိနော;
ဟဋ္ဌော ဟဋ္ဌေန စိတ္တေန,
ပုန ဝန္ဒိံ တထာဂတံ.
94.
2163
ဧကနဝုတိတော ကပ္ပေ,
ယံ ပုပ္ဖမဘိရောပယိံ;
ဒုဂ္ဂတိံ နာဘိဇာနာမိ,
ဗုဒ္ဓပူဇာယိဒံ ဖလံ.
95.
2164
ဧကတာလီသိတော ကပ္ပေ,
စရဏော နာမ ခတ္တိယော;
သတ္တရတနသမ္ပန္နော,
စက္ကဝတ္တီ မဟဗ္ဗလော.
96.
2165
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
2166
ဣတ္ထံ သုဒံ အာယသ္မာ ဂဏ္ဌိပုပ္ဖိယော ထေရော ဣမာ ဂါထာယော အဘာသိတ္ထာတိ.
2167
ဂဏ္ဌိပုပ္ဖိယတ္ထေရဿာပဒါနံ နဝမံ.