14.3 စန္ဒနပူဇနကတ္ထေရအပဒါန
“စန္ဒဘာဂါနဒီတီရေ,
အဟောသိံ ကိန္နရော တဒါ;
ပုပ္ဖဘက္ခော စဟံ အာသိံ,
ပုပ္ဖါနိဝသနော တထာ.
အတ္ထဒဿီ တု ဘဂဝါ,
လောကဇေဋ္ဌော နရာသဘော;
ဝိပိနဂ္ဂေန နိယျာသိ,
ဟံသရာဇာဝ အမ္ဗရေ.
နမော တေ ပုရိသာဇည,
စိတ္တံ တေ သုဝိသောဓိတံ;
ပသန္နမုခဝဏ္ဏောသိ,
ဝိပ္ပသန္နမုခိန္ဒြိယော.
ဩရောဟိတွာန အာကာသာ,
ဘူရိပညော သုမေဓသော;
သင်္ဃာဋိံ ပတ္ထရိတွာန,
ပလ္လင်္ကေန ဥပါဝိသိ.
ဝိလီနံ စန္ဒနာဒါယ,
အဂမာသိံ ဇိနန္တိကံ;
ပသန္နစိတ္တော သုမနော,
ဗုဒ္ဓဿ အဘိရောပယိံ.
အဘိဝါဒေတွာန သမ္ဗုဒ္ဓံ,
လောကဇေဋ္ဌံ နရာသဘံ;
ပါမောဇ္ဇံ ဇနယိတွာန,
ပက္ကာမိံ ဥတ္တရာမုခေါ.
အဋ္ဌာရသေ ကပ္ပသတေ,
စန္ဒနံ ယံ အပူဇယိံ;
ဒုဂ္ဂတိံ နာဘိဇာနာမိ,
ဗုဒ္ဓပူဇာယိဒံ ဖလံ.
စတုဒ္ဒသေ ကပ္ပသတေ,
ဣတော အာသိံသု တေ တယော;_
ရောဟဏီ နာမ နာမေန,
စက္ကဝတ္တီ မဟဗ္ဗလာ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ စန္ဒနပူဇနကော ထေရော ဣမာ ဂါထာယော အဘာသိတ္ထာတိ.
စန္ဒနပူဇနကတ္ထေရဿာပဒါနံ တတိယံ.
အဋ္ဌမဘာဏဝါရံ.