17.1 သုပါရိစရိယတ္ထေရအပဒါန
Review
1.
2433
“ပဒုမော နာမ နာမေန,
ဒွိပဒိန္ဒော နရာသဘော;
ပဝနာ အဘိနိက္ခမ္မ,
ဓမ္မံ ဒေသေတိ စက္ခုမာ.
2.
2434
ယက္ခာနံ သမယော အာသိ,
အဝိဒူရေ မဟေသိနော;
ယေန ကိစ္စေန သမ္ပတ္တာ,
အဇ္ဈာပေက္ခိံသု တာဝဒေ.
3.
2435
ဗုဒ္ဓဿ ဂိရမညာယ,
အမတဿ စ ဒေသနံ;
ပသန္နစိတ္တော သုမနော,
အပ္ဖေါဋေတွာ ဥပဋ္ဌဟိံ.
4.
2436
သုစိဏ္ဏဿ ဖလံ ပဿ,
ဥပဋ္ဌာနဿ သတ္ထုနော;_
တိံသကပ္ပသဟဿေသု,
ဒုဂ္ဂတိံ နုပပဇ္ဇဟံ.
5.
2437
ဦနတိံသေ ကပ္ပသတေ,
သမလင်္ကတနာမကော;
သတ္တရတနသမ္ပန္နော,
စက္ကဝတ္တီ မဟဗ္ဗလော.
6.
2438
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
2439
ဣတ္ထံ သုဒံ အာယသ္မာ သုပါရိစရိယော ထေရော ဣမာ ဂါထာယော အဘာသိတ္ထာတိ.
2440
သုပါရိစရိယတ္ထေရဿာပဒါနံ ပဌမံ.