2.1 သီဟာသနဒါယကတ္ထေရအပဒါန
“နိဗ္ဗုတေ လောကနာထမှိ,
သိဒ္ဓတ္ထေ ဒွိပဒုတ္တမေ;
ဝိတ္ထာရိကေ ပါဝစနေ,
ဗာဟုဇညမှိ သာသနေ.
ပသန္နစိတ္တော သုမနော,
သီဟာသနမကာသဟံ;
သီဟာသနံ ကရိတွာန,
ပါဒပီဌမကာသဟံ.
သီဟာသနေ စ ဝဿန္တေ,
ဃရံ တတ္ထ အကာသဟံ;
တေန စိတ္တပ္ပသာဒေန,
တုသိတံ ဥပပဇ္ဇဟံ.
အာယာမေန စတုဗ္ဗီသ-
ယောဇနံ အာသိ တာဝဒေ;
ဝိမာနံ သုကတံ မယှံ,
ဝိတ္ထာရေန စတုဒ္ဒသ.
သတံ ကညာသဟဿာနိ,
ပရိဝါရေန္တိ မံ သဒါ;
သောဏ္ဏမယဉ္စ ပလ္လင်္ကံ,
ဗျမှေ အာသိ သုနိမ္မိတံ.
ဟတ္ထိယာနံ အဿယာနံ,
ဒိဗ္ဗယာနံ ဥပဋ္ဌိတံ;
ပါသာဒါ သိဝိကာ စေဝ,
နိဗ္ဗတ္တန္တိ ယဒိစ္ဆကံ.
မဏိမယာ စ ပလ္လင်္ကာ,
အညေ သာရမယာ ဗဟူ;
နိဗ္ဗတ္တန္တိ မမံ သဗ္ဗေ,
သီဟာသနဿိဒံ ဖလံ.
သောဏ္ဏမယာ ရူပိမယာ,
ဖလိကာဝေဠုရိယာမယာ;
ပါဒုကာ အဘိရူဟာမိ,
ပါဒပီဌဿိဒံ ဖလံ.
စတုန္နဝုတိတော ကပ္ပေ,
ယံ ကမ္မမကရိံ တဒါ;
ဒုဂ္ဂတိံ နာဘိဇာနာမိ,
ပုညကမ္မဿိဒံ ဖလံ.
တေသတ္တတိမှိတော ကပ္ပေ,
ဣန္ဒနာမာ တယော ဇနာ;_
ဒွေသတ္တတိမှိတော ကပ္ပေ,
တယော သုမနနာမကာ.
သမသတ္တတိတော ကပ္ပေ,
တယော ဝရုဏနာမကာ;
သတ္တရတနသမ္ပန္နာ,
စတုဒီပမှိ ဣဿရာ.
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ သီဟာသနဒါယကော ထေရော ဣမာ ဂါထာယော အဘာသိတ္ထာတိ.
သီဟာသနဒါယကတ္ထေရဿာပဒါနံ ပဌမံ.