2.3 နန္ဒတ္ထေရအပဒါန
Review
27.
726
“ပဒုမုတ္တရဿ ဘဂဝတော,
လောကဇေဋ္ဌဿ တာဒိနော;
ဝတ္ထံ ခေါမံ မယာ ဒိန္နံ,
သယမ္ဘုဿ မဟေသိနော.
28.
727
တံ မေ ဗုဒ္ဓေါ ဝိယာကာသိ,
ဇလဇုတ္တရနာမကော;
‘ဣမိနာ ဝတ္ထဒါနေန,
ဟေမဝဏ္ဏော ဘဝိဿသိ.
29.
728
ဒွေ သမ္ပတ္တီ အနုဘောတွာ,
ကုသလမူလေဟိ စောဒိတော;
ဂေါတမဿ ဘဂဝတော,
ကနိဋ္ဌော တွံ ဘဝိဿသိ.
30.
729
ရာဂရတ္တော သုခသီလော,
ကာမေသု ဂေဓမာယုတော;
ဗုဒ္ဓေန စောဒိတော သန္တော,
တဒါ တွံ ပဗ္ဗဇိဿသိ.
31.
730
ပဗ္ဗဇိတွာန တွံ တတ္ထ,
ကုသလမူလေန စောဒိတော;
သဗ္ဗာသဝေ ပရိညာယ,
နိဗ္ဗာယိဿသိနာသဝေါ’.
32.
731
သတ္တ ကပ္ပသဟဿမှိ,
စတုရော စေဠနာမကာ;
သဋ္ဌိ ကပ္ပသဟဿမှိ,
ဥပစေလာ စတုဇ္ဇနာ._
33.
732
ပဉ္စ ကပ္ပသဟဿမှိ,
စေဠာဝ စတုရော ဇနာ;
သတ္တရတနသမ္ပန္နာ,
စတုဒီပမှိ ဣဿရာ.
34.
733
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
734
ဣတ္ထံ သုဒံ အာယသ္မာ နန္ဒော ထေရော ဣမာ ဂါထာယော အဘာသိတ္ထာတိ.
735
နန္ဒတ္ထေရဿာပဒါနံ တတိယံ.