2.6 ရာဟုလတ္ထေရအပဒါန
“ပဒုမုတ္တရဿ ဘဂဝတော,
လောကဇေဋ္ဌဿ တာဒိနော;
သတ္တဘူမမှိ ပါသာဒေ,
အာဒါသံ သန္ထရိံ အဟံ.
ခီဏာသဝသဟဿေဟိ,
ပရိကိဏ္ဏော မဟာမုနိ;
ဥပါဂမိ ဂန္ဓကုဋိံ,_
ဒွိပဒိန္ဒော နရာသဘော.
ဝိရောစေန္တော ဂန္ဓကုဋိံ,
ဒေဝဒေဝေါ နရာသဘော;
ဘိက္ခုသံဃေ ဌိတော သတ္ထာ,
ဣမာ ဂါထာ အဘာသထ._
‘ယေနာယံ ဇောတိတာ သေယျာ,
အာဒါသောဝ သုသန္ထတော;
တမဟံ ကိတ္တယိဿာမိ,
သုဏာထ မမ ဘာသတော.
သောဏ္ဏမယာ ရူပိမယာ,
အထော ဝေဠုရိယာမယာ;
နိဗ္ဗတ္တိဿန္တိ ပါသာဒါ,
ယေ ကေစိ မနသော ပိယာ.
စတုသဋ္ဌိက္ခတ္တုံ ဒေဝိန္ဒော,
ဒေဝရဇ္ဇံ ကရိဿတိ;
သဟဿက္ခတ္တုံ စက္ကဝတ္တီ,
ဘဝိဿတိ အနန္တရာ.
ဧကဝီသတိကပ္ပမှိ,
ဝိမလော နာမ ခတ္တိယော;
စာတုရန္တော ဝိဇိတာဝီ,
စက္ကဝတ္တီ ဘဝိဿတိ.
နဂရံ ရေဏုဝတီ နာမ,
ဣဋ္ဌကာဟိ သုမာပိတံ;_
အာယာမတော တီဏိ သတံ,
စတုရဿသမာယုတံ.
သုဒဿနော နာမ ပါသာဒေါ,
ဝိဿကမ္မေန မာပိတော;
ကူဋာဂါရဝရူပေတော,
သတ္တရတနဘူသိတော.
ဒသသဒ္ဒါဝိဝိတ္တံ တံ,
ဝိဇ္ဇာဓရသမာကုလံ;
သုဒဿနံဝ နဂရံ,
ဒေဝတာနံ ဘဝိဿတိ.
ပဘာ နိဂ္ဂစ္ဆတေ တဿ,
ဥဂ္ဂစ္ဆန္တေဝ သူရိယေ;_
ဝိရောစေဿတိ တံ နိစ္စံ,
သမန္တာ အဋ္ဌယောဇနံ.
ကပ္ပသတသဟဿမှိ,
ဩက္ကာကကုလသမ္ဘဝေါ;
ဂေါတမော နာမ ဂေါတ္တေန,
သတ္ထာ လောကေ ဘဝိဿတိ.
တုသိတာ သော စဝိတွာန,
သုက္ကမူလေန စောဒိတော;
ဂေါတမဿ ဘဂဝတော,
အတြဇော သော ဘဝိဿတိ.
သစေဝသေယျ အဂါရံ,
စက္ကဝတ္တီ ဘဝေယျ သော;
အဋ္ဌာနမေတံ ယံ တာဒီ,
အဂါရေ ရတိမဇ္ဈဂါ.
နိက္ခမိတွာ အဂါရမှာ,
ပဗ္ဗဇိဿတိ သုဗ္ဗတော;
ရာဟုလော နာမ နာမေန,
အရဟာ သော ဘဝိဿတိ’.
ကိကီဝ အဏ္ဍံ ရက္ခေယျ,
စာမရီ ဝိယ ဝါလဓိံ;
နိပကော သီလသမ္ပန္နော,
ဧဝံ ရက္ခိံ မဟာမုနိ.
တဿာဟံ ဓမ္မမညာယ,
ဝိဟာသိံ သာသနေ ရတော;
သဗ္ဗာသဝေ ပရိညာယ,
ဝိဟရာမိ အနာသဝေါ.
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ရာဟုလော ထေရော ဣမာ ဂါထာယော အဘာသိတ္ထာတိ.
ရာဟုလတ္ထေရဿာပဒါနံ ဆဋ္ဌံ.