3.4 ပဉ္စသီလသမာဒါနိယတ္ထေရအပဒါန
“နဂရေ စန္ဒဝတိယာ,
ဘတကော အာသဟံ တဒါ;
ပရကမ္မာယနေ ယုတ္တော,
ပဗ္ဗဇ္ဇံ န လဘာမဟံ.
မဟန္ဓကာရပိဟိတာ,
တိဝိဓဂ္ဂီဟိ ဍယှရေ;
ကေန နု ခေါ ဥပါယေန,
ဝိသံယုတ္တော ဘဝေ အဟံ.
ဒေယျဓမ္မော စ မေ နတ္ထိ,
ဝရာကော ဘတကော အဟံ;
ယန္နူနာဟံ ပဉ္စသီလံ,
ရက္ခေယျံ ပရိပူရယံ.
အနောမဒဿိဿ မုနိနော,
နိသဘော နာမ သာဝကော;
တမဟံ ဥပသင်္ကမ္မ,
ပဉ္စသိက္ခာပဒဂ္ဂဟိံ.
ဝဿသတသဟဿာနိ,
အာယု ဝိဇ္ဇတိ တာဝဒေ;
တာဝတာ ပဉ္စသီလာနိ,
ပရိပုဏ္ဏာနိ ဂေါပယိံ.
မစ္စုကာလေ စ သမ္ပတ္တေ,
ဒေဝါ အဿာသယန္တိ မံ;
‘ရထော သဟဿယုတ္တော တေ,
မာရိသာယံ ဥပဋ္ဌိတော’.
ဝတ္တန္တေ စရိမေ စိတ္တေ,
မမ သီလံ အနုဿရိံ;
တေန ကမ္မေန သုကတေန,
တာဝတိံသံ အဂစ္ဆဟံ.
တိံသက္ခတ္တုဉ္စ ဒေဝိန္ဒော,
ဒေဝရဇ္ဇမကာရယိံ;
ဒိဗ္ဗသုခံ အနုဘဝိံ,
အစ္ဆရာဟိ ပုရက္ခတော.
ပဉ္စသတ္တတိက္ခတ္တုဉ္စ,
စက္ကဝတ္တီ အဟောသဟံ;
ပဒေသရဇ္ဇံ ဝိပုလံ,
ဂဏနာတော အသင်္ခိယံ.
ဒေဝလောကာ စဝိတွာန,
သုက္ကမူလေန စောဒိတော;
ပုရေ ဝေသာလိယံ ဇာတော,
မဟာသာလေ သုအဍ္ဎကေ.
ဝဿူပနာယိကေ ကာလေ,
ဒိပ္ပန္တေ ဇိနသာသနေ;
မာတာ စ မေ ပိတာ စေဝ,
ပဉ္စသိက္ခာပဒဂ္ဂဟုံ.
သဟ သုတွာနဟံ သီလံ,
မမ သီလံ အနုဿရိံ;
ဧကာသနေ နိသီဒိတွာ,
အရဟတ္တမပါပုဏိံ.
ဇာတိယာ ပဉ္စဝဿေန ,
အရဟတ္တမပါပုဏိံ;
ဥပသမ္ပာဒယိ ဗုဒ္ဓေါ,_
ဂုဏမညာယ စက္ခုမာ.
ပရိပုဏ္ဏာနိ ဂေါပေတွာ,
ပဉ္စသိက္ခာပဒါနဟံ;
အပရိမေယျေ ဣတော ကပ္ပေ,
ဝိနိပါတံ န ဂစ္ဆဟံ.
သွာဟံ ယသမနုဘဝိံ,
တေသံ သီလာန ဝါဟသာ;
ကပ္ပကောဋိမ္ပိ ကိတ္တေန္တော,
ကိတ္တယေ ဧကဒေသကံ.
ပဉ္စ သီလာနိ ဂေါပေတွာ,
တယော ဟေတူ လဘာမဟံ;
ဒီဃာယုကော မဟာဘောဂေါ,
တိက္ခပညော ဘဝါမဟံ.
သင်္ကိတ္တေန္တော စ သဗ္ဗေသံ,
အဓိမတ္တဉ္စ ပေါရိသံ;
ဘဝါဘဝေ သံသရိတွာ,
ဧတေ ဌာနေ လဘာမဟံ.
အပရိမေယျသီလေသု,
ဝတ္တန္တာ ဇိနသာဝကာ;
ဘဝေသု ယဒိ ရဇ္ဇေယျုံ,
ဝိပါကော ကီဒိသော ဘဝေ.
သုစိဏ္ဏံ မေ ပဉ္စသီလံ,
ဘတကေန တပဿိနာ;
တေန သီလေနဟံ အဇ္ဇ,
မောစယိံ သဗ္ဗဗန္ဓနာ.
အပရိမေယျေ ဣတော ကပ္ပေ,
ပဉ္စ သီလာနိ ဂေါပယိံ;
ဒုဂ္ဂတိံ နာဘိဇာနာမိ,
ပဉ္စသီလာနိဒံ ဖလံ.
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ပဉ္စသီလသမာဒါနိယော ထေရော ဣမာ ဂါထာယော အဘာသိတ္ထာတိ.
ပဉ္စသီလသမာဒါနိယတ္ထေရဿာပဒါနံ စတုတ္ထံ.