3.5 အန္နသံသာဝကတ္ထေရအပဒါန
Review
155.
1022
“သုဝဏ္ဏဝဏ္ဏံ သမ္ဗုဒ္ဓံ,
ဂစ္ဆန္တံ အန္တရာပဏေ;
ကဉ္စနဂ္ဃိယသံကာသံ,
ဗာတ္တိံသဝရလက္ခဏံ.
156.
1023
သိဒ္ဓတ္ထံ လောကပဇ္ဇောတံ,
အပ္ပမေယျံ အနောပမံ;
အလတ္ထံ ပရမံ ပီတိံ,
ဒိသွာ ဒန္တံ ဇုတိန္ဓရံ.
157.
1024
သမ္ဗုဒ္ဓံ အဘိနာမေတွာ,
ဘောဇယိံ တံ မဟာမုနိံ;
မဟာကာရုဏိကော လောကေ,
အနုမောဒိ မမံ တဒါ.
158.
1025
တသ္မိံ မဟာကာရုဏိကေ,
ပရမဿာသကာရကေ;
ဗုဒ္ဓေ စိတ္တံ ပသာဒေတွာ,
ကပ္ပံ သဂ္ဂမှိ မောဒဟံ.
159.
1026
စတုန္နဝုတိတော ကပ္ပေ,
ယံ ဒါနမဒဒိံ တဒါ;
ဒုဂ္ဂတိံ နာဘိဇာနာမိ,
ဘိက္ခာဒါနဿိဒံ ဖလံ.
160.
1027
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
1028
ဣတ္ထံ သုဒံ အာယသ္မာ အန္နသံသာဝကော ထေရော ဣမာ ဂါထာယော အဘာသိတ္ထာတိ.
1029
အန္နသံသာဝကတ္ထေရဿာပဒါနံ ပဉ္စမံ.