33.1 ဥမာပုပ္ဖိယတ္ထေရအပဒါန
Review
1.
3586
“သမာဟိတံ သမာပန္နံ,
သိဒ္ဓတ္ထမပရာဇိတံ;
သမာဓိနာ ဥပဝိဋ္ဌံ,
အဒ္ဒသာဟံ နရုတ္တမံ.
2.
3587
ဥမာပုပ္ဖံ ဂဟေတွာန,_
ဗုဒ္ဓဿ အဘိရောပယိံ;
သဗ္ဗပုပ္ဖါ ဧကသီသာ,
ဥဒ္ဓံဝဏ္ဋာ အဓောမုခါ._
3.
3588
သုစိတ္တာ ဝိယ တိဋ္ဌန္တေ,
အာကာသေ ပုပ္ဖသန္ထရာ;
တေန စိတ္တပ္ပသာဒေန,
တုသိတံ ဥပပဇ္ဇဟံ.
4.
3589
စတုန္နဝုတိတော ကပ္ပေ,
ယံ ပုပ္ဖမဘိပူဇယိံ;
ဒုဂ္ဂတိံ နာဘိဇာနာမိ,
ဗုဒ္ဓပူဇာယိဒံ ဖလံ.
5.
3590
ပဉ္စပညာသိတော ကပ္ပေ,
ဧကော အာသိံ မဟီပတိ;
သမန္တဆဒနော နာမ,
စက္ကဝတ္တီ မဟဗ္ဗလော.
6.
3591
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
3592
ဣတ္ထံ သုဒံ အာယသ္မာ ဥမာပုပ္ဖိယော ထေရော ဣမာ ဂါထာယော အဘာသိတ္ထာတိ.
3593
ဥမာပုပ္ဖိယတ္ထေရဿာပဒါနံ ပဌမံ.