33.10 သပရိဝါရဆတ္တဒါယကတ္ထေရအပဒါန
“ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
အာကာသေ ဇလဝုဋ္ဌီဝ,
ဝဿတေ ဓမ္မဝုဋ္ဌိယာ.
တမဒ္ဒသာသိံ သမ္ဗုဒ္ဓံ,
ဒေသေန္တံ အမတံ ပဒံ;
သကံ စိတ္တံ ပသာဒေတွာ,
အဂမာသိံ သကံ ဃရံ.
ဆတ္တံ အလင်္ကတံ ဂယှ,
ဥပဂစ္ဆိံ နရုတ္တမံ;_
ဟဋ္ဌော ဟဋ္ဌေန စိတ္တေန,
အာကာသေ ဥက္ခိပိံ အဟံ.
သုသင်္ဂဟိတယာနံဝ,
ဒန္တောဝ သာဝကုတ္တမော;
ဥပဂန္တွာန သမ္ဗုဒ္ဓံ,_
မတ္ထကေ သမ္ပတိဋ္ဌဟိ.
အနုကမ္ပကော ကာရုဏိကော,
ဗုဒ္ဓေါ လောကဂ္ဂနာယကော;
ဘိက္ခုသံဃေ နိသီဒိတွာ,
ဣမာ ဂါထာ အဘာသထ._
‘ယေန ဆတ္တမိဒံ ဒိန္နံ,
အလင်္ကတံ မနောရမံ;
တေန စိတ္တပ္ပသာဒေန,
ဒုဂ္ဂတိံ သော န ဂစ္ဆတိ.
သတ္တက္ခတ္တုဉ္စ ဒေဝေသု,
ဒေဝရဇ္ဇံ ကရိဿတိ;
ဗာတ္တိံသက္ခတ္တုဉ္စ ရာဇာ,
စက္ကဝတ္တီ ဘဝိဿတိ.
ကပ္ပသတသဟဿမှိ,
ဩက္ကာကကုလသမ္ဘဝေါ;
ဂေါတမော နာမ ဂေါတ္တေန,
သတ္ထာ လောကေ ဘဝိဿတိ.
တဿ ဓမ္မေသု ဒါယာဒေါ,
ဩရသော ဓမ္မနိမ္မိတော;
သဗ္ဗာသဝေ ပရိညာယ,
နိဗ္ဗာယိဿတိနာသဝေါ’.
ဗုဒ္ဓဿ ဂိရမညာယ,
ဝါစာသဘိမုဒီရိတံ;
ပသန္နစိတ္တော သုမနော,
ဘိယျော ဟာသံ ဇနေသဟံ.
ဇဟိတွာ မာနုသံ ယောနိံ,
ဒိဗ္ဗံ ယောနိံ သမဇ္ဈဂံ;
ဝိမာနမုတ္တမံ မယှံ,
အဗ္ဘုဂ္ဂတံ မနောရမံ.
ဝိမာနာ နိက္ခမန္တဿ,
သေတစ္ဆတ္တံ ဓရီယတိ;
တဒါ သညံ ပဋိလဘိံ,
ပုဗ္ဗကမ္မဿိဒံ ဖလံ.
ဒေဝလောကာ စဝိတွာန,
မနုဿတ္တဉ္စ အာဂမိံ;
ဆတ္တိံသက္ခတ္တုံ စက္ကဝတ္တီ,
သတ္တကပ္ပသတမှိတော.
တမှာ ကာယာ စဝိတွာန,
အာဂစ္ဆိံ တိဒသံ ပုရံ;
သံသရိတွာနုပုဗ္ဗေန,
မာနုသံ ပုနရာဂမိံ.
ဩက္ကန္တံ မာတုကုစ္ဆိံ မံ,
သေတစ္ဆတ္တံ အဓာရယုံ;
ဇာတိယာ သတ္တဝဿောဟံ,
ပဗ္ဗဇိံ အနဂါရိယံ.
သုနန္ဒော နာမ နာမေန,
ဗြာဟ္မဏော မန္တပါရဂူ;
ဖလိကံ ဆတ္တမာဒါယ,
သာဝကဂ္ဂဿ သော တဒါ.
အနုမောဒိ မဟာဝီရော,
သာရိပုတ္တော မဟာကထီ;
သုတွာနုမောဒနံ တဿ,
ပုဗ္ဗကမ္မမနုဿရိံ.
အဉ္ဇလိံ ပဂ္ဂဟေတွာန,
သကံ စိတ္တံ ပသာဒယိံ;
သရိတွာ ပုရိမံ ကမ္မံ,
အရဟတ္တမပါပုဏိံ.
ဥဋ္ဌာယ အာသနာ တမှာ,_
သိရေ ကတွာန အဉ္ဇလိံ;
သမ္ဗုဒ္ဓံ အဘိဝါဒေတွာ,
ဣမံ ဝါစံ ဥဒီရယိံ._
သတသဟဿိတော ကပ္ပေ,
ဗုဒ္ဓေါ လောကေ အနုတ္တရော;
ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော.
တဿ ဆတ္တံ မယာ ဒိန္နံ,
ဝိစိတ္တံ သမလင်္ကတံ;
ဥဘော ဟတ္ထေဟိ ပဂ္ဂဏှိ,_
သယမ္ဘူ အဂ္ဂပုဂ္ဂလော.
အဟော ဗုဒ္ဓါ အဟော ဓမ္မာ,
အဟော နော သတ္ထုသမ္ပဒါ;
ဧကစ္ဆတ္တဿ ဒါနေန,
ဒုဂ္ဂတိံ နုပပဇ္ဇဟံ.
ကိလေသာ ဈာပိတာ မယှံ,
ဘဝါ သဗ္ဗေ သမူဟတာ;
သဗ္ဗာသဝေ ပရိညာယ,
ဝိဟရာမိ အနာသဝေါ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”. (2925)
ဣတ္ထံ သုဒံ အာယသ္မာ သပရိဝါရဆတ္တဒါယကော ထေရော ဣမာ ဂါထာယော အဘာသိတ္ထာတိ.
သပရိဝါရဆတ္တဒါယကတ္ထေရဿာပဒါနံ ဒသမံ.
ဥမာပုပ္ဖိယဝဂ္ဂေါ တေတ္တိံသတိမော.
တဿုဒ္ဒါနံ
ဥမာပုပ္ဖဉ္စ ပုလိနံ,_
ဟာသော ယညော နိမိတ္တကော;
သံသာဝကော နိဂ္ဂုဏ္ဍီ စ,
သုမနံ ပုပ္ဖဆတ္တကော;
သပရိဝါရဆတ္တော စ,
ဂါထာ သတ္တသတုတ္တရာတိ.