33.4 ယညသာမိကတ္ထေရအပဒါန
“ဇာတိယာ သတ္တဝဿောဟံ,
အဟောသိံ မန္တပါရဂူ;
ကုလဝတ္တံ အဓာရေသိံ,
ယညော ဥဿာဟိတော မယာ.
စုလ္လာသီတိသဟဿာနိ,
ပသူ ဟညန္တိ မေ တဒါ;
သာရထမ္ဘုပနီတာနိ,
ယညတ္ထာယ ဥပဋ္ဌိတာ.
ဥက္ကာမုခပဟဋ္ဌောဝ,_
ခဒိရင်္ဂါရသန္နိဘော;
ဥဒယန္တောဝ သူရိယော,_
ပုဏ္ဏမာယေဝ စန္ဒိမာ.
သိဒ္ဓတ္ထော သဗ္ဗသိဒ္ဓတ္ထော,
တိလောကမဟိတော ဟိတော;
ဥပဂန္တွာန သမ္ဗုဒ္ဓေါ,_
ဣဒံ ဝစနမဗြဝိ._
‘အဟိံသာ သဗ္ဗပါဏီနံ,
ကုမာရ မမ ရုစ္စတိ;
ထေယျာ စ အတိစာရာ စ,
မဇ္ဇပါနာ စ အာရတိ.
ရတိ စ သမစရိယာယ,
ဗာဟုသစ္စံ ကတညုတာ;
ဒိဋ္ဌေ ဓမ္မေ ပရတ္ထ စ,
ဓမ္မာ ဧတေ ပသံသိယာ.
ဧတေ ဓမ္မေ ဘာဝယိတွာ,
သဗ္ဗသတ္တဟိတေ ရတော;
ဗုဒ္ဓေ စိတ္တံ ပသာဒေတွာ,
ဘာဝေဟိ မဂ္ဂမုတ္တမံ’.
ဣဒံ ဝတွာန သဗ္ဗညူ,_
လောကဇေဋ္ဌော နရာသဘော;
မမေဝံ အနုသာသိတွာ,
ဝေဟာသံ ဥဂ္ဂတော ဂတော.
ပုဗ္ဗေ စိတ္တံ ဝိသောဓေတွာ,
ပစ္ဆာ စိတ္တံ ပသာဒယိံ;
တေန စိတ္တပ္ပသာဒေန,
တုသိတံ ဥပပဇ္ဇဟံ.
စတုန္နဝုတိတော ကပ္ပေ,
ယဒါ စိတ္တံ ပသာဒယိံ;
ဒုဂ္ဂတိံ နာဘိဇာနာမိ,
ဗုဒ္ဓသညာယိဒံ ဖလံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ယညသာမိကော ထေရော ဣမာ ဂါထာယော အဘာသိတ္ထာတိ.
ယညသာမိကတ္ထေရဿာပဒါနံ စတုတ္ထံ.