33.7 နိဂ္ဂုဏ္ဍိပုပ္ဖိယတ္ထေရအပဒါန
“ယဒါ ဒေဝေါ ဒေဝကာယာ,
စဝတေ အာယုသင်္ခယာ;
တယော သဒ္ဒါ နိစ္ဆရန္တိ,
ဒေဝါနံ အနုမောဒတံ.
‘ဣတော ဘော သုဂတိံ ဂစ္ဆ,
မနုဿာနံ သဟဗျတံ;
မနုဿဘူတော သဒ္ဓမ္မေ,
လဘ သဒ္ဓံ အနုတ္တရံ.
သာ တေ သဒ္ဓါ နိဝိဋ္ဌာဿ,
မူလဇာတာ ပတိဋ္ဌိတာ;
ယာဝဇီဝံ အသံဟီရာ,
သဒ္ဓမ္မေ သုပ္ပဝေဒိတေ.
ကာယေန ကုသလံ ကတွာ,
ဝါစာယ ကုသလံ ဗဟုံ;
မနသာ ကုသလံ ကတွာ,
အဗျာပဇ္ဇံ နိရူပဓိံ.
တတော ဩပဓိကံ ပုညံ,
ကတွာ ဒါနေန တံ ဗဟုံ;
အညေပိ မစ္စေ သဒ္ဓမ္မေ,
ဗြဟ္မစရိယေ နိဝေသယ’.
ဣမာယ အနုကမ္ပာယ,_
ဒေဝါဒေဝံ ယဒါ ဝိဒူ;
စဝန္တံ အနုမောဒန္တိ,
ဧဟိ ဒေဝ ပုနပ္ပုနံ.
‘သံဝေဂေါ မေ တဒါ အာသိ,
ဒေဝသင်္ဃေ သမာဂတေ;
ကံသု နာမ အဟံ ယောနိံ,
ဂမိဿာမိ ဣတော စုတော’.
မမ သံဝေဂမညာယ,
သမဏော ဘာဝိတိန္ဒြိယော;
မမုဒ္ဓရိတုကာမော သော,
အာဂစ္ဆိ မမ သန္တိကံ.
သုမနော နာမ နာမေန,
ပဒုမုတ္တရသာဝကော;
အတ္ထဓမ္မာနုသာသိတွာ,
သံဝေဇေသိ မမံ တဒါ.
ဒွါဒသမံ ဘာဏဝါရံ.
တဿာဟံ ဝစနံ သုတွာ,
ဗုဒ္ဓေ စိတ္တံ ပသာဒယိံ;
တံ ဓီရံ အဘိဝါဒေတွာ,
တတ္ထ ကာလင်္ကတော အဟံ.
ဥပပဇ္ဇိံ သ တတ္ထေဝ,_
သုက္ကမူလေန စောဒိတော;
ဝသန္တော မာတုကုစ္ဆိမှိ,
ပုန ဓာရေတိ မာတုယာ.
တမှာ ကာယာ စဝိတွာန,
တိဒသေ ဥပပဇ္ဇဟံ;
ဧတ္ထန္တရေ န ပဿာမိ,
ဒေါမနဿမဟံ တဒါ.
တာဝတိံသာ စဝိတွာန,
မာတုကုစ္ဆိံ သမောက္ကမိံ;
နိက္ခမိတွာန ကုစ္ဆိမှာ,
ကဏှသုက္ကံ အဇာနဟံ.
ဇာတိယာ သတ္တဝဿောဝ,
အာရာမံ ပါဝိသိံ အဟံ;
ဂေါတမဿ ဘဂဝတော,
သကျပုတ္တဿ တာဒိနော.
ဝိတ္ထာရိကေ ပါဝစနေ,
ဗာဟုဇညမှိ သာသနေ;
အဒ္ဒသံ သာသနကရေ,
ဘိက္ခဝေါ တတ္ထ သတ္ထုနော.
သာဝတ္ထိ နာမ နဂရံ,
ရာဇာ တတ္ထာသိ ကောသလော;
ရထေန နာဂယုတ္တေန,
ဥပေသိ ဗောဓိမုတ္တမံ._
တဿာဟံ နာဂံ ဒိသွာန,
ပုဗ္ဗကမ္မံ အနုဿရိံ;
အဉ္ဇလိံ ပဂ္ဂဟေတွာန,
သမယံ အဂမာသဟံ.
ဇာတိယာ သတ္တဝဿောဝ,
ပဗ္ဗဇိံ အနဂါရိယံ;
ယော သော ဗုဒ္ဓံ ဥပဋ္ဌာသိ,
အာနန္ဒော နာမ သာဝကော.
ဂတိမာ ဓိတိမာ စေဝ,
သတိမာ စ ဗဟုဿုတော;
ရညော စိတ္တံ ပသာဒေန္တော,
နိယျာဒေသိ မဟာဇုတိ.
တဿာဟံ ဓမ္မံ သုတွာန,
ပုဗ္ဗကမ္မံ အနုဿရိံ;
တတ္ထေဝ ဌိတကော သန္တော,
အရဟတ္တမပါပုဏိံ.
ဧကံသံ စီဝရံ ကတွာ,
သိရေ ကတွာန အဉ္ဇလိံ;
သမ္ဗုဒ္ဓံ အဘိဝါဒေတွာ,
ဣမံ ဝါစံ ဥဒီရယိံ._
‘ပဒုမုတ္တရဗုဒ္ဓဿ,
ဒွိပဒိန္ဒဿ သတ္ထုနော;
နိဂ္ဂုဏ္ဍိပုပ္ဖံ ပဂ္ဂယှ,
သီဟာသနေ ဌပေသဟံ.
တေန ကမ္မေန ဒွိပဒိန္ဒ,
လောကဇေဋ္ဌ နရာသဘ;
ပတ္တောမှိ အစလံ ဌာနံ,
ဟိတွာ ဇယပရာဇယံ’.
ပဉ္စဝီသသဟဿမှိ,
ကပ္ပါနံ မနုဇာဓိပါ;
အဗ္ဗုဒနိရဗ္ဗုဒါနိ,
အဋ္ဌဋ္ဌာသိံသု ခတ္တိယာ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ နိဂ္ဂုဏ္ဍိပုပ္ဖိယော ထေရော ဣမာ ဂါထာယော အဘာသိတ္ထာတိ.
နိဂ္ဂုဏ္ဍိပုပ္ဖိယတ္ထေရဿာပဒါနံ သတ္တမံ.