34.1 ဂန္ဓဓူပိယတ္ထေရအပဒါန
Review
1.
3715
“သိဒ္ဓတ္ထဿ ဘဂဝတော,
ဂန္ဓဓူပံ အဒါသဟံ;
သုမနေဟိ ပဋိစ္ဆန္နံ,
ဗုဒ္ဓါနုစ္ဆဝိကဉ္စ တံ.
2.
3716
ကဉ္စနဂ္ဃိယသင်္ကာသံ,
ဗုဒ္ဓံ လောကဂ္ဂနာယကံ;
ဣန္ဒီဝရံဝ ဇလိတံ,_
အာဒိတ္တံဝ ဟုတာသနံ.
3.
3717
ဗျဂ္ဃုသဘံဝ ပဝရံ,
အဘိဇာတံဝ ကေသရိံ;
နိသိန္နံ သမဏာနဂ္ဂံ,
ဘိက္ခုသံဃပုရက္ခတံ.
4.
3718
ဒိသွာ စိတ္တံ ပသာဒေတွာ,
ပဂ္ဂဟေတွာန အဉ္ဇလိံ;
ဝန္ဒိတွာ သတ္ထုနော ပါဒေ,
ပက္ကာမိံ ဥတ္တရာမုခေါ.
5.
3719
စတုန္နဝုတိတော ကပ္ပေ,
ယံ ဂန္ဓမဒဒိံ တဒါ;
ဒုဂ္ဂတိံ နာဘိဇာနာမိ,
ဂန္ဓပူဇာယိဒံ ဖလံ.
6.
3720
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
3721
ဣတ္ထံ သုဒံ အာယသ္မာ ဂန္ဓဓူပိယော ထေရော ဣမာ ဂါထာယော အဘာသိတ္ထာတိ.
3722
ဂန္ဓဓူပိယတ္ထေရဿာပဒါနံ ပဌမံ.