34.10 ဥက္ခိတ္တပဒုမိယတ္ထေရအပဒါန
“နဂရေ ဟံသဝတိယာ,
အဟောသိံ မာလိကော တဒါ;
ဩဂါဟေတွာ ပဒုမသရံ,
သတပတ္တံ ဩစိနာမဟံ.
ပဒုမုတ္တရော နာမ ဇိနော,
သဗ္ဗဓမ္မာန ပါရဂူ;
သဟ သတသဟဿေဟိ,
သန္တစိတ္တေဟိ တာဒိဘိ.
ခီဏာသဝေဟိ သုဒ္ဓေဟိ,
ဆဠဘိညေဟိ ဈာယိဘိ;
မမ ဝုဒ္ဓိံ သမနွေသံ,
အာဂစ္ဆိ မမ သန္တိကံ.
ဒိသွာနဟံ ဒေဝဒေဝံ,
သယမ္ဘုံ လောကနာယကံ;
ဝဏ္ဋေ ဆေတွာ သတပတ္တံ,
ဥက္ခိပိမမ္ဗရေ တဒါ._
ယဒိ ဗုဒ္ဓေါ တုဝံ ဝီရ,
လောကဇေဋ္ဌော နရာသဘော;
သယံ ဂန္တွာ သတပတ္တာ,
မတ္ထကေ ဓာရယန္တု တေ.
အဓိဋ္ဌဟိ မဟာဝီရော,
လောကဇေဋ္ဌော နရာသဘော;
ဗုဒ္ဓဿ အာနုဘာဝေန,
မတ္ထကေ ဓာရယိံသု တေ.
တေန ကမ္မေန သုကတေန,
စေတနာပဏိဓီဟိ စ;
ဇဟိတွာ မာနုသံ ဒေဟံ,
တာဝတိံသမဂစ္ဆဟံ.
တတ္ထ မေ သုကတံ ဗျမှံ,
သတပတ္တန္တိ ဝုစ္စတိ;
သဋ္ဌိယောဇနမုဗ္ဗိဒ္ဓံ,
တိံသယောဇနဝိတ္ထတံ.
သဟဿက္ခတ္တုံ ဒေဝိန္ဒော,
ဒေဝရဇ္ဇမကာရယိံ;
ပဉ္စသတ္တတိက္ခတ္တုဉ္စ,
စက္ကဝတ္တီ အဟောသဟံ.
ပဒေသရဇ္ဇံ ဝိပုလံ,
ဂဏနာတော အသင်္ခိယံ;
အနုဘောမိ သကံ ကမ္မံ,
ပုဗ္ဗေ သုကတမတ္တနော.
တေနေဝေကပဒုမေန,
အနုဘောတွာန သမ္ပဒါ;
ဂေါတမဿ ဘဂဝတော,
ဓမ္မံ သစ္ဆိကရိံ အဟံ.
ကိလေသာ ဈာပိတာ မယှံ,
ဘဝါ သဗ္ဗေ သမူဟတာ;
နာဂေါဝ ဗန္ဓနံ ဆေတွာ,
ဝိဟရာမိ အနာသဝေါ.
သတသဟဿိတော ကပ္ပေ,
ယံ ပုပ္ဖမဘိပူဇယိံ;
ဒုဂ္ဂတိံ နာဘိဇာနာမိ,
ဧကပဒုမဿိဒံ ဖလံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”. (3067)
ဣတ္ထံ သုဒံ အာယသ္မာ ဥက္ခိတ္တပဒုမိယော ထေရော ဣမာ ဂါထာယော အဘာသိတ္ထာတိ.
ဥက္ခိတ္တပဒုမိယတ္ထေရဿာပဒါနံ ဒသမံ.
ဂန္ဓောဒကဝဂ္ဂေါ စတုတိံသတိမော.
တဿုဒ္ဒါနံ
ဂန္ဓဓူပေါ ဥဒကဉ္စ,
ပုန္နာဂ ဧကဒုဿကာ;
ဖုသိတော စ ပဘင်္ကရော,
ကုဋိဒေါ ဥတ္တရီယကော.
သဝနီ ဧကပဒုမီ,
ဂါထာယော သဗ္ဗပိဏ္ဍိတာ;
ဧကံ ဂါထာသတဉ္စေဝ,
စတုတာလီသမေဝ စ.