34.5 ဖုသိတကမ္ပိယတ္ထေရအပဒါန
“ဝိပဿီ နာမ သမ္ဗုဒ္ဓေါ,
လောကဇေဋ္ဌော နရာသဘော;
ခီဏာသဝေဟိ သဟိတော,
သံဃာရာမေ ဝသီ တဒါ.
အာရာမဒွါရာ နိက္ခမ္မ,
ဝိပဿီ လောကနာယကော;
သဟ သတသဟဿေဟိ,
အဋ္ဌ ခီဏာသဝေဟိ သော.
အဇိနေန နိဝတ္ထောဟံ,
ဝါကစီရဓရောပိ စ;
ကုသုမောဒကမာဒါယ,
သမ္ဗုဒ္ဓံ ဥပသင်္ကမိံ.
သကံ စိတ္တံ ပသာဒေတွာ,
ဝေဒဇာတော ကတဉ္ဇလီ;
ကုသုမောဒကမာဒါယ,
ဗုဒ္ဓမဗ္ဘုက္ကိရိံ အဟံ.
တေန ကမ္မေန သမ္ဗုဒ္ဓေါ,
ဇလဇုတ္တမနာမကော;
မမ ကမ္မံ ပကိတ္တေတွာ,
အဂမာ ယေန ပတ္ထိတံ.
ဖုသိတာ ပဉ္စသဟဿာ,
ယေဟိ ပူဇေသဟံ ဇိနံ;
အဍ္ဎတေယျသဟဿေဟိ,
ဒေဝရဇ္ဇံ အကာရယိံ.
အဍ္ဎတေယျသဟဿေဟိ,
စက္ကဝတ္တီ အဟောသဟံ;
အဝသေသေန ကမ္မေန,
အရဟတ္တမပါပုဏိံ.
ဒေဝရာဇာ ယဒါ ဟောမိ,
မနုဇာဓိပတီ ယဒါ;
တမေဝ နာမဓေယျံ မေ,
ဖုသိတော နာမ ဟောမဟံ.
ဒေဝဘူတဿ သန္တဿ,
အထာပိ မာနုသဿ ဝါ;
သမန္တာ ဗျာမတော မယှံ,
ဖုသိတံဝ ပဝဿတိ.
ဘဝါ ဥဂ္ဃါဋိတာ မယှံ,
ကိလေသာ ဈာပိတာ မမ;
သဗ္ဗာသဝပရိက္ခီဏော,
ဖုသိတဿ ဣဒံ ဖလံ.
စန္ဒနဿေဝ မေ ကာယာ,
တထာ ဂန္ဓော ပဝါယတိ;
သရီရတော မမ ဂန္ဓော,
အဍ္ဎကောသေ ပဝါယတိ.
ဒိဗ္ဗဂန္ဓံ သမ္ပဝန္တံ,
ပုညကမ္မသမင်္ဂိနံ;
ဂန္ဓံ ဃတွာန ဇာနန္တိ,
ဖုသိတော အာဂတော ဣဓ.
သာခါပလာသကဋ္ဌာနိ,
တိဏာနိပိ စ သဗ္ဗသော;
မမ သင်္ကပ္ပမညာယ,
ဂန္ဓော သမ္ပဇ္ဇတေ ခဏေ.
သတသဟဿိတော ကပ္ပေ,
စန္ဒနံ အဘိပူဇယိံ;
ဒုဂ္ဂတိံ နာဘိဇာနာမိ,
ဖုသိတဿ ဣဒံ ဖလံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဖုသိတကမ္ပိယော ထေရော ဣမာ ဂါထာယော အဘာသိတ္ထာတိ.
ဖုသိတကမ္ပိယတ္ထေရဿာပဒါနံ ပဉ္စမံ.