34.6 ပဘင်္ကရတ္ထေရအပဒါန
“ပဒုမုတ္တရဘဂဝတော,
လောကဇေဋ္ဌဿ တာဒိနော;
ဝိပိနေ စေတိယံ အာသိ,
ဝါဠမိဂသမာကုလေ.
န ကောစိ ဝိသဟိ ဂန္တုံ,
စေတိယံ အဘိဝန္ဒိတုံ;
တိဏကဋ္ဌလတောနဒ္ဓံ,
ပလုဂ္ဂံ အာသိ စေတိယံ.
ဝနကမ္မိကော တဒါ အာသိံ,
ပိတုမာတုမတေနဟံ;
အဒ္ဒသံ ဝိပိနေ ထူပံ,
လုဂ္ဂံ တိဏလတာကုလံ.
ဒိသွာနာဟံ ဗုဒ္ဓထူပံ,
ဂရုစိတ္တံ ဥပဋ္ဌဟိံ;
ဗုဒ္ဓသေဋ္ဌဿ ထူပေါယံ,
ပလုဂ္ဂေါ အစ္ဆတီ ဝနေ.
နစ္ဆန္နံ နပ္ပတိရူပံ,
ဇာနန္တဿ ဂုဏာဂုဏံ;
ဗုဒ္ဓထူပံ အသောဓေတွာ,
အညံ ကမ္မံ ပယောဇယေ.
တိဏကဋ္ဌဉ္စ ဝလ္လိဉ္စ,
သောဓယိတွာန စေတိယေ;
ဝန္ဒိတွာ အဋ္ဌ ဝါရာနိ,
ပဋိကုဋိကော အဂစ္ဆဟံ.
တေန ကမ္မေန သုကတေန,
စေတနာပဏိဓီဟိ စ;
ဇဟိတွာ မာနုသံ ဒေဟံ,
တာဝတိံသမဂစ္ဆဟံ.
တတ္ထ မေ သုကတံ ဗျမှံ,
သောဝဏ္ဏံ သပဘဿရံ;
သဋ္ဌိယောဇနမုဗ္ဗိဒ္ဓံ,
တိံသယောဇနဝိတ္ထတံ.
တိသတာနိ စ ဝါရာနိ,
ဒေဝရဇ္ဇမကာရယိံ;
ပဉ္စဝီသတိက္ခတ္တုဉ္စ,
စက္ကဝတ္တီ အဟောသဟံ.
ဘဝါဘဝေ သံသရန္တော,
မဟာဘောဂံ လဘာမဟံ;
ဘောဂေ မေ ဦနတာ နတ္ထိ,
သောဓနာယ ဣဒံ ဖလံ.
သိဝိကာ ဟတ္ထိခန္ဓေန,
ဝိပိနေ ဂစ္ဆတော မမ;
ယံ ယံ ဒိသာဟံ ဂစ္ဆာမိ,
သရဏံ သမ္ပတေ ဝနံ.
ခါဏုံ ဝါ ကဏ္ဋကံ ဝါပိ,
နာဟံ ပဿာမိ စက္ခုနာ;
ပုညကမ္မေန သံယုတ္တော,
သယမေဝါပနီယရေ.
ကုဋ္ဌံ ဂဏ္ဍော ကိလာသော စ,
အပမာရော ဝိတစ္ဆိကာ;
ဒဒ္ဒု ကစ္ဆု စ မေ နတ္ထိ,
သောဓနာယ ဣဒံ ဖလံ.
အညမ္ပိ မေ အစ္ဆရိယံ,
ဗုဒ္ဓထူပဿ သောဓနေ;
နာဘိဇာနာမိ မေ ကာယေ,
ဇာတံ ပိဠကဗိန္ဒုကံ.
အညမ္ပိ မေ အစ္ဆရိယံ,
ဗုဒ္ဓထူပမှိ သောဓိတေ;
ဒုဝေ ဘဝေ သံသရာမိ,
ဒေဝတ္တေ အထ မာနုသေ.
အညမ္ပိ မေ အစ္ဆရိယံ,
ဗုဒ္ဓထူပမှိ သောဓိတေ;
သုဝဏ္ဏဝဏ္ဏော သဗ္ဗတ္ထ,
သပ္ပဘာသော ဘဝါမဟံ.
အညမ္ပိ မေ အစ္ဆရိယံ,
ဗုဒ္ဓထူပမှိ သောဓိတေ;
အမနာပံ ဝိဝဇ္ဇတိ,
မနာပံ ဥပတိဋ္ဌတိ.
အညမ္ပိ မေ အစ္ဆရိယံ,
ဗုဒ္ဓထူပမှိ သောဓိတေ;
ဝိသုဒ္ဓံ ဟောတိ မေ စိတ္တံ,
ဧကဂ္ဂံ သုသမာဟိတံ.
အညမ္ပိ မေ အစ္ဆရိယံ,
ဗုဒ္ဓထူပမှိ သောဓိတေ;
ဧကာသနေ နိသီဒိတွာ,
အရဟတ္တမပါပုဏိံ.
သတသဟဿိတော ကပ္ပေ,
ယံ ကမ္မမကရိံ တဒါ;
ဒုဂ္ဂတိံ နာဘိဇာနာမိ,
သောဓနာယ ဣဒံ ဖလံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ပဘင်္ကရော ထေရော ဣမာ ဂါထာယော အဘာသိတ္ထာတိ.
ပဘင်္ကရတ္ထေရဿာပဒါနံ ဆဋ္ဌံ.