34.7 တိဏကုဋိဒါယကတ္ထေရအပဒါန
“နဂရေ ဗန္ဓုမတိယာ,
အဟောသိံ ပရကမ္မိကော;
ပရကမ္မာယနေ ယုတ္တော,
ပရဘတ္တံ အပဿိတော.
ရဟောဂတော နိသီဒိတွာ,
ဧဝံ စိန္တေသဟံ တဒါ;
ဗုဒ္ဓေါ လောကေ သမုပ္ပန္နော,
အဓိကာရော စ နတ္ထိ မေ.
ကာလော မေ ဂတိံ သောဓေတုံ,
ခဏော မေ ပဋိပါဒိတော;
ဒုက္ခော နိရယသမ္ဖဿော,
အပုညာနဉှိ ပါဏိနံ.
ဧဝါဟံ စိန္တယိတွာန,
ကမ္မသာမိံ ဥပါဂမိံ;
ဧကာဟံ ကမ္မံ ယာစိတွာ,
ဝိပိနံ ပါဝိသိံ အဟံ.
တိဏကဋ္ဌဉ္စ ဝလ္လိဉ္စ,
အာဟရိတွာနဟံ တဒါ;
တိဒဏ္ဍကေ ဌပေတွာန,
အကံ တိဏကုဋိံ အဟံ.
သံဃဿတ္ထာယ ကုဋိကံ,
နိယျာဒေတွာန တံ အဟံ;
တဒဟေယေဝ အာဂန္တွာ,
ကမ္မသာမိံ ဥပါဂမိံ.
တေန ကမ္မေန သုကတေန,
တာဝတိံသမဂစ္ဆဟံ;
တတ္ထ မေ သုကတံ ဗျမှံ,
ကုဋိကာယ သုနိမ္မိတံ.
သဟဿကဏ္ဍံ သတဘေဏ္ဍု,
ဓဇာလု ဟရိတာမယံ;
သတသဟဿနိယျူဟာ,
ဗျမှေ ပါတုဘဝိံသု မေ.
ယံ ယံ ယောနုပပဇ္ဇာမိ,
ဒေဝတ္တံ အထ မာနုသံ;
မမ သင်္ကပ္ပမညာယ,
ပါသာဒေါ ဥပတိဋ္ဌတိ.
ဘယံ ဝါ ဆမ္ဘိတတ္တံ ဝါ,
လောမဟံသော န ဝိဇ္ဇတိ;
တာသံ မမ န ဇာနာမိ,
တိဏကုဋိကာယိဒံ ဖလံ.
သီဟဗျဂ္ဃါ စ ဒီပီ စ,
အစ္ဆကောကတရစ္ဆကာ;
သဗ္ဗေ မံ ပရိဝဇ္ဇေန္တိ,
တိဏကုဋိကာယိဒံ ဖလံ.
သရီသပါ စ ဘူတာ စ,
အဟီ ကုမ္ဘဏ္ဍရက္ခသာ;
တေပိ မံ ပရိဝဇ္ဇေန္တိ,
တိဏကုဋိကာယိဒံ ဖလံ.
န ပါပသုပိနဿာပိ,
သရာမိ ဒဿနံ မမ;
ဥပဋ္ဌိတာ သတိ မယှံ,_
တိဏကုဋိကာယိဒံ ဖလံ.
တာယေဝ တိဏကုဋိကာယ,
အနုဘောတွာန သမ္ပဒါ;
ဂေါတမဿ ဘဂဝတော,
ဓမ္မံ သစ္ဆိကရိံ အဟံ.
ဧကနဝုတိတော ကပ္ပေ,
ယံ ကမ္မမကရိံ တဒါ;
ဒုဂ္ဂတိံ နာဘိဇာနာမိ,
တိဏကုဋိကာယိဒံ ဖလံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ တိဏကုဋိဒါယကော ထေရော ဣမာ ဂါထာယော အဘာသိတ္ထာတိ.
တိဏကုဋိဒါယကတ္ထေရဿာပဒါနံ သတ္တမံ.