34.9 ဓမ္မသဝနိယတ္ထေရအပဒါန
“ပဒုမုတ္တရော နာမ ဇိနော,
သဗ္ဗဓမ္မာန ပါရဂူ;
စတုသစ္စံ ပကာသေန္တော,
သန္တာရေသိ ဗဟုံ ဇနံ.
အဟံ တေန သမယေန,
ဇဋိလော ဥဂ္ဂတာပနော;
ဓုနန္တော ဝါကစီရာနိ,
ဂစ္ဆာမိ အမ္ဗရေ တဒါ.
ဗုဒ္ဓသေဋ္ဌဿ ဥပရိ,
ဂန္တုံ န ဝိသဟာမဟံ;
ပက္ခီဝ သေလမာသဇ္ဇ,
ဂမနံ န လဘာမဟံ.
န မေ ဣဒံ ဘူတပုဗ္ဗံ,
ဣရိယဿ ဝိကောပနံ;_
ဒကေ ယထာ ဥမ္မုဇ္ဇိတွာ,
ဧဝံ ဂစ္ဆာမိ အမ္ဗရေ.
ဥဠာရဘူတော မနုဇော,_
ဟေဋ္ဌာသီနော ဘဝိဿတိ;
ဟန္ဒ မေနံ ဂဝေသိဿံ,
အပိ အတ္ထံ လဘေယျဟံ.
ဩရောဟန္တော အန္တလိက္ခာ,
သဒ္ဒမဿောသိ သတ္ထုနော;
အနိစ္စတံ ကထေန္တဿ,
တမဟံ ဥဂ္ဂဟိံ တဒါ.
အနိစ္စသညမုဂ္ဂယှ,
အဂမာသိံ မမဿမံ;
ယာဝတာယုံ ဝသိတွာန,
တတ္ထ ကာလင်္ကတော အဟံ.
စရိမေ ဝတ္တမာနမှိ,
တံ ဓမ္မသဝနံ သရိံ;
တေန ကမ္မေန သုကတေန,
တာဝတိံသမဂစ္ဆဟံ.
တိံသကပ္ပသဟဿာနိ,
ဒေဝလောကေ ရမိံ အဟံ;
ဧကပညာသက္ခတ္တုဉ္စ,
ဒေဝရဇ္ဇမကာရယိံ.
ဧကသတ္တတိက္ခတ္တုဉ္စ,
စက္ကဝတ္တီ အဟောသဟံ;
ပဒေသရဇ္ဇံ ဝိပုလံ,
ဂဏနာတော အသင်္ခိယံ.
ပိတုဂေဟေ နိသီဒိတွာ,
သမဏော ဘာဝိတိန္ဒြိယော;
ဂါထာယ ပရိဒီပေန္တော,
အနိစ္စတမုဒါဟရိ.
အနုဿရာမိ တံ သညံ,
သံသရန္တော ဘဝါဘဝေ;
န ကောဋိံ ပဋိဝိဇ္ဈာမိ,
နိဗ္ဗာနံ အစ္စုတံ ပဒံ.
အနိစ္စာ ဝတ သင်္ခါရာ,
ဥပ္ပါဒဝယဓမ္မိနော;_
ဥပ္ပဇ္ဇိတွာ နိရုဇ္ဈန္တိ,_
တေသံ ဝူပသမော သုခေါ.
သဟ ဂါထံ သုဏိတွာန,
ပုဗ္ဗကမ္မံ အနုဿရိံ;
ဧကာသနေ နိသီဒိတွာ,
အရဟတ္တမပါပုဏိံ.
ဇာတိယာ သတ္တဝဿောဟံ,
အရဟတ္တမပါပုဏိံ;
ဥပသမ္ပာဒယိ ဗုဒ္ဓေါ,_
ဂုဏမညာယ စက္ခုမာ.
ဒါရကောဝ အဟံ သန္တော,
ကရဏီယံ သမာပယိံ;
ကိံ မေ ကရဏီယံ အဇ္ဇ,
သကျပုတ္တဿ သာသနေ.
သတသဟဿိတော ကပ္ပေ,
ယံ ကမ္မမကရိံ တဒါ;
ဒုဂ္ဂတိံ နာဘိဇာနာမိ,
သဒ္ဓမ္မသဝနေ ဖလံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဓမ္မသဝနိယော ထေရော ဣမာ ဂါထာယော အဘာသိတ္ထာတိ.
ဓမ္မသဝနိယတ္ထေရဿာပဒါနံ နဝမံ.