35.1 ဧကပဒုမိယတ္ထေရအပဒါန
“ပဒုမုတ္တရော နာမ ဇိနော,
သဗ္ဗဓမ္မာန ပါရဂူ;
ဘဝါဘဝေ ဝိဘာဝေန္တော,
တာရေသိ ဇနတံ ဗဟုံ.
ဟံသရာဇာ တဒါ ဟောမိ,
ဒိဇာနံ ပဝရော အဟံ;
ဇာတဿရံ သမောဂယှ,
ကီဠာမိ ဟံသကီဠိတံ.
ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
ဇာတဿရဿ ဥပရိ,
အာဂစ္ဆိ တာဝဒေ ဇိနော.
ဒိသွာနဟံ ဒေဝဒေဝံ,
သယမ္ဘုံ လောကနာယကံ;
ဝဏ္ဋေ ဆေတွာန ပဒုမံ,
သတပတ္တံ မနောရမံ.
မုခတုဏ္ဍေန ပဂ္ဂယှ,
ပသန္နော လောကနာယကေ;
ဥက္ခိပိတွာန ဂဂနေ,_
ဗုဒ္ဓသေဋ္ဌံ အပူဇယိံ.
ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
အန္တလိက္ခေ ဌိတော သတ္ထာ,
အကာ မေ အနုမောဒနံ.
‘ဣမိနာ ဧကပဒုမေန,
စေတနာပဏိဓီဟိ စ;
ကပ္ပါနံ သတသဟဿံ,
ဝိနိပါတံ န ဂစ္ဆသိ’.
ဣဒံ ဝတွာန သမ္ဗုဒ္ဓေါ,_
ဇလဇုတ္တမနာမကော;
မမ ကမ္မံ ပကိတ္တေတွာ,
အဂမာ ယေန ပတ္ထိတံ.
သတသဟဿိတော ကပ္ပေ,
ယံ ကမ္မမကရိံ တဒါ;
ဒုဂ္ဂတိံ နာဘိဇာနာမိ,
ဗုဒ္ဓပူဇာယိဒံ ဖလံ.
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဧကပဒုမိယော ထေရော ဣမာ ဂါထာယော အဘာသိတ္ထာတိ.
ဧကပဒုမိယတ္ထေရဿာပဒါနံ ပဌမံ.