35.8 တိဏမုဋ္ဌိဒါယကတ္ထေရအပဒါန
“ဟိမဝန္တဿာဝိဒူရေ,
လမ္ဗကော နာမ ပဗ္ဗတော;
ဥပတိဿော နာမ သမ္ဗုဒ္ဓေါ,_
အဗ္ဘောကာသမှိ စင်္ကမိ.
မိဂလုဒ္ဒေါ တဒါ အာသိံ,
အရညေ ကာနနေ အဟံ;
ဒိသွာန တံ ဒေဝဒေဝံ,
သယမ္ဘုံ အပရာဇိတံ.
ဝိပ္ပသန္နေန စိတ္တေန,
တဒါ တဿ မဟေသိနော;
နိသီဒနတ္ထံ ဗုဒ္ဓဿ,
တိဏမုဋ္ဌိမဒါသဟံ.
ဒတွာန ဒေဝဒေဝဿ,
ဘိယျော စိတ္တံ ပသာဒယိံ;
သမ္ဗုဒ္ဓံ အဘိဝါဒေတွာ,
ပက္ကာမိံ ဥတ္တရာမုခေါ.
အစိရံ ဂတမတ္တံ မံ,
မိဂရာဇာ အပေါထယိ;
သီဟေန ပေါထိတော သန္တော,
တတ္ထ ကာလင်္ကတော အဟံ.
အာသန္နေ မေ ကတံ ကမ္မံ,
ဗုဒ္ဓသေဋ္ဌေ အနာသဝေ;
သုမုတ္တော သရဝေဂေါဝ,
ဒေဝလောကံ အဂဉ္ဆဟံ.
ယူပေါ တတ္ထ သုဘော အာသိ,
ပုညကမ္မာဘိနိမ္မိတော;
သဟဿကဏ္ဍော သတဘေဏ္ဍု,
ဓဇာလု ဟရိတာမယော.
ပဘာ နိဒ္ဓါဝတေ တဿ,
သတရံသီဝ ဥဂ္ဂတော;
အာကိဏ္ဏော ဒေဝကညာဟိ,
အာမောဒိံ ကာမကာမဟံ.
ဒေဝလောကာ စဝိတွာန,
သုက္ကမူလေန စောဒိတော;
အာဂန္တွာန မနုဿတ္တံ,
ပတ္တောမှိ အာသဝက္ခယံ.
စတုန္နဝုတိတော ကပ္ပေ,
နိသီဒနမဒါသဟံ;
ဒုဂ္ဂတိံ နာဘိဇာနာမိ,
တိဏမုဋ္ဌိယိဒံ ဖလံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ တိဏမုဋ္ဌိဒါယကော ထေရော ဣမာ ဂါထာယော အဘာသိတ္ထာတိ.
တိဏမုဋ္ဌိဒါယကတ္ထေရဿာပဒါနံ အဋ္ဌမံ.