39.1 အဝဋဖလဒါယကတ္ထေရအပဒါန
Review
1.
4177
“သတရံသိ နာမ ဘဂဝါ,
သယမ္ဘူ အပရာဇိတော;
ဝိဝေကကာမော သမ္ဗုဒ္ဓေါ,
ဂေါစရာယာဘိနိက္ခမိ.
2.
4178
ဖလဟတ္ထော အဟံ ဒိသွာ,
ဥပဂစ္ဆိံ နရာသဘံ;_
ပသန္နစိတ္တော သုမနော,
အဝဋံ အဒဒိံ ဖလံ.
3.
4179
စတုန္နဝုတိတော ကပ္ပေ,
ယံ ဖလမဒဒိံ အဟံ;
ဒုဂ္ဂတိံ နာဘိဇာနာမိ,
ဖလဒါနဿိဒံ ဖလံ.
4.
4180
ကိလေသာ ဈာပိတာ မယှံ,
ဘဝါ သဗ္ဗေ သမူဟတာ;
နာဂေါဝ ဗန္ဓနံ ဆေတွာ,
ဝိဟရာမိ အနာသဝေါ.
5.
4181
သွာဂတံ ဝတ မေ အာသိ,
မမ ဗုဒ္ဓဿ သန္တိကေ;
တိဿော ဝိဇ္ဇာ အနုပ္ပတ္တာ,
ကတံ ဗုဒ္ဓဿ သာသနံ.
6.
4182
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
4183
ဣတ္ထံ သုဒံ အာယသ္မာ အဝဋဖလဒါယကော ထေရော ဣမာ ဂါထာယော အဘာသိတ္ထာတိ.
4184
အဝဋဖလဒါယကတ္ထေရဿာပဒါနံ ပဌမံ.