4.2 သာဂတတ္ထေရအပဒါန
“သောဘိတော နာမ နာမေန,
အဟောသိံ ဗြာဟ္မဏော တဒါ;
ပုရက္ခတော သသိဿေဟိ,
အာရာမံ အဂမာသဟံ.
ဘဂဝါ တမှိ သမယေ,
ဘိက္ခုသံဃပုရက္ခတော;
အာရာမဒွါရာ နိက္ခမ္မ,
အဋ္ဌာသိ ပုရိသုတ္တမော.
တမဒ္ဒသာသိံ သမ္ဗုဒ္ဓံ,
ဒန္တံ ဒန္တပုရက္ခတံ;
သကံ စိတ္တံ ပသာဒေတွာ,
သန္ထဝိံ လောကနာယကံ.
ယေ ကေစိ ပါဒပါ သဗ္ဗေ,
မဟိယာ တေ ဝိရူဟရေ;
ဗုဒ္ဓိမန္တော တထာ သတ္တာ,
ရုဟန္တိ ဇိနသာသနေ.
သတ္ထဝါဟောသိ သပ္ပညော,
မဟေသိ ဗဟုကေ ဇနေ;
ဝိပထာ ဥဒ္ဓရိတွာန,
ပထံ အာစိက္ခသေ တုဝံ.
ဒန္တော ဒန္တပရိကိဏ္ဏော,
ဈာယီ ဈာနရတေဟိ စ;
အာတာပီ ပဟိတတ္တေဟိ,
ဥပသန္တေဟိ တာဒိဘိ._
အလင်္ကတော ပရိသာဟိ,
ပုညဉာဏေဟိ သောဘတိ;
ပဘာ နိဒ္ဓါဝတေ တုယှံ,
သူရိယောဒယနေ ယထာ.
ပသန္နစိတ္တံ ဒိသွာန,
မဟေသီ ပဒုမုတ္တရော;
ဘိက္ခုသံဃေ ဌိတော သတ္ထာ,
ဣမာ ဂါထာ အဘာသထ._
‘ယော သော ဟာသံ ဇနေတွာန,
မမံ ကိတ္တေသိ ဗြာဟ္မဏော;
ကပ္ပါနံ သတသဟဿံ,
ဒေဝလောကေ ရမိဿတိ.
တုသိတာ ဟိ စဝိတွာန,
သုက္ကမူလေန စောဒိတော;
ဂေါတမဿ ဘဂဝတော,
သာသနေ ပဗ္ဗဇိဿတိ.
တေန ကမ္မေန သုကတေန,
အရဟတ္တံ လဘိဿတိ;
သာဂတော နာမ နာမေန,
ဟေဿတိ သတ္ထု သာဝကော’.
ပဗ္ဗဇိတွာန ကာယေန,
ပါပကမ္မံ ဝိဝဇ္ဇယိံ;
ဝစီဒုစ္စရိတံ ဟိတွာ,
အာဇီဝံ ပရိသောဓယိံ.
ဧဝံ ဝိဟရမာနောဟံ,
တေဇောဓာတူသု ကောဝိဒေါ;
သဗ္ဗာသဝေ ပရိညာယ,
ဝိဟရာမိ အနာသဝေါ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ သာဂတော ထေရော ဣမာ ဂါထာယော အဘာသိတ္ထာတိ.
သာဂတတ္ထေရဿာပဒါနံ ဒုတိယံ.