4.3 မဟာကစ္စာနတ္ထေရအပဒါန
“ပဒုမုတ္တရနာထဿ,
ပဒုမံ နာမ စေတိယံ;
သိလာသနံ ကာရယိတွာ,
သုဝဏ္ဏေနာဘိလေပယိံ.
ရတနာမယဆတ္တဉ္စ,
ပဂ္ဂယှ ဝါဠဗီဇနိံ;
ဗုဒ္ဓဿ အဘိရောပေသိံ,
လောကဗန္ဓုဿ တာဒိနော.
ယာဝတာ ဒေဝတာ ဘုမ္မာ,
သဗ္ဗေ သန္နိပတုံ တဒါ;
ရတနာမယဆတ္တာနံ,
ဝိပါကံ ကထယိဿတိ.
တဉ္စ သဗ္ဗံ သုဏိဿာမ,
ကထယန္တဿ သတ္ထုနော;
ဘိယျော ဟာသံ ဇနေယျာမ,
သမ္မာသမ္ဗုဒ္ဓသာသနေ.
ဟေမာသနေ နိသီဒိတွာ,
သယမ္ဘူ အဂ္ဂပုဂ္ဂလော;
ဘိက္ခုသံဃပရိဗျူဠှော,
ဣမာ ဂါထာ အဘာသထ._
‘ယေနိဒံ အာသနံ ဒိန္နံ,
သောဝဏ္ဏံ ရတနာမယံ;
တမဟံ ကိတ္တယိဿာမိ,
သုဏာထ မမ ဘာသတော.
တိံသ ကပ္ပါနိ ဒေဝိန္ဒော,
ဒေဝရဇ္ဇံ ကရိဿတိ;
သမန္တာ ယောဇနသတံ,
အာဘာယာဘိဘဝိဿတိ.
မနုဿလောကမာဂန္တွာ,
စက္ကဝတ္တီ ဘဝိဿတိ;
ပဘဿရောတိ နာမေန,
ဥဂ္ဂတေဇော ဘဝိဿတိ._
ဒိဝါ ဝါ ယဒိ ဝါ ရတ္တိံ,
သတရံသီဝ ဥဂ္ဂတော;
သမန္တာ အဋ္ဌရတနံ,
ဥဇ္ဇောတိဿတိ ခတ္တိယော._
ကပ္ပသတသဟဿမှိ,
ဩက္ကာကကုလသမ္ဘဝေါ;
ဂေါတမော နာမ ဂေါတ္တေန,
သတ္ထာ လောကေ ဘဝိဿတိ.
တုသိတာ ဟိ စဝိတွာန,
သုက္ကမူလေန စောဒိတော;
ကစ္စာနော နာမ နာမေန,
ဗြဟ္မဗန္ဓု ဘဝိဿတိ.
သော ပစ္ဆာ ပဗ္ဗဇိတွာန,
အရဟာ ဟေဿတိနာသဝေါ;
ဂေါတမော လောကပဇ္ဇောတော,
အဂ္ဂဋ္ဌာနေ ဌပေဿတိ.
သံခိတ္တပုစ္ဆိတံ ပဉှံ,
ဝိတ္ထာရေန ကထေဿတိ;
ကထယန္တော စ တံ ပဉှံ,
အဇ္ဈာသယံ ပူရယိဿတိ’.
အဍ္ဎေ ကုလေ အဘိဇာတော,
ဗြာဟ္မဏော မန္တပါရဂူ;
ဩဟာယ ဓနဓညာနိ,
ပဗ္ဗဇိံ အနဂါရိယံ.
သံခိတ္တေနပိ ပုစ္ဆန္တေ,
ဝိတ္ထာရေန ကထေမဟံ;
အဇ္ဈာသယံ တေသံ ပူရေမိ,
တောသေမိ ဒွိပဒုတ္တမံ.
တောသိတော မေ မဟာဝီရော,
သယမ္ဘူ အဂ္ဂပုဂ္ဂလော;
ဘိက္ခုသံဃေ နိသီဒိတွာ,
ဧတဒဂ္ဂေ ဌပေသိ မံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ မဟာကစ္စာနော ထေရော ဣမာ ဂါထာယော အဘာသိတ္ထာတိ.
မဟာကစ္စာနတ္ထေရဿာပဒါနံ တတိယံ.