41.3 မေတ္တဂုတ္ထေရအပဒါန
“ဟိမဝန္တဿာဝိဒူရေ,
အသောကော နာမ ပဗ္ဗတော;
တတ္ထာသိ အဿမော မယှံ,
ဝိဿကမ္မေန မာပိတော.
သုမေဓော နာမ သမ္ဗုဒ္ဓေါ,
အဂ္ဂေါ ကာရုဏိကော မုနိ;
နိဝါသယိတွာ ပုဗ္ဗဏှေ,
ပိဏ္ဍာယ မေ ဥပါဂမိ.
ဥပါဂတံ မဟာဝီရံ,_
သုမေဓံ လောကနာယကံ;
ပဂ္ဂယှ သုဂတပတ္တံ,
သပ္ပိတေလံ အပူရယိံ.
ဒတွာနဟံ ဗုဒ္ဓသေဋ္ဌေ,
သုမေဓေ လောကနာယကေ;
အဉ္ဇလိံ ပဂ္ဂဟေတွာန,
ဘိယျော ဟာသံ ဇနေသဟံ.
ဣမိနာ သပ္ပိဒါနေန,_
စေတနာပဏိဓီဟိ စ;
ဒေဝဘူတော မနုဿော ဝါ,
လဘာမိ ဝိပုလံ သုခံ.
ဝိနိပါတံ ဝိဝဇ္ဇေတွာ,
သံသရာမိ ဘဝါဘဝေ;
တတ္ထ စိတ္တံ ပဏိဓိတွာ,
လဘာမိ အစလံ ပဒံ.
‘လာဘာ တုယှံ သုလဒ္ဓံ တေ,
ယံ မံ အဒ္ဒက္ခိ ဗြာဟ္မဏ;
မမ ဒဿနမာဂမ္မ,
အရဟတ္တံ ဘဝိဿတိ.
ဝိဿတ္ထော ဟောဟိ မာ ဘာယိ,
အဓိဂန္တွာ မဟာယသံ;
မမဉှိ သပ္ပိံ ဒတွာန,
ပရိမောက္ခသိ ဇာတိယာ’.
ဣမိနာ သပ္ပိဒါနေန,_
စေတနာပဏိဓီဟိ စ;
ဒေဝဘူတော မနုဿော ဝါ,
လဘသေ ဝိပုလံ သုခံ.
ဣမိနာ သပ္ပိဒါနေန,_
မေတ္တစိတ္တဝတာယ စ;
အဋ္ဌာရသေ ကပ္ပသတေ,
ဒေဝလောကေ ရမိဿသိ.
အဋ္ဌတိံသတိက္ခတ္တုဉ္စ,
ဒေဝရာဇာ ဘဝိဿသိ;
ပဒေသရဇ္ဇံ ဝိပုလံ,
ဂဏနာတော အသင်္ခိယံ.
ဧကပညာသက္ခတ္တုဉ္စ,
စက္ကဝတ္တီ ဘဝိဿသိ;
စာတုရန္တော ဝိဇိတာဝီ,
ဇမ္ဗုမဏ္ဍဿ ဣဿရော.
မဟာသမုဒ္ဒေါဝက္ခောဘော,
ဒုဒ္ဓရော ပထဝီ ယထာ;
ဧဝမေဝံ စ တေ ဘောဂါ,
အပ္ပမေယျာ ဘဝိဿရေ.
သဋ္ဌိကောဋီ ဟိရညဿ,
စဇိတွာ ပဗ္ဗဇိံ အဟံ;
ကိံ ကုသလံ ဂဝေသန္တော,
ဗာဝရိံ ဥပသင်္ကမိံ.
တတ္ထ မန္တေ အဓီယာမိ,
ဆဠင်္ဂံ နာမ လက္ခဏံ;
တမန္ဓကာရံ ဝိဓမံ,
ဥပ္ပဇ္ဇိ တွံ မဟာမုနိ._
တဝ ဒဿနကာမောဟံ,
အာဂတောမှိ မဟာမုနိ;
တဝ ဓမ္မံ သုဏိတွာန,
ပတ္တောမှိ အစလံ ပဒံ.
တိံသကပ္ပသဟဿမှိ,
သပ္ပိံ ဗုဒ္ဓဿဒါသဟံ;
ဧတ္ထန္တရေ နာဘိဇာနေ,
သပ္ပိံ ဝိညာပိတံ မယာ.
မမ သင်္ကပ္ပမညာယ,
ဥပ္ပဇ္ဇတိ ယဒိစ္ဆကံ;_
စိတ္တမညာယ နိဗ္ဗတ္တံ,
သဗ္ဗေ သန္တပ္ပယာမဟံ.
အဟော ဗုဒ္ဓါ အဟော ဓမ္မာ,
အဟော နော သတ္ထု သမ္ပဒါ;
ထောကဉှိ သပ္ပိံ ဒတွာန,
အပ္ပမေယျံ လဘာမဟံ.
မဟာသမုဒ္ဒေ ဥဒကံ,
ယာဝတာ နေရုပဿတော;
မမ သပ္ပိံ ဥပါဒါယ,
ကလဘာဂံ န ဟေဿတိ.
ယာဝတာ စက္ကဝါဠဿ,
ကရိယန္တဿ ရာသိတော;
မမ နိဗ္ဗတ္တဝတ္ထာနံ,
ဩကာသော သော န သမ္မတိ.
ပဗ္ဗတရာဇာ ဟိမဝါ,
ပဝရောပိ သိလုစ္စယော;
မမာနုလိတ္တဂန္ဓဿ,
ဥပနိဓိံ န ဟေဿတိ._
ဝတ္ထံ ဂန္ဓဉ္စ သပ္ပိဉ္စ,
အညဉ္စ ဒိဋ္ဌဓမ္မိကံ;
အသင်္ခတဉ္စ နိဗ္ဗာနံ,
သပ္ပိဒါနဿိဒံ ဖလံ.
သတိပဋ္ဌာနသယနော,
သမာဓိဈာနဂေါစရော;
ဗောဇ္ဈင်္ဂဘောဇနော အဇ္ဇ,
သပ္ပိဒါနဿိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ မေတ္တဂူ ထေရော ဣမာ ဂါထာယော အဘာသိတ္ထာတိ.
မေတ္တဂုတ္ထေရဿာပဒါနံ တတိယံ.