41.4 ဓောတကတ္ထေရအပဒါန
“ဂင်္ဂါ ဘာဂီရထီ နာမ,
ဟိမဝန္တာ ပဘာဝိတာ;
ဟံသဝတိယာ ဒွါရေန,
အနုသန္ဒတိ တာဝဒေ.
သောဘိတော နာမ အာရာမော,
ဂင်္ဂါကူလေ သုမာပိတော;
တတ္ထ ပဒုမုတ္တရော ဗုဒ္ဓေါ,
ဝသတေ လောကနာယကော.
တိဒသေဟိ ယထာ ဣန္ဒော,
မနုဇေဟိ ပုရက္ခတော;
နိသီဒိ တတ္ထ ဘဂဝါ,
အသမ္ဘီတောဝ ကေသရီ.
နဂရေ ဟံသဝတိယာ,
ဝသာမိ ဗြာဟ္မဏော အဟံ;
ဆဠင်္ဂေါ နာမ နာမေန,
ဧဝံနာမော မဟာမုနိ.
အဋ္ဌာရသ သိဿသတာ,
ပရိဝါရေန္တိ မံ တဒါ;
တေဟိ သိဿေဟိ သမိတော,
ဂင်္ဂါတီရံ ဥပါဂမိံ.
တတ္ထဒ္ဒသာသိံ သမဏေ,
နိက္ကုဟေ ဓောတပါပကေ;
ဘာဂီရထိံ တရန္တေဟံ,
ဧဝံ စိန္တေသိ တာဝဒေ.
‘သာယံ ပါတံ တရန္တာမေ,
ဗုဒ္ဓပုတ္တာ မဟာယသာ;
ဝိဟေသယန္တိ အတ္တာနံ,
တေသံ အတ္တာ ဝိဟညတိ.
သဒေဝကဿ လောကဿ,
ဗုဒ္ဓေါ အဂ္ဂေါ ပဝုစ္စတိ;
နတ္ထိ မေ ဒက္ခိဏေ ကာရံ,
ဂတိမဂ္ဂဝိသောဓနံ.
ယန္နူန ဗုဒ္ဓသေဋ္ဌဿ,
သေတုံ ဂင်္ဂါယ ကာရယေ;
ကာရာပေတွာ ဣမံ ကမ္မံ,
သန္တရာမိ ဣမံ ဘဝံ’.
သတသဟဿံ ဒတွာန,
သေတုံ ကာရာပယိံ အဟံ;
သဒ္ဒဟန္တော ကတံ ကာရံ,
ဝိပုလံ မေ ဘဝိဿတိ.
ကာရာပေတွာန တံ သေတုံ,
ဥပေသိံ လောကနာယကံ;_
သိရသိ အဉ္ဇလိံ ကတွာ,
ဣမံ ဝစနမဗြဝိံ._
‘သတသဟဿဿ ဝယံ,
ဒတွာ ကာရာပိတော မယာ;
တဝတ္ထာယ မဟာသေတု,
ပဋိဂ္ဂဏှ မဟာမုနေ’.
ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
ဘိက္ခုသံဃေ နိသီဒိတွာ,
ဣမာ ဂါထာ အဘာသထ._
‘ယော မေ သေတုံ အကာရေသိ,
ပသန္နော သေဟိ ပါဏိဘိ;
တမဟံ ကိတ္တယိဿာမိ,
သုဏာထ မမ ဘာသတော.