41.5 ဥပသိဝတ္ထေရအပဒါန
“ဟိမဝန္တဿာဝိဒူရေ,
အနောမော နာမ ပဗ္ဗတော;
အဿမော သုကတော မယှံ,
ပဏ္ဏသာလာ သုမာပိတာ.
နဒီ စ သန္ဒတီ တတ္ထ,
သုပတိတ္ထာ မနောရမာ;
အနူပတိတ္ထေ ဇာယန္တိ,
ပဒုမုပ္ပလကာ ဗဟူ.
ပါဌီနာ ပါဝုသာ မစ္ဆာ,
ဗလဇာ မုဉ္ဇရောဟိတာ;
မစ္ဆကစ္ဆပသဉ္ဆန္နာ,
နဒိကာ သန္ဒတေ တဒါ.
တိမိရာ ပုပ္ဖိတာ တတ္ထ,
အသောကာ ခုဒ္ဒမာလကာ;
ပုန္နာဂါ ဂိရိပုန္နာဂါ,
သမ္ပဝန္တိ မမဿမံ.
ကုဋဇာ ပုပ္ဖိတာ တတ္ထ,
တိဏသူလဝနာနိ စ;
သာလာ စ သဠလာ တတ္ထ,
စမ္ပကာ ပုပ္ဖိတာ ဗဟူ.
အဇ္ဇုနာ အတိမုတ္တာ စ,
မဟာနာမာ စ ပုပ္ဖိတာ;
အသနာ မဓုဂန္ဓီ စ,
ပုပ္ဖိတာ တေ မမဿမေ.
ဥဒ္ဒါလကာ ပါဋလိကာ,_
ယူထိကာ စ ပိယင်္ဂုကာ;
ဗိမ္ဗိဇာလကသဉ္ဆန္နာ,
သမန္တာ အဍ္ဎယောဇနံ.
မာတဂ္ဂါရာ သတ္တလိယော,
ပါဋလီ သိန္ဒုဝါရကာ;
အင်္ကောလကာ ဗဟူ တတ္ထ,
တာလကုဋ္ဌိ စ ပုပ္ဖိတာ;
သေလေယျကာ ဗဟူ တတ္ထ,
ပုပ္ဖိတာ မမ အဿမေ.
ဧတေသု ပုပ္ဖဇာတေသု,
သောဘန္တိ ပါဒပါ ဗဟူ;
သမန္တာ တေန ဂန္ဓေန,
ဝါယတေ မမ အဿမော.
ဟရီတကာ အာမလကာ,
အမ္ဗဇမ္ဗုဝိဘီတကာ;
ကောလာ ဘလ္လာတကာ ဗိလ္လာ,
ဖာရုသကဖလာနိ စ.
တိန္ဒုကာ စ ပိယာလာ စ,
မဓုကာ ကာသုမာရယော;
လဗုဇာ ပနသာ တတ္ထ,
ကဒလီ ဗဒရီဖလာ.
အမ္ဗာဋကာ ဗဟူ တတ္ထ,
ဝလ္လိကာရဖလာနိ စ;
ဗီဇပူရသပါရိယော,
ဖလိတာ မမ အဿမေ.
အာဠကာ ဣသိမုဂ္ဂါ စ,
တတော မောဒဖလာ ဗဟူ;
အဝဋာ ပက္ကဘရိတာ,
ပိလက္ခုဒုမ္ဗရာနိ စ.
ပိပ္ဖလီ မရီစာ တတ္ထ,
နိဂြေါဓာ စ ကပိတ္ထနာ;
ဥဒုမ္ဗရကာ ဗဟဝေါ,_
ကဏ္ဍုပဏ္ဏာ စ ဟရိယော.
ဧတေ စညေ စ ဗဟဝေါ,
ဖလိတာ အဿမေ မမ;
ပုပ္ဖရုက္ခာပိ ဗဟဝေါ,
ပုပ္ဖိတာ မမ အဿမေ.
အာလုဝါ စ ကဠမ္ဗာ စ,
ဗိဠာလီ တက္ကလာနိ စ;
အာလကာ တာလကာ စေဝ,
ဝိဇ္ဇန္တိ အဿမေ မမ.
အဿမဿာဝိဒူရေ မေ,
မဟာဇာတဿရော အဟု;
အစ္ဆောဒကော သီတဇလော,
သုပတိတ္ထော မနောရမော.
ပဒုမုပ္ပလာ ဗဟူ တတ္ထ,
ပုဏ္ဍရီကသမာယုတာ;
မန္ဒာလကေဟိ သဉ္ဆန္နာ,
နာနာဂန္ဓသမေရိတာ.
ဂဗ္ဘံ ဂဏှန္တိ ပဒုမာ,
အညေ ပုပ္ဖန္တိ ကေသရီ;
ဩပုပ္ဖပတ္တာ တိဋ္ဌန္တိ,
ပဒုမာကဏ္ဏိကာ ဗဟူ.
မဓု ဘိသမှာ သဝတိ,
ခီရံ သပ္ပိ မုလာဠိဘိ;
သမန္တာ တေန ဂန္ဓေန,
နာနာဂန္ဓသမေရိတာ.
ကုမုဒါ အမ္ဗဂန္ဓိ စ,
နယိတာ ဒိဿရေ ဗဟူ;
ဇာတဿရဿာနုကူလံ,
ကေတကာ ပုပ္ဖိတာ ဗဟူ.
သုဖုလ္လာ ဗန္ဓုဇီဝါ စ,
သေတဝါရီ သုဂန္ဓိကာ;
ကုမ္ဘိလာ သုသုမာရာ စ,
ဂဟကာ တတ္ထ ဇာယရေ.
ဥဂ္ဂါဟကာ အဇဂရာ,_
တတ္ထ ဇာတဿရေ ဗဟူ;
ပါဌီနာ ပါဝုသာ မစ္ဆာ,
ဗလဇာ မုဉ္ဇရောဟိတာ.
မစ္ဆကစ္ဆပသဉ္ဆန္နာ,
အထော ပပဋကာဟိ စ;
ပါရေဝတာ ရဝိဟံသာ,
ကုကုတ္ထာ စ နဒီစရာ.
ဒိန္ဒိဘာ စက္ကဝါကာ စ,
ပမ္ပကာ ဇီဝဇီဝကာ;
ကလန္ဒကာ ဥက္ကုသာ စ,
သေနကာ ဥဒ္ဓရာ ဗဟူ.
ကောဋ္ဌကာ သုကပေါတာ စ,
တုလိယာ စမရာ ဗဟူ;
ကာရေနိယော စ တိလကာ,
ဥပဇီဝန္တိ တံ သရံ._
သီဟာ ဗျဂ္ဃါ စ ဒီပီ စ,
အစ္ဆကောကတရစ္ဆကာ;
ဝါနရာ ကိန္နရာ စေဝ,
ဒိဿန္တိ မမ အဿမေ.
တာနိ ဂန္ဓာနိ ဃာယန္တော,
ဘက္ခယန္တော ဖလာနဟံ;
ဂန္ဓောဒကံ ပိဝန္တော စ,
ဝသာမိ မမ အဿမေ.
ဧဏီမိဂါ ဝရာဟာ စ,
ပသဒါ ခုဒ္ဒရူပကာ;
အဂ္ဂိကာ ဇောတိကာ စေဝ,
ဝသန္တိ မမ အဿမေ.
ဟံသာ ကောဉ္စာ မယူရာ စ,
သာလိကာပိ စ ကောကိလာ;
မဇ္ဇာရိကာ ဗဟူ တတ္ထ,
ကောသိကာ ပေါဋ္ဌသီသကာ.
ပိသာစာ ဒါနဝါ စေဝ,
ကုမ္ဘဏ္ဍာ ရက္ခသာ ဗဟူ;
ဂရုဠာ ပန္နဂါ စေဝ,
ဝသန္တိ မမ အဿမေ.
မဟာနုဘာဝါ ဣသယော,
သန္တစိတ္တာ သမာဟိတာ;
ကမဏ္ဍလုဓရာ သဗ္ဗေ,
အဇိနုတ္တရဝါသနာ;
ဇဋာဘာရဘရိတာဝ,
ဝသန္တိ မမ အဿမေ.
ယုဂမတ္တဉ္စ ပေက္ခန္တာ,
နိပကာ သန္တဝုတ္တိနော;
လာဘာလာဘေန သန္တုဋ္ဌာ,
ဝသန္တိ မမ အဿမေ.
ဝါကစီရံ ဓုနန္တာ တေ,
ဖောဋေန္တာဇိနစမ္မကံ;
သဗလေဟိ ဥပတ္ထဒ္ဓါ,
ဂစ္ဆန္တိ အမ္ဗရေ တဒါ.
န တေ ဒကံ အာဟရန္တိ,
ကဋ္ဌံ ဝါ အဂ္ဂိဒါရုကံ;
သယဉ္စ ဥပသမ္ပန္နာ,
ပါဋိဟီရဿိဒံ ဖလံ.
လောဟဒေါဏိံ ဂဟေတွာန,
ဝနမဇ္ဈေ ဝသန္တိ တေ;
ကုဉ္ဇရာဝ မဟာနာဂါ,
အသမ္ဘီတာဝ ကေသရီ.
အညေ ဂစ္ဆန္တိ ဂေါယာနံ,
အညေ ပုဗ္ဗဝိဒေဟကံ;
အညေ စ ဥတ္တရကုရုံ,
သကံ ဗလမဝဿိတာ.
တတော ပိဏ္ဍံ အာဟရိတွာ,
ပရိဘုဉ္ဇန္တိ ဧကတော;
သဗ္ဗေသံ ပက္ကမန္တာနံ,
ဥဂ္ဂတေဇာန တာဒိနံ._
အဇိနစမ္မသဒ္ဒေန,
ဝနံ သဒ္ဒါယတေ တဒါ;
ဧဒိသာ တေ မဟာဝီရ,
သိဿာ ဥဂ္ဂတပါ မမ.
ပရိဝုတော အဟံ တေဟိ,
ဝသာမိ မမ အဿမေ;
တောသိတာ သကကမ္မေန,
ဝိနီတာပိ သမာဂတာ.
အာရာဓယိံသု မံ ဧတေ,
သကကမ္မာဘိလာသိနော;
သီလဝန္တော စ နိပကာ,
အပ္ပမညာသု ကောဝိဒါ.
ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
သမယံ သံဝိဒိတွာန,
ဥပဂစ္ဆိ ဝိနာယကော._
ဥပဂန္တွာန သမ္ဗုဒ္ဓေါ,_
အာတာပီ နိပကော မုနိ;
ပတ္တံ ပဂ္ဂယှ သမ္ဗုဒ္ဓေါ,
ဘိက္ခာယ မမုပါဂမိ.
ဥပါဂတံ မဟာဝီရံ,_
ဇလဇုတ္တမနာယကံ;
တိဏသန္ထရံ ပညာပေတွာ,
သာလပုပ္ဖေဟိ ဩကိရိံ.
နိသာဒေတွာန သမ္ဗုဒ္ဓံ,
ဟဋ္ဌော သံဝိဂ္ဂမာနသော;
ခိပ္ပံ ပဗ္ဗတမာရုယှ,
အဂဠုံ အဂ္ဂဟိံ အဟံ.
ကုမ္ဘမတ္တံ ဂဟေတွာန,
ပနသံ ဒေဝဂန္ဓိကံ;
ခန္ဓေ အာရောပယိတွာန,
ဥပဂစ္ဆိံ ဝိနာယကံ._
ဖလံ ဗုဒ္ဓဿ ဒတွာန,
အဂဠုံ အနုလိမ္ပဟံ;
ပသန္နစိတ္တော သုမနော,
ဗုဒ္ဓသေဋ္ဌံ အဝန္ဒိဟံ.
ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
ဣသိမဇ္ဈေ နိသီဒိတွာ,_
ဣမာ ဂါထာ အဘာသထ._
‘ယော မေ ဖလဉ္စ အဂဠုံ,
အာသနဉ္စ အဒါသိ မေ;
တမဟံ ကိတ္တယိဿာမိ,
သုဏာထ မမ ဘာသတော.
ဂါမေ ဝါ ယဒိ ဝါရညေ,
ပဗ္ဘာရေသု ဂုဟာသု ဝါ;
ဣမဿ စိတ္တမညာယ,_
နိဗ္ဗတ္တိဿတိ ဘောဇနံ.
ဒေဝလောကေ မနုဿေ ဝါ,
ဥပပန္နော အယံ နရော;_
ဘောဇနေဟိ စ ဝတ္ထေဟိ,
ပရိသံ တပ္ပယိဿတိ.
ဥပပဇ္ဇတိ ယံ ယောနိံ,_
ဒေဝတ္တံ အထ မာနုသံ;
အက္ခောဘဘောဂေါ ဟုတွာန,
သံသရိဿတိယံ နရော.
တိံသကပ္ပသဟဿာနိ,
ဒေဝလောကေ ရမိဿတိ;
သဟဿက္ခတ္တုံ ရာဇာ စ,
စက္ကဝတ္တီ ဘဝိဿတိ.
ဧကသတ္တတိက္ခတ္တုဉ္စ,
ဒေဝရဇ္ဇံ ကရိဿတိ;
ပဒေသရဇ္ဇံ ဝိပုလံ,
ဂဏနာတော အသင်္ခိယံ.
ကပ္ပသတသဟဿမှိ,
ဩက္ကာကကုလသမ္ဘဝေါ;
ဂေါတမော နာမ ဂေါတ္တေန,
သတ္ထာ လောကေ ဘဝိဿတိ.
တဿ ဓမ္မေသု ဒါယာဒေါ,
ဩရသော ဓမ္မနိမ္မိတော; ( )
သဗ္ဗာသဝေ ပရိညာယ,
ဝိဟရိဿတိနာသဝေါ’.
သုလဒ္ဓလာဘော လဒ္ဓေါ မေ,
ယောဟံ အဒ္ဒက္ခိံ နာယကံ;
တိဿော ဝိဇ္ဇာ အနုပ္ပတ္တာ,
ကတံ ဗုဒ္ဓဿ သာသနံ.
ဂါမေ ဝါ ယဒိ ဝါရညေ,
ပဗ္ဘာရေသု ဂုဟာသု ဝါ;
မမ သင်္ကပ္ပမညာယ,
ဘောဇနံ ဟောတိ မေ သဒါ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဥပသိဝေါ ထေရော ဣမာ ဂါထာယော အဘာသိတ္ထာတိ.
ဥပသိဝတ္ထေရဿာပဒါနံ ပဉ္စမံ.