41.8 တောဒေယျတ္ထေရအပဒါန
“ရာဇာသိ ဝိဇယော နာမ,
ကေတုမတီပုရုတ္တမေ;
သူရော ဝိက္ကမသမ္ပန္နော,
ပုရမဇ္ဈာဝသီ တဒါ.
တဿ ရညော ပမတ္တဿ,
အဋဝိယော သမုဋ္ဌဟုံ;
ဩတာရာ တုဏ္ဍိကာ စေဝ,
ရဋ္ဌံ ဝိဒ္ဓံသယုံ တဒါ.
ပစ္စန္တေ ကုပိတေ ခိပ္ပံ,
သန္နိပါတေသိရိန္ဒမော;
ဘဋေ စေဝ ဗလတ္ထေ စ,
အရိံ နိဂ္ဂါဟယိ တဒါ.
ဟတ္ထာရောဟာ အနီကဋ္ဌာ,
သူရာ စ စမ္မယောဓိနော;
ဓနုဂ္ဂဟာ စ ဥဂ္ဂါ စ,
သဗ္ဗေ သန္နိပတုံ တဒါ.
အာဠာရိကာ စ ကပ္ပကာ,
နှာပကာ မာလကာရကာ;
သူရာ ဝိဇိတသင်္ဂါမာ,
သဗ္ဗေ သန္နိပတုံ တဒါ.
ခဂ္ဂဟတ္ထာ စ ပုရိသာ,
စာပဟတ္ထာ စ ဝမ္မိနော;
လုဒ္ဒါ ဝိဇိတသင်္ဂါမာ,
သဗ္ဗေ သန္နိပတုံ တဒါ.
တိဓာပဘိန္နာ မာတင်္ဂါ,
ကုဉ္ဇရာ သဋ္ဌိဟာယနာ;
သုဝဏ္ဏကစ္ဆာလင်္ကာရာ,
သဗ္ဗေ သန္နိပတုံ တဒါ.
ခမာ သီတဿ ဥဏှဿ,
ဥက္ကာရုဟရဏဿ စ;_
ယောဓာဇီဝါ ကတကမ္မာ,
သဗ္ဗေ သန္နိပတုံ တဒါ.
သင်္ခသဒ္ဒံ ဘေရိသဒ္ဒံ,
အထော ဥတုဇသဒ္ဒကံ;
ဧတေဟိ တေ ဟာသယန္တာ,
သဗ္ဗေ သန္နိပတုံ တဒါ.
တိသူလကောန္တိမန္တေဟိ စ,
ကဝစတောမရေဟိ စ;
ကောဋ္ဋေန္တာနံ နိပါတေန္တာ,
သဗ္ဗေ သန္နိပတုံ တဒါ.
ကိမေဝါတိနိသာမေတွာ,
သရာဇာ အဇိတံ ဇိနော;
သဋ္ဌိ ပါဏသဟဿာနိ,
သူလေ ဥတ္တာသယိံ တဒါ.
သဒ္ဒံ မာနုသကာကံသု,
‘အဟော ရာဇာ အဓမ္မိကော;
နိရယေ ပစ္စမာနဿ,
ကဒါ အန္တော ဘဝိဿတိ’.
သယနေဟံ တုဝဋ္ဋေန္တော,
ပဿာမိ နိရယေ တဒါ;
န သုပါမိ ဒိဝါရတ္တိံ,
သူလေန တဇ္ဇယန္တိ မံ.
ကိံ ပမာဒေန ရဇ္ဇေန,
ဝါဟနေန ဗလေန စ;
န တေ ပဟောန္တိ ဓာရေတုံ,
တာပယန္တိ မမံ သဒါ.
ကိံ မေ ပုတ္တေဟိ ဒါရေဟိ,
ရဇ္ဇေန သကလေန စ;
ယန္နူန ပဗ္ဗဇေယျာဟံ,
ဂတိမဂ္ဂံ ဝိသောဓယေ.
သဋ္ဌိ နာဂသဟဿာနိ,
သဗ္ဗာလင်္ကာရဘူသိတေ;
သုဝဏ္ဏကစ္ဆေ မာတင်္ဂေ,
ဟေမကပ္ပနဝါသသေ.
အာရူဠှေ ဂါမဏီယေဟိ,
တောမရင်္ကုသပါဏိဘိ;
သင်္ဂါမာဝစရေ ဌာနေ,
အနပေက္ခော ဝိဟာယဟံ;
သကကမ္မေန သန္တတ္တော,
နိက္ခမိံ အနဂါရိယံ.
သဋ္ဌိ အဿသဟဿာနိ,
သဗ္ဗာလင်္ကာရဘူသိတေ;
အာဇာနီယေဝ ဇာတိယာ,
သိန္ဓဝေ သီဃဝါဟနေ.
အာရူဠှေ ဂါမဏီယေဟိ,
စာပဟတ္ထေဟိ ဝမ္မိဘိ;
ပဟာရေတွာန တေ သဗ္ဗေ,
နိက္ခမိံ အနဂါရိယံ.
သဋ္ဌိ ရထသဟဿာနိ,
သဗ္ဗာလင်္ကာရဘူသိတေ;
ဒီပေ အထောပိ ဝေယဂ္ဃေ,
သန္နဒ္ဓေ ဥဿိတဒ္ဓဇေ;
တေ သဗ္ဗေ ပရိဟာရေတွာ,
ပဗ္ဗဇိံ အနဂါရိယံ.
သဋ္ဌိ ဓေနုသဟဿာနိ,
သဗ္ဗာ ကံသူပဓာရဏာ;
တာယောပိ ဆဍ္ဍယိတွာန,
ပဗ္ဗဇိံ အနဂါရိယံ.
သဋ္ဌိ ဣတ္ထိသဟဿာနိ,
သဗ္ဗာလင်္ကာရဘူသိတာ;
ဝိစိတ္တဝတ္ထာဘရဏာ,
အာမုက္ကမဏိကုဏ္ဍလာ.
အဠာရပမှာ ဟသုလာ,
သုသညာ တနုမဇ္ဈိမာ;
တာ ဟိတွာ ကန္ဒမာနာယော,
ပဗ္ဗဇိံ အနဂါရိယံ.
သဋ္ဌိ ဂါမသဟဿာနိ,
ပရိပုဏ္ဏာနိ သဗ္ဗသော;
ဆဍ္ဍယိတွာန တံ ရဇ္ဇံ,
ပဗ္ဗဇိံ အနဂါရိယံ.
နဂရာ နိက္ခမိတွာန,
ဟိမဝန္တမုပါဂမိံ;
ဘာဂီရထီနဒီတီရေ,
အဿမံ မာပယိံ အဟံ.
ပဏ္ဏသာလံ ကရိတွာန,
အဂျာဂါရံ အကာသဟံ;
အာရဒ္ဓဝီရိယော ပဟိတတ္တော,
ဝသာမိ အဿမေ အဟံ.
မဏ္ဍပေ ရုက္ခမူလေ ဝါ,
သုညာဂါရေ စ ဈာယတော;
န တု ဝိဇ္ဇတိ တာသော မေ,
န ပဿေ ဘယဘေရဝံ.
သုမေဓော နာမ သမ္ဗုဒ္ဓေါ,
အဂ္ဂေါ ကာရုဏိကော မုနိ;
ဉာဏာလောကေန ဇောတန္တော,
လောကေ ဥပ္ပဇ္ဇိ တာဝဒေ.
မမ အဿမသာမန္တာ,
ယက္ခော အာသိ မဟိဒ္ဓိကော;
ဗုဒ္ဓသေဋ္ဌမှိ ဥပ္ပန္နေ,
အာရောစေသိ မမံ တဒါ.
‘ဗုဒ္ဓေါ လောကေ သမုပ္ပန္နော,
သုမေဓော နာမ စက္ခုမာ;
တာရေတိ ဇနတံ သဗ္ဗံ,
တမ္ပိ သော တာရယိဿတိ’.
ယက္ခဿ ဝစနံ သုတွာ,
သံဝိဂ္ဂေါ အာသိ တာဝဒေ;
ဗုဒ္ဓေါ ဗုဒ္ဓေါတိ စိန္တေန္တော,
အဿမံ ပဋိသာမယိံ.
အဂ္ဂိဒါရုဉ္စ ဆဍ္ဍေတွာ,
သံသာမေတွာန သန္ထတံ;
အဿမံ အဘိဝန္ဒိတွာ,
နိက္ခမိံ ဝိပိနာ အဟံ.
တတော စန္ဒနမာဒါယ,
ဂါမာ ဂါမံ ပုရာ ပုရံ;
ဒေဝဒေဝံ ဂဝေသန္တော,
ဥပဂစ္ဆိံ ဝိနာယကံ._
ဘဂဝါ တမှိ သမယေ,
သုမေဓော လောကနာယကော;
စတုသစ္စံ ပကာသေန္တော,
ဗောဓေတိ ဇနတံ ဗဟုံ.
အဉ္ဇလိံ ပဂ္ဂဟေတွာန,
သီသေ ကတွာန စန္ဒနံ;
သမ္ဗုဒ္ဓံ အဘိဝါဒေတွာ,
ဣမာ ဂါထာ အဘာသဟံ._
‘ဝဿိကေ ပုပ္ဖမာနမှိ,
သန္တိကေ ဥပဝါယတိ;
တွံ ဝီရ ဂုဏဂန္ဓေန,
ဒိသာ သဗ္ဗာ ပဝါယသိ.
စမ္ပကေ နာဂဝနိကေ,
အတိမုတ္တကကေတကေ;
သာလေသု ပုပ္ဖမာနေသု,
အနုဝါတံ ပဝါယတိ.
တဝ ဂန္ဓံ သုဏိတွာန,
ဟိမဝန္တာ ဣဓာဂမိံ;
ပူဇေမိ တံ မဟာဝီရ,
လောကဇေဋ္ဌ မဟာယသ’.
ဝရစန္ဒနေနာနုလိမ္ပိံ,
သုမေဓံ လောကနာယကံ;
သကံ စိတ္တံ ပသာဒေတွာ,
တုဏှီ အဋ္ဌာသိ တာဝဒေ.
သုမေဓော နာမ ဘဂဝါ,
လောကဇေဋ္ဌော နရာသဘော;
ဘိက္ခုသံဃေ နိသီဒိတွာ,
ဣမာ ဂါထာ အဘာသထ._
‘ယော မေ ဂုဏေ ပကိတ္တေသိ,
စန္ဒနဉ္စ အပူဇယိ;
တမဟံ ကိတ္တယိဿာမိ,
သုဏာထ မမ ဘာသတော.
အာဒေယျဝါကျဝစနော,
ဗြဟ္မာ ဥဇု ပတာပဝါ;
ပဉ္စဝီသတိကပ္ပါနိ,
သပ္ပဘာသော ဘဝိဿတိ.
ဆဗ္ဗီသတိကပ္ပသတေ,
ဒေဝလောကေ ရမိဿတိ;
သဟဿက္ခတ္တုံ ရာဇာ စ,
စက္ကဝတ္တီ ဘဝိဿတိ.
တေတ္တိံသက္ခတ္တုံ ဒေဝိန္ဒော,
ဒေဝရဇ္ဇံ ကရိဿတိ;
ပဒေသရဇ္ဇံ ဝိပုလံ,
ဂဏနာတော အသင်္ခိယံ.
တတော စုတောယံ မနုဇော,
မနုဿတ္တံ ဂမိဿတိ;
ပုညကမ္မေန သံယုတ္တော,
ဗြဟ္မဗန္ဓု ဘဝိဿတိ.
အဇ္ဈာယကော မန္တဓရော,
တိဏ္ဏံ ဝေဒါန ပါရဂူ;
တိလက္ခဏေန သမ္ပန္နော,
ဗာဝရီ နာမ ဗြာဟ္မဏော.
တဿ သိဿော ဘဝိတွာန,
ဟေဿတိ မန္တပါရဂူ;
ဥပဂန္တွာန သမ္ဗုဒ္ဓံ,_
ဂေါတမံ သကျပုင်္ဂဝံ.
ပုစ္ဆိတွာ နိပုဏေ ပဉှေ,
ဘာဝယိတွာန အဉ္ဇသံ;
သဗ္ဗာသဝေ ပရိညာယ,
ဝိဟရိဿတိနာသဝေါ’.
တိဝိဓဂ္ဂိ နိဗ္ဗုတာ မယှံ,
ဘဝါ သဗ္ဗေ သမူဟတာ;
သဗ္ဗာသဝေ ပရိညာယ,
ဝိဟရာမိ အနာသဝေါ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ တောဒေယျော ထေရော ဣမာ ဂါထာယော အဘာသိတ္ထာတိ.
တောဒေယျတ္ထေရဿာပဒါနံ အဋ္ဌမံ.