41.9 ဇတုကဏ္ဏိတ္ထေရအပဒါန
“နဂရေ ဟံသဝတိယာ,
သေဋ္ဌိပုတ္တော အဟောသဟံ;
သမပ္ပိတော ကာမဂုဏေ,
ပရိစာရေမဟံ တဒါ.
တတော ပါသာဒမာရုယှ,
မဟာဘောဂေ ဝလဉ္ဇကော;
တတ္ထ နစ္စေဟိ ဂီတေဟိ,
ပရိစာရေမဟံ တဒါ.
တူရိယာ အာဟတာ မယှံ,
သမ္မတာဠသမာဟိတာ;
နစ္စန္တာ ဣတ္ထိယော သဗ္ဗာ,
ဟရန္တိယေဝ မေ မနော.
စေလာပိကာ ဝါမနိကာ,
ကုဉ္ဇဝါသီ တိမဇ္ဈိကာ;
လင်္ဃိကာ သောကဇ္ဈာယီ စ,
ပရိဝါရေန္တိ မံ သဒါ.
ဝေတာဠိနော ကုမ္ဘထူနီ,
နဋာ စ နစ္စကာ ဗဟူ;
နဋကာ နာဋကာ စေဝ,
ပရိဝါရေန္တိ မံ သဒါ.
ကပ္ပကာ နှာပကာ သူဒါ,
မာလာကာရာ သုပါသကာ;
ဇလ္လာ မလ္လာ စ တေ သဗ္ဗေ,
ပရိဝါရေန္တိ မံ သဒါ.
ဧတေသု ကီဠမာနေသု,
သိက္ခိတေ ကတုပါသနေ;
ရတ္တိန္ဒိဝံ န ဇာနာမိ,
ဣန္ဒောဝ တိဒသင်္ဂဏေ._
အဒ္ဓိကာ ပထိကာ သဗ္ဗေ,
ယာစကာ ဝရကာ ဗဟူ;
ဥပဂစ္ဆန္တိ တေ နိစ္စံ,_
ဘိက္ခယန္တာ မမံ ဃရံ.
သမဏာ ဗြာဟ္မဏာ စေဝ,
ပုညက္ခေတ္တာ အနုတ္တရာ;
ဝဍ္ဎယန္တာ မမံ ပုညံ,
အာဂစ္ဆန္တိ မမံ ဃရံ.
ပဋဂါ လဋုကာ သဗ္ဗေ,
နိဂဏ္ဌာ ပုပ္ဖသာဋကာ;
တေဒဏ္ဍိကာ ဧကသိခါ,
အာဂစ္ဆန္တိ မမံ ဃရံ.
အာဇီဝကာ ဝိလုတ္တာဝီ,
ဂေါဓမ္မာ ဒေဝဓမ္မိကာ;
ရဇောဇလ္လဓရာ ဧတေ,
အာဂစ္ဆန္တိ မမံ ဃရံ.
ပရိတ္တကာ သန္တိပတ္တာ,
ကောဓပုဂ္ဂနိကာ ဗဟူ;
တပဿီ ဝနစာရီ စ,
အာဂစ္ဆန္တိ မမံ ဃရံ.
ဩဍ္ဍကာ ဒမိဠာ စေဝ,
သာကုဠာ မလဝါဠကာ;
သဝရာ ယောနကာ စေဝ,
အာဂစ္ဆန္တိ မမံ ဃရံ.
အန္ဓကာ မုဏ္ဍကာ သဗ္ဗေ,
ကောဋလာ ဟနုဝိန္ဒကာ;
အာရာဝစီနရဋ္ဌာ စ,
အာဂစ္ဆန္တိ မမံ ဃရံ.
အလသန္ဒကာ ပလ္လဝကာ,
ဓမ္မရာ နိဂ္ဂမာနုသာ;
ဂေဟိကာ စေတပုတ္တာ စ,
အာဂစ္ဆန္တိ မမံ ဃရံ.
မာဓုရကာ ကောသလကာ,
ကလိင်္ဂါ ဟတ္ထိပေါရိကာ;
ဣသိဏ္ဍာ မက္ကလာ စေဝ,_
အာဂစ္ဆန္တိ မမံ ဃရံ.
စေလာဝကာ အာရဗ္ဘာ စ,
ဩဃုဠှာ မေဃလာ ဗဟူ;
ခုဒ္ဒကာ သုဒ္ဒကာ စေဝ,
အာဂစ္ဆန္တိ မမံ ဃရံ.
ရောဟဏာ သိန္ဓဝါ စေဝ,
စိတကာ ဧကကဏ္ဏိကာ;
သုရဋ္ဌာ အပရန္တာ စ,
အာဂစ္ဆန္တိ မမံ ဃရံ.
သုပ္ပါရကာ ကုမာရာ စ,
မလ္လသောဝဏ္ဏဘူမိကာ;
ဝဇ္ဇီတင်္ဂါ စ တေ သဗ္ဗေ,
အာဂစ္ဆန္တိ မမံ ဃရံ.
နဠကာရာ ပေသကာရာ,
စမ္မကာရာ စ တစ္ဆကာ;
ကမ္မာရာ ကုမ္ဘကာရာ စ,
အာဂစ္ဆန္တိ မမံ ဃရံ.
မဏိကာရာ လောဟကာရာ,
သောဏ္ဏကာရာ စ ဒုဿိကာ;
တိပုကာရာ စ တေ သဗ္ဗေ,
အာဂစ္ဆန္တိ မမံ ဃရံ.
ဥသုကာရာ ဘမကာရာ,_
ပေသကာရာ စ ဂန္ဓိကာ;
ရဇကာ တုန္နဝါယာ စ,
အာဂစ္ဆန္တိ မမံ ဃရံ.
တေလိကာ ကဋ္ဌဟာရာ စ,
ဥဒဟာရာ စ ပေဿိကာ;_
သူပိကာ သူပရက္ခာ စ,
အာဂစ္ဆန္တိ မမံ ဃရံ.
ဒေါဝါရိကာ အနီကဋ္ဌာ,
ဗန္ဓိကာ ပုပ္ဖဆဍ္ဍကာ;
ဟတ္ထာရုဟာ ဟတ္ထိပါလာ,
အာဂစ္ဆန္တိ မမံ ဃရံ.
အာနန္ဒဿ မဟာရညော,
မမတ္ထဿ အဒါသဟံ;
သတ္တဝဏ္ဏေန ရတနေန,
ဦနတ္ထံ ပူရယာမဟံ.
ယေ မယာ ကိတ္တိတာ သဗ္ဗေ,
နာနာဝဏ္ဏာ ဗဟူ ဇနာ;
တေသာဟံ စိတ္တမညာယ,
တပ္ပယိံ ရတနေနဟံ.
ဝဂ္ဂူသု ဘာသမာနာသု,
ဝဇ္ဇမာနာသု ဘေရိသု;
သင်္ခေသု ဓမယန္တေသု,
သကဂေဟေ ရမာမဟံ.
ဘဂဝါ တမှိ သမယေ,
ပဒုမုတ္တရနာယကော;
ဝသီသတသဟဿေဟိ,
ပရိက္ခီဏာသဝေဟိ သော.
ဘိက္ခူဟိ သဟိတော ဝီထိံ,
ပဋိပဇ္ဇိတ္ထ စက္ခုမာ;
ဩဘာသေန္တော ဒိသာ သဗ္ဗာ,
ဒီပရုက္ခောဝ ဇောတတိ.
ဝဇ္ဇန္တိ ဘေရိယော သဗ္ဗာ,
ဂစ္ဆန္တေ လောကနာယကေ;
ပဘာ နိဒ္ဓါဝတေ တဿ,
သတရံသီဝ ဥဂ္ဂတော.
ကဝါဋန္တရိကာယာပိ,
ပဝိဋ္ဌေန စ ရသ္မိနာ;
အန္တောဃရေသု ဝိပုလော,
အာလောကော အာသိ တာဝဒေ.
ပဘံ ဒိသွာန ဗုဒ္ဓဿ,
ပါရိသဇ္ဇေ အဝေါစဟံ;
‘နိဿံသယံ ဗုဒ္ဓသေဋ္ဌော,
ဣမံ ဝီထိမုပါဂတော’._
ခိပ္ပံ ဩရုယှ ပါသာဒါ,
အဂမိံ အန္တရာပဏံ;
သမ္ဗုဒ္ဓံ အဘိဝါဒေတွာ,
ဣဒံ ဝစနမဗြဝိံ._
‘အနုကမ္ပတု မေ ဗုဒ္ဓေါ,
ဇလဇုတ္တမနာယကော;
ဝသီသတသဟဿေဟိ,
အဓိဝါသေသိ သော မုနိ’.
နိမန္တေတွာန သမ္ဗုဒ္ဓံ,
အဘိနေသိံ သကံ ဃရံ;
တတ္ထ အန္နေန ပါနေန,
သန္တပ္ပေသိံ မဟာမုနိံ.
ဘုတ္တာဝိံ ကာလမညာယ,
ဗုဒ္ဓသေဋ္ဌဿ တာဒိနော;
သတင်္ဂိကေန တူရိယေန,
ဗုဒ္ဓသေဋ္ဌံ ဥပဋ္ဌဟိံ.
ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
အန္တောဃရေ နိသီဒိတွာ,
ဣမာ ဂါထာ အဘာသထ._
‘ယော မံ တူရိယေဟုပဋ္ဌာသိ,
အန္နပါနဉ္စဒါသိ မေ;
တမဟံ ကိတ္တယိဿာမိ,
သုဏာထ မမ ဘာသတော.
ပဟူတဘက္ခော ဟုတွာန,
သဟိရညော သဘောဇနော;
စတုဒီပေ ဧကရဇ္ဇံ,
ကာရယိဿတိယံ နရော.
ပဉ္စ သီလေ သမာဒါယ,
ဒသကမ္မပထေ တတော;
သမာဒါယ ပဝတ္တေန္တော,
ပရိသံ သိက္ခာပယိဿတိ.
တူရိယသတသဟဿာနိ,
ဘေရိယော သမလင်္ကတာ;
ဝဇ္ဇယိဿန္တိမံ နိစ္စံ,
ဥပဋ္ဌာနဿိဒံ ဖလံ._
တိံသကပ္ပသဟဿာနိ,
ဒေဝလောကေ ရမိဿတိ;
စတုသဋ္ဌိက္ခတ္တုံ ဒေဝိန္ဒော,
ဒေဝရဇ္ဇံ ကရိဿတိ.
စတုသဋ္ဌိက္ခတ္တုံ ရာဇာ,
စက္ကဝတ္တီ ဘဝိဿတိ;
ပဒေသရဇ္ဇံ ဝိပုလံ,
ဂဏနာတော အသင်္ခိယံ.
ကပ္ပသတသဟဿမှိ,
ဩက္ကာကကုလသမ္ဘဝေါ;
ဂေါတမော နာမ ဂေါတ္တေန,
သတ္ထာ လောကေ ဘဝိဿတိ.
ဥပပဇ္ဇတိ ယံ ယောနိံ,_
ဒေဝတ္တံ အထ မာနုသံ;
အနူနဘောဂေါ ဟုတွာန,
မနုဿတ္တံ ဂမိဿတိ.
အဇ္ဈာယကော ဘဝိတွာန,
တိဏ္ဏံ ဝေဒါန ပါရဂူ;
ဥတ္တမတ္ထံ ဂဝေသန္တော,_
စရိဿတိ မဟိံ ဣမံ.
သော ပစ္ဆာ ပဗ္ဗဇိတွာန,
သုက္ကမူလေန စောဒိတော;
ဂေါတမဿ ဘဂဝတော,
သာသနေဘိရမိဿတိ.
အာရာဓယိတွာန သမ္ဗုဒ္ဓံ,
ဂေါတမံ သကျပုင်္ဂဝံ;
ကိလေသေ ဈာပယိတွာန,
အရဟာယံ ဘဝိဿတိ’.
ဝိပိနေ ဗျဂ္ဃရာဇာဝ,
မိဂရာဇာဝ ကေသရီ;
အဘီတော ဝိဟရာမဇ္ဇ,
သကျပုတ္တဿ သာသနေ.
ဒေဝလောကေ မနုဿေ ဝါ,
ဒလိဒ္ဒေ ဒုဂ္ဂတိမှိ ဝါ;
နိဗ္ဗတ္တိံ မေ န ပဿာမိ,
ဥပဋ္ဌာနဿိဒံ ဖလံ._
ဝိဝေကမနုယုတ္တောမှိ,
ဥပသန္တော နိရူပဓိ;_
နာဂေါဝ ဗန္ဓနံ ဆေတွာ,
ဝိဟရာမိ အနာသဝေါ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဇတုကဏ္ဏိတ္ထေရော ဣမာ ဂါထာယော အဘာသိတ္ထာတိ.
ဇတုကဏ္ဏိတ္ထေရဿာပဒါနံ နဝမံ.