42.10 မဉ္စဒါယကတ္ထေရအပဒါန
“ပရိနိဗ္ဗုတေ ကာရုဏိကေ,
သိဒ္ဓတ္ထေ လောကနာယကေ;
ဝိတ္ထာရိကေ ပါဝစနေ,
ဒေဝမာနုသသက္ကတေ.
စဏ္ဍာလော အာသဟံ တတ္ထ,
အာသန္ဒိပီဌကာရကော;
တေန ကမ္မေန ဇီဝါမိ,
တေန ပေါသေမိ ဒါရကေ.
အာသန္ဒိံ သုကတံ ကတွာ,
ပသန္နော သေဟိ ပါဏိဘိ;
သယမေဝုပဂန္တွာန,
ဘိက္ခုသံဃဿဒါသဟံ.
တေန ကမ္မေန သုကတေန,
စေတနာပဏိဓီဟိ စ;
ဇဟိတွာ မာနုသံ ဒေဟံ,
တာဝတိံသမဂစ္ဆဟံ.
ဒေဝလောကဂတော သန္တော,
မောဒါမိ တိဒသေ ဂဏေ;
သယနာနိ မဟဂ္ဃါနိ,
နိဗ္ဗတ္တန္တိ ယဒိစ္ဆကံ.
ပညာသက္ခတ္တုံ ဒေဝိန္ဒော,
ဒေဝရဇ္ဇမကာရယိံ;
အသီတိက္ခတ္တုံ ရာဇာ စ,
စက္ကဝတ္တီ အဟောသဟံ.
ပဒေသရဇ္ဇံ ဝိပုလံ,
ဂဏနာတော အသင်္ခိယံ;
သုခိတော ယသဝါ ဟောမိ,
မဉ္စဒါနဿိဒံ ဖလံ.
ဒေဝလောကာ စဝိတွာန,
ဧမိ စေ မာနုသံ ဘဝံ;
မဟာရဟာ သုသယနာ,
သယမေဝ ဘဝန္တိ မေ.
အယံ ပစ္ဆိမကော မယှံ,
စရိမော ဝတ္တတေ ဘဝေါ;
အဇ္ဇာပိ သယနေ ကာလေ,
သယနံ ဥပတိဋ္ဌတိ.
စတုန္နဝုတိတော ကပ္ပေ,
ယံ ဒါနမဒဒိံ တဒါ;
ဒုဂ္ဂတိံ နာဘိဇာနာမိ,
မဉ္စဒါနဿိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”. (4460)
ဣတ္ထံ သုဒံ အာယသ္မာ မဉ္စဒါယကော ထေရော ဣမာ ဂါထာယော အဘာသိတ္ထာတိ.
မဉ္စဒါယကတ္ထေရဿာပဒါနံ ဒသမံ.
ဘဒ္ဒါလိဝဂ္ဂေါ ဗာစတ္တာလီသမော.
တဿုဒ္ဒါနံ
ဘဒ္ဒါလီ ဧကဆတ္တော စ,
တိဏသူလော စ မံသဒေါ;
နာဂပလ္လဝိကော ဒီပီ,
ဥစ္ဆင်္ဂိ ယာဂုဒါယကော._
ပတ္ထောဒနီ မဉ္စဒဒေါ,
ဂါထာယော ဂဏိတာ စိဟ;
ဒွေသတာနိ စ ဂါထာနံ,
ဂါထာ စေကာ တဒုတ္တရိ.