42.2 ဧကဆတ္တိယတ္ထေရအပဒါန
“စန္ဒဘာဂါနဒီတီရေ,
အဿမော သုကတော မမ;
သုသုဒ္ဓပုလိနာကိဏ္ဏော,
ပန္နသာလာ သုမာပိတာ.
ဥတ္တာနကူလာ နဒိကာ,_
သုပတိတ္ထာ မနောရမာ;
မစ္ဆကစ္ဆပသမ္ပန္နာ,
သုသုမာရနိသေဝိတာ.
အစ္ဆာ ဒီပီ စ မယူရာ,
ကရဝီကာ စ သာဠိကာ;
ကူဇန္တိ သဗ္ဗဒါ ဧတေ,
သောဘယန္တာ မမဿမံ.
ကောကိလာ မဉ္ဇုဘာဏီ စ,
ဟံသာ စ မဓုရဿရာ;
အဘိကူဇန္တိ တေ တတ္ထ,
သောဘယန္တာ မမဿမံ.
သီဟာ ဗျဂ္ဃါ ဝရာဟာ စ,
အစ္ဆ ကောကတရစ္ဆကာ;
ဂိရိဒုဂ္ဂမှိ နာဒေန္တိ,
သောဘယန္တာ မမဿမံ.
ဧဏီမိဂါ စ သရဘာ,
ဘေရဏ္ဍာ သူကရာ ဗဟူ;
ဂိရိဒုဂ္ဂမှိ နာဒေန္တိ,
သောဘယန္တာ မမဿမံ.
ဥဒ္ဒါလကာ စမ္ပကာ စ,_
ပါဋလီ သိန္ဒုဝါရကာ;
အတိမုတ္တာ အသောကာ စ,
သောဘယန္တိ မမဿမံ.
အင်္ကောလာ ယူထိကာ စေဝ,
သတ္တလီ ဗိမ္ဗိဇာလိကာ;
ကဏိကာရာ စ ပုပ္ဖန္တိ,
သောဘယန္တာ မမဿမံ.
နာဂါ သာလာ စ သဠလာ,
ပုဏ္ဍရီကေတ္ထ ပုပ္ဖိတာ;
ဒိဗ္ဗဂန္ဓံ သမ္ပဝန္တာ,
သောဘယန္တိ မမဿမံ.
အဇ္ဇုနာ အသနာ စေတ္ထ,
မဟာနာမာ စ ပုပ္ဖိတာ;
သာလာ စ ကင်္ဂုပုပ္ဖါ စ,
သောဘယန္တိ မမဿမံ.
အမ္ဗာ ဇမ္ဗူ စ တိလကာ,
နိမ္ဗာ စ သာလကလျာဏီ;
ဒိဗ္ဗဂန္ဓံ သမ္ပဝန္တာ,
သောဘယန္တိ မမဿမံ.
အသောကာ စ ကပိဋ္ဌာ စ,
ဂိရိမာလေတ္ထ ပုပ္ဖိတာ;
ဒိဗ္ဗဂန္ဓံ သမ္ပဝန္တာ,
သောဘယန္တိ မမဿမံ.
ကဒမ္ဗာ ကဒလီ စေဝ,
ဣသိမုဂ္ဂါ စ ရောပိတာ;_
ဓုဝံ ဖလာနိ ဓာရေန္တိ,
သောဘယန္တာ မမဿမံ.
ဟရီတကာ အာမလကာ,
အမ္ဗဇမ္ဗုဝိဘီတကာ;
ကောလာ ဘလ္လာတကာ ဗိလ္လာ,
ဖလိနော မမ အဿမေ.
အဝိဒူရေ ပေါက္ခရဏီ,
သုပတိတ္ထာ မနောရမာ;
မန္ဒာလကေဟိ သဉ္ဆန္နာ,
ပဒုမုပ္ပလကေဟိ စ.
ဂဗ္ဘံ ဂဏှန္တိ ပဒုမာ,
အညေ ပုပ္ဖန္တိ ကေသရီ;
ဩပတ္တကဏ္ဏိကာ စေဝ,
ပုပ္ဖန္တိ မမ အဿမေ.
ပါဌီနာ ပါဝုသာ မစ္ဆာ,
ဗလဇာ မုဉ္ဇရောဟိတာ;
အစ္ဆောဒကမှိ ဝိစရံ,
သောဘယန္တိ မမဿမံ.
နယိတာ အမ္ဗဂန္ဓီ စ,
အနုကူလေ စ ကေတကာ;
ဒိဗ္ဗဂန္ဓံ သမ္ပဝန္တာ,
သောဘယန္တိ မမဿမံ.
မဓု ဘိသမှာ သဝတိ,
ခီရသပ္ပိ မုဠာလိဘိ;
ဒိဗ္ဗဂန္ဓံ သမ္ပဝန္တာ,
သောဘယန္တိ မမဿမံ.
ပုလိနာ သောဘနာ တတ္ထ,
အာကိဏ္ဏာ ဇလသေဝိတာ;
ဩပုပ္ဖါ ပုပ္ဖိတာ သေန္တိ,
သောဘယန္တာ မမဿမံ.
ဇဋာဘာရေန ဘရိတာ,
အဇိနုတ္တရဝါသနာ;
ဝါကစီရဓရာ သဗ္ဗေ,
သောဘယန္တိ မမဿမံ.
ယုဂမတ္တမပေက္ခန္တာ,
နိပကာ သန္တဝုတ္တိနော;
ကာမဘောဂေ အနပေက္ခာ,
ဝသန္တိ မမ အဿမေ.
ပရူဠှကစ္ဆနခလောမာ,
ပင်္ကဒန္တာ ရဇဿိရာ;
ရဇောဇလ္လဓရာ သဗ္ဗေ,
ဝသန္တိ မမ အဿမေ.
အဘိညာပါရမိပ္ပတ္တာ,
အန္တလိက္ခစရာ စ တေ;
ဥဂ္ဂစ္ဆန္တာ နဘံ ဧတေ,_
သောဘယန္တိ မမဿမံ.
တေဟိ သိဿေဟိ ပရိဝုတော,
ဝသာမိ ဝိပိနေ တဒါ;
ရတ္တိန္ဒိဝံ န ဇာနာမိ,
သဒါ ဈာနသမပ္ပိတော.
ဘဂဝါ တမှိ သမယေ,
အတ္ထဒဿီ မဟာမုနိ;
တမန္ဓကာရံ နာသေန္တော,
ဥပ္ပဇ္ဇိ လောကနာယကော._
အထ အညတရော သိဿော,
အာဂစ္ဆိ မမ သန္တိကံ;
မန္တေ အဇ္ဈေတုကာမော သော,
ဆဠင်္ဂံ နာမ လက္ခဏံ.
ဗုဒ္ဓေါ လောကေ သမုပ္ပန္နော,
အတ္ထဒဿီ မဟာမုနိ;
စတုသစ္စံ ပကာသေန္တော,
ဒေသေတိ အမတံ ပဒံ.
တုဋ္ဌဟဋ္ဌော ပမုဒိတော,
ဓမ္မန္တရဂတာသယော;
အဿမာ အဘိနိက္ခမ္မ,
ဣဒံ ဝစနမဗြဝိံ._
‘ဗုဒ္ဓေါ လောကေ သမုပ္ပန္နော,
ဒွတ္တိံသဝရလက္ခဏော;
ဧထ သဗ္ဗေ ဂမိဿာမ,
သမ္မာသမ္ဗုဒ္ဓသန္တိကံ’.
ဩဝါဒပဋိကရာ တေ,
သဓမ္မေ ပါရမိံ ဂတာ;
သာဓူတိ သမ္ပဋိစ္ဆိံသု,
ဥတ္တမတ္ထဂဝေသကာ._
ဇဋာဘာရဘရိတာ တေ,
အဇိနုတ္တရဝါသနာ;
ဥတ္တမတ္ထံ ဂဝေသန္တာ,_
နိက္ခမိံသု ဝနာ တဒါ.
ဘဂဝါ တမှိ သမယေ,
အတ္ထဒဿီ မဟာယသော;
စတုသစ္စံ ပကာသေန္တော,
ဒေသေတိ အမတံ ပဒံ.
သေတစ္ဆတ္တံ ဂဟေတွာန,
ဗုဒ္ဓသေဋ္ဌဿ ဓာရယိံ;
ဧကာဟံ ဓာရယိတွာန,
ဗုဒ္ဓသေဋ္ဌံ အဝန္ဒဟံ.
အတ္ထဒဿီ တု ဘဂဝါ,
လောကဇေဋ္ဌော နရာသဘော;
ဘိက္ခုသံဃေ နိသီဒိတွာ,
ဣမာ ဂါထာ အဘာသထ._
‘ယော မေ ဆတ္တံ အဓာရေသိ,
ပသန္နော သေဟိ ပါဏိဘိ;
တမဟံ ကိတ္တယိဿာမိ,
သုဏာထ မမ ဘာသတော.
ဣမဿ ဇာယမာနဿ,_
ဒေဝတ္တေ အထ မာနုသေ;
ဓာရေဿတိ သဒါ ဆတ္တံ,
ဆတ္တဒါနဿိဒံ ဖလံ.
သတ္တသတ္တတိကပ္ပါနိ,
ဒေဝလောကေ ရမိဿတိ;
သဟဿက္ခတ္တုံ ရာဇာ စ,
စက္ကဝတ္တီ ဘဝိဿတိ.
သတ္တသတ္တတိက္ခတ္တုဉ္စ,
ဒေဝရဇ္ဇံ ကရိဿတိ;
ပဒေသရဇ္ဇံ ဝိပုလံ,
ဂဏနာတော အသင်္ခိယံ.
အဋ္ဌာရသေ ကပ္ပသတေ,
ဂေါတမော သကျပုင်္ဂဝေါ;
တမန္ဓကာရံ နာသေန္တော,
ဥပ္ပဇ္ဇိဿတိ စက္ခုမာ._
တဿ ဓမ္မေသု ဒါယာဒေါ,
ဩရသော ဓမ္မနိမ္မိတော;
သဗ္ဗာသဝေ ပရိညာယ,
ဝိဟရိဿတိနာသဝေါ’.
ယတော အဟံ ကမ္မမကံ,
ဆတ္တံ ဗုဒ္ဓဿ ဓာရယံ;
ဧတ္ထန္တရေ န ဇာနာမိ,
သေတစ္ဆတ္တံ အဓာရိတံ.
ဣဒံ ပစ္ဆိမကံ မယှံ,_
စရိမော ဝတ္တတေ ဘဝေါ;
ဆတ္တဓာရဏမဇ္ဇာပိ,
ဝတ္တတေ နိစ္စကာလိကံ.
အဟော မေ သုကတံ ကမ္မံ,
အတ္ထဒဿိဿ တာဒိနော;
သဗ္ဗာသဝါ ပရိက္ခီဏာ,
နတ္ထိ ဒါနိ ပုနဗ္ဘဝေါ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဧကဆတ္တိယော ထေရော ဣမာ ဂါထာယော အဘာသိတ္ထာတိ;
ဧကဆတ္တိယတ္ထေရဿာပဒါနံ ဒုတိယံ.