42.3 တိဏသူလကဆာဒနိယတ္ထေရအပဒါန
“ဇာတိံ ဇရဉ္စ မရဏံ,
ပစ္စဝေက္ခိံ အဟံ တဒါ;
ဧကကော အဘိနိက္ခမ္မ,
ပဗ္ဗဇိံ အနဂါရိယံ.
စရမာနောနုပုဗ္ဗေန,
ဂင်္ဂါတီရံ ဥပါဂမိံ;
တတ္ထဒ္ဒသာသိံ ပထဝိံ,
ဂင်္ဂါတီရေ သမုန္နတံ.
အဿမံ တတ္ထ မာပေတွာ,
ဝသာမိ အဿမေ အဟံ;
သုကတော စင်္ကမော မယှံ,
နာနာဒိဇဂဏာယုတော.
မမုပေန္တိ စ ဝိဿတ္ထာ,
ကူဇန္တိ စ မနောဟရံ;
ရမမာနော သဟ တေဟိ,
ဝသာမိ အဿမေ အဟံ.
မမ အဿမသာမန္တာ,
မိဂရာဇာ စတုက္ကမော;
အာသယာ အဘိနိက္ခမ္မ,
ဂဇ္ဇိ သော အသနီ ဝိယ.
နဒိတေ မိဂရာဇေ စ,
ဟာသော မေ ဥဒပဇ္ဇထ;
မိဂရာဇံ ဂဝေသန္တော,
အဒ္ဒသံ လောကနာယကံ.
ဒိသွာနာဟံ ဒေဝဒေဝံ,
တိဿံ လောကဂ္ဂနာယကံ;
ဟဋ္ဌော ဟဋ္ဌေန စိတ္တေန,
ပူဇယိံ နာဂကေသရံ.
ဥဂ္ဂစ္ဆန္တံဝ သူရိယံ,_
သာလရာဇံဝ ပုပ္ဖိတံ;
ဩသဓိံဝ ဝိရောစန္တံ,
သန္ထဝိံ လောကနာယကံ.
‘တဝ ဉာဏေန သဗ္ဗညု,
မောစေသိမံ သဒေဝကံ;
တဝံ အာရာဓယိတွာန,
ဇာတိယာ ပရိမုစ္စရေ.
အဒဿနေန သဗ္ဗညု,
ဗုဒ္ဓါနံ သဗ္ဗဒဿိနံ;
ပတန္တိဝီစိနိရယံ,
ရာဂဒေါသေဟိ ဩဖုဋာ.
တဝ ဒဿနမာဂမ္မ,
သဗ္ဗညု လောကနာယက;
ပမုစ္စန္တိ ဘဝါ သဗ္ဗာ,
ဖုသန္တိ အမတံ ပဒံ.
ယဒါ ဗုဒ္ဓါ စက္ခုမန္တော,
ဥပ္ပဇ္ဇန္တိ ပဘင်္ကရာ;_
ကိလေသေ ဈာပယိတွာန,
အာလောကံ ဒဿယန္တိ တေ’.
ကိတ္တယိတွာန သမ္ဗုဒ္ဓံ,
တိဿံ လောကဂ္ဂနာယကံ;
ဟဋ္ဌော ဟဋ္ဌေန စိတ္တေန,
တိဏသူလံ အပူဇယိံ.
မမ သင်္ကပ္ပမညာယ,
တိဿော လောကဂ္ဂနာယကော;
သကာသနေ နိသီဒိတွာ,
ဣမာ ဂါထာ အဘာသထ._
‘ယော မံ ပုပ္ဖေဟိ ဆာဒေသိ,
ပသန္နော သေဟိ ပါဏိဘိ;
တမဟံ ကိတ္တယိဿာမိ,
သုဏာထ မမ ဘာသတော.
ပဉ္စဝီသတိက္ခတ္တုံ သော,
ဒေဝရဇ္ဇံ ကရိဿတိ;
ပဉ္စသတ္တတိက္ခတ္တုဉ္စ,
စက္ကဝတ္တီ ဘဝိဿတိ.
ပဒေသရဇ္ဇံ ဝိပုလံ,
ဂဏနာတော အသင်္ခိယံ;
တဿ ကမ္မနိဿန္ဒေန,
ပုပ္ဖါနံ ပူဇနာယ စ.
သီသံနှာတော စယံ ပေါသော,
ပုပ္ဖမာကင်္ခတေ ယဒိ;
ပုညကမ္မေန သံယုတ္တံ,
ပုရတော ပါတုဘဝိဿတိ.
ယံ ယံ ဣစ္ဆတိ ကာမေဟိ,
တံ တံ ပါတုဘဝိဿတိ;
သင်္ကပ္ပံ ပရိပူရေတွာ,
နိဗ္ဗာယိဿတိနာသဝေါ’.
အဋ္ဌာရသမံ ဘာဏဝါရံ.
ကိလေသေ ဈာပယိတွာန,
သမ္ပဇာနော ပတိဿတော;
ဧကာသနေ နိသီဒိတွာ,
အရဟတ္တမပါပုဏိံ.
စင်္ကမန္တော နိပဇ္ဇန္တော,
နိသိန္နော ဥဒ ဝါ ဌိတော;
ဗုဒ္ဓသေဋ္ဌံ သရိတွာန,
ဝိဟရာမိ အဟံ သဒါ.
စီဝရေ ပိဏ္ဍပါတေ စ,
ပစ္စယေ သယနာသနေ;
တတ္ထ မေ ဦနတာ နတ္ထိ,
ဗုဒ္ဓပူဇာယိဒံ ဖလံ.
သော ဒါနိ ပတ္တော အမတံ,
သန္တံ ပဒမနုတ္တရံ;
သဗ္ဗာသဝေ ပရိညာယ,
ဝိဟရာမိ အနာသဝေါ.
ဒွေနဝုတေ ဣတော ကပ္ပေ,
ယံ ပုပ္ဖမဘိပူဇယိံ;
ဒုဂ္ဂတိံ နာဘိဇာနာမိ,
ဗုဒ္ဓပူဇာယိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ တိဏသူလကဆာဒနိယော ထေရော ဣမာ ဂါထာယော အဘာသိတ္ထာတိ.
တိဏသူလကဆာဒနိယတ္ထေရဿာပဒါနံ တတိယံ.