42.4 မဓုမံသဒါယကတ္ထေရအပဒါန
“နဂရေ ဗန္ဓုမတိယာ,
သူကရိကော အဟောသဟံ;
ဥက္ကောဋကံ ရန္ဓယိတွာ,_
မဓုမံသမှိ ဩကိရိံ.
သန္နိပါတံ အဟံ ဂန္တွာ,
ဧကံ ပတ္တံ ဂဟေသဟံ;
ပူရယိတွာန တံ ပတ္တံ,
ဘိက္ခုသံဃဿဒါသဟံ.
ယောတ္ထ ထေရတရော ဘိက္ခု,
နိယျာဒေသိ မမံ တဒါ;
ဣမိနာ ပတ္တပူရေန,_
လဘဿု ဝိပုလံ သုခံ.
ဒုဝေ သမ္ပတ္တိယော ဘုတွာ,
သုက္ကမူလေန စောဒိတော;
ပစ္ဆိမေ ဝတ္တမာနမှိ,
ကိလေသေ ဈာပယိဿတိ.
တတ္ထ စိတ္တံ ပသာဒေတွာ,
တာဝတိံသမဂစ္ဆဟံ;
တတ္ထ ဘုတွာ ပိဝိတွာ စ,
လဘာမိ ဝိပုလံ သုခံ.
မဏ္ဍပေ ရုက္ခမူလေ ဝါ,
ပုဗ္ဗကမ္မံ အနုဿရိံ;
အန္နပါနာဘိဝဿော မေ,
အဘိဝဿတိ တာဝဒေ.
ဣဒံ ပစ္ဆိမကံ မယှံ,_
စရိမော ဝတ္တတေ ဘဝေါ;
ဣဓာပိ အန္နပါနံ မေ,_
ဝဿတေ သဗ္ဗကာလိကံ.
တေနေဝ မဓုဒါနေန,
သန္ဓာဝိတွာ ဘဝေ အဟံ;
သဗ္ဗာသဝေ ပရိညာယ,
ဝိဟရာမိ အနာသဝေါ.
ဧကနဝုတိတော ကပ္ပေ,
ယံ ဒါနမဒဒိံ တဒါ;
ဒုဂ္ဂတိံ နာဘိဇာနာမိ,
မဓုဒါနဿိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ မဓုမံသဒါယကော ထေရော ဣမာ ဂါထာယော အဘာသိတ္ထာတိ.
မဓုမံသဒါယကတ္ထေရဿာပဒါနံ စတုတ္ထံ.