42.9 ပတ္ထောဒနဒါယကတ္ထေရအပဒါန
“ဝနစာရီ ပုရေ အာသိံ,
သတတံ ဝနကမ္မိကော;
ပတ္ထောဒနံ ဂဟေတွာန,
ကမ္မန္တံ အဂမာသဟံ.
တတ္ထဒ္ဒသာသိံ သမ္ဗုဒ္ဓံ,
သယမ္ဘုံ အပရာဇိတံ;
ဝနာ ပိဏ္ဍာယ နိက္ခန္တံ,
ဒိသွာ စိတ္တံ ပသာဒယိံ.
ပရကမ္မာယနေ ယုတ္တော,
ပုညဉ္စ မေ န ဝိဇ္ဇတိ;
အယံ ပတ္ထောဒနော အတ္ထိ,
ဘောဇယိဿာမဟံ မုနိံ.
ပတ္ထောဒနံ ဂဟေတွာန,
သယမ္ဘုဿ အဒါသဟံ;
မမ နိဇ္ဈာယမာနဿ,
ပရိဘုဉ္ဇိ တဒါ မုနိ.
တေန ကမ္မေန သုကတေန,
စေတနာပဏိဓီဟိ စ;
ဇဟိတွာ မာနုသံ ဒေဟံ,
တာဝတိံသမဂစ္ဆဟံ.
ဆတ္တိံသက္ခတ္တုံ ဒေဝိန္ဒော,
ဒေဝရဇ္ဇမကာရယိံ;
တေတ္တိံသက္ခတ္တုံ ရာဇာ စ,
စက္ကဝတ္တီ အဟောသဟံ.
ပဒေသရဇ္ဇံ ဝိပုလံ,
ဂဏနာတော အသင်္ခိယံ;
သုခိတော ယသဝါ ဟောမိ,
ပတ္ထောဒနဿိဒံ ဖလံ.
ဘဝါဘဝေ သံသရန္တော,
လဘာမိ အမိတံ ဓနံ;
ဘောဂေ မေ ဦနတာ နတ္ထိ,
ပတ္ထောဒနဿိဒံ ဖလံ.
နဒီသောတပဋိဘာဂါ,
ဘောဂါ နိဗ္ဗတ္တရေ မမ;
ပရိမေတုံ န သက္ကောမိ,
ပတ္ထောဒနဿိဒံ ဖလံ.
ဣမံ ခါဒ ဣမံ ဘုဉ္ဇ,_
ဣမမှိ သယနေ သယ;_
တေနာဟံ သုခိတော ဟောမိ,
ပတ္ထောဒနဿိဒံ ဖလံ.
စတုန္နဝုတိတော ကပ္ပေ,
ယံ ဒါနမဒဒိံ တဒါ;
ဒုဂ္ဂတိံ နာဘိဇာနာမိ,
ပတ္ထောဒနဿိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ပတ္ထောဒနဒါယကော ထေရော ဣမာ ဂါထာယော အဘာသိတ္ထာတိ.
ပတ္ထောဒနဒါယကတ္ထေရဿာပဒါနံ နဝမံ.